ព័ត៌មានអន្ដរជាតិ

កម្លាំងពន្លត់អគ្គីភ័យកើនដល់៧៥០០នាក់ ខណៈភ្លើងរាលដាលដល់ Hollywood Hills ដែលគម្រាមលំនៅឋាន១០ម៉ឺនខ្នងទៀត

បានផុស

២ សប្តាហ៍ មុន

នៅ

ថ្ងៃព្រហស្បតិ៍ ៩ មករា ២០២៥

ដោយ

ភ្លើងឆេះព្រៃនៅតំបន់ជុំវិញក្រុង Los Angeles កាន់តែសាហាវ និងបង្កមហន្តរាយកាន់តែធ្ងន់ធ្ងរ ខណៈអភិបាលរដ្ឋកាលីហ្វ័រញ៉ា អះអាងថា រហូតដល់ពេលនេះ អ្នកពន្លត់អគ្គីភ័យជាង៧៥០០នាក់កំពុងដាក់ពង្រាយដើម្បីពន្លត់ភ្លើងឆេះព្រៃ រីឯភ្លើងឆេះព្រៃនេះឆេះដល់កន្លែងទី៦ហៅថា Hollywood Hills គម្រាមដល់ផ្ទះ១០ម៉ឺនខ្នងទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីមានការឆេះយ៉ាងសន្ធោរសន្ទៅបែបនេះក្តី មូលហេតុនៃការឆេះមិនត្រូវបានបញ្ជាក់ច្បាស់លាស់នោះទេ ដោយគ្រាន់តែមានការសន្និដ្ឋានថា អាកាសធាតុក្តៅខ្លាំង ភាពរាំងស្ងួតអូសបន្លាយរយៈពេលយូរ ខ្យល់បក់ខ្លាំង បានក្លាយជាមូលហេតុដែលធ្វើឲ្យភ្លើងឆេះចាប់ផ្តើមឡើង និងរាលដាលយ៉ាងឆាប់រហ័ស។

យោងការផ្សាយរបស់ BBC មនុស្សជិត១៤ម៉ឺននាក់ត្រូវបានជម្លៀសចេញ ខណៈអភិបាលក្រុងកាលីហ្វ័រញ៉ា ប្រាប់ប្រជាជនឲ្យត្រៀមចាកចេញបន្ថែមទៀត ជាពិសេសនៅពេលអគ្គិភ័យវាយប្រហារទៅដល់ Hollywood Hills ជាទីកន្លែងថតរឿងដ៏ល្បីល្បាញ។

យោងសេចក្តីរាយការណ tribune.com.pk ការឆេះរាលដាលដល់ Hollywood Hills នេះ ធ្វើឲ្យលំនៅឋានប្រមាណ១០ម៉ឺនបន្ថែមទៀតស្ថិតក្នុងកម្រិតឲ្យប្រុងប្រយ័ត្នឲ្យចាកចេញ។

លោក Gavin Newsom បានស្នើឱ្យអ្នករស់នៅរដ្ឋកាលីហ្វ័រញ៉ាភាគខាងត្បូង «សូមមេត្តារក្សាការប្រុងប្រយ័ត្ននៅយប់នេះ។ ស្តាប់មន្ត្រីមូលដ្ឋាន ហើយត្រៀមជម្លៀសចេញ ប្រសិនបើអ្នកនៅជិតតំបន់ដែលរងផលប៉ះពាល់»។

នៅក្នុងការប្រកាសមួយទៀត អភិបាលរដ្ឋរូបនេះបានរាយបញ្ជីដែលកំពុងដំណើរការនាពេលបច្ចុប្បន្ន រួមមានម៉ាស៊ីនពន្លត់អគ្គីភ័យចំនួន ១១៦២ គ្រឿង ឡានទឹកចំនួន២៣គ្រឿង នាវាដឹកយន្តហោះចំនួន៦គ្រឿង ឧទ្ធម្ភាគចក្រចំនួន៣១គ្រឿង និងគ្រឿងឈូសឆាយចំនួន៥៣គ្រឿង។

រដូវភ្លើងឆេះព្រៃនៅរដ្ឋកាលីហ្វ័រញ៉ាជាធម្មតាត្រូវបានគេកត់សម្គាល់ឃើញថា ចាប់ផ្តើមនៅខែមិថុនាឬខែកក្កដា ហើយដំណើរការឆេះរហូតដល់ខែតុលា។ នេះបើយោងតាមសមាគមអគី្គភ័យភាគខាងលិច (Western Fire Chiefs Association)។

យោងសេចក្តីរាយការណ៍របស់ wdsu ភ្លើងឆេះព្រៃនៅខែមករាក៏ធ្លាប់កើតមាននៅក្នុងពេលកន្លងមកដែរ គឺនៅឆ្នាំ២០២២ និងក្នុងឆ្នាំ២០២១ ដោយការដកស្រង់ពី CalFire៕