ព័ត៌មានអន្ដរជាតិ

មនុស្សយ៉ាងហោចណាស់ ១២នាក់ស្លាប់ក្នុងសោកនាដកម្ម ភ្លើងឆេះព្រៃនៅអេស្ប៉ាញ

បានផុស

១១ វិនាទី មុន

នៅ

ថ្ងៃសុក្រ ១០ កក្កដា ២០២៦

ដោយ

ទីភ្នាក់ងារសង្គ្រោះបន្ទាន់ Andalucía របស់ប្រទេសអេស្ប៉ាញ បានឱ្យដឹងនៅព្រឹកថ្ងៃសុក្រថា មានមនុស្សយ៉ាងហោចណាស់ ១២នាក់បានបាត់បង់ជីវិតក្នុងហេតុការណ៍ភ្លើងឆេះព្រៃមួយ នៅក្នុងទីក្រុង Almeria ភាគខាងត្បូងអេស្ប៉ាញ ដោយមានអ្នកពន្លត់អគ្គិភ័យ ១៥០នាក់ កំពុងធ្វើការ ដើម្បីពន្លត់ភ្លើង។ នេះបើយោងតាមទីភ្នាក់ងារសារព័ត៌មានរ៉យទ័រ ផ្សាយនៅថ្ងៃទី១០ ខែកក្កដា ឆ្នាំ២០២៦ ។

រដ្ឋមន្ត្រីក្រសួងសុខាភិបាលនិងសង្គ្រោះបន្ទាន់ លោក Antonio Sanz បានហៅអគ្គិភ័យនេះថា៖ « ជាអគ្គិភ័យដ៏សាហាវបំផុតរហូតមកដល់បច្ចុប្បន្នក្នុងតំបន់របស់យើង។ វាជាសោកនាដកម្មដែលមិនធ្លាប់មានពីមុនមក»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅមុននេះបន្តិច មានការរាយការណ៍អំពីចំនួនមនុស្ស ៦នាក់ ស្លាប់ដោយសារភ្លើងឆេះព្រៃ។

លោក Juanma Moreno ប្រធានតំបន់ Andalusia ភាគខាងត្បូងនៃប្រទេសអេស្ប៉ាញបានសរសេរសារមួយលើបណ្តាញសង្គម X ថា៖ « យើងសូមចូលរួមរំលែកទុក្ខយ៉ាងក្រៀមក្រំបំផុត ចំពោះក្រុមគ្រួសារនៃមនុស្សទាំង ៦នាក់ដែលបានបាត់បង់ជីវិតក្នុងភ្លើងឆេះព្រៃនៅក្រុង Los Gallardos »។

Los Gallardos គឺជាក្រុងមួយនៃខេត្ត Almería ក្នុងតំបន់ Andalusia ភាគខាងត្បូងនៃប្រទេសអេស្ប៉ាញ។

អគ្គិភ័យនេះបានកើតឡើង បន្ទាប់ពីភ្លើងឆេះព្រៃដែលឆេះហួសពីការគ្រប់គ្រងនៅភាគខាងត្បូងប្រទេសបារាំងកាលពីដើមសប្តាហ៍នេះ បង្ខំឱ្យមានការជម្លៀសមនុស្សជាង ១០ ០០០នាក់ មកពីទីក្រុងតូចៗ និងភូមិតូចៗចំនួន២៤ នៅជិតព្រំដែនអេស្ប៉ាញ។

រលកកម្តៅដើមរដូវក្តៅនៅទូទាំងអឺរ៉ុបខាងលិចក្នុងខែឧសភា និងខែមិថុនាបានធ្វើឱ្យដីស្រែចម្ការដ៏ធំល្វឹងល្វើយងាយរងគ្រោះថ្នាក់ ជាពិសេស ចំពោះភ្លើងឆេះព្រៃនៅឆ្នាំនេះ។

អង្គការឧតុនិយមពិភពលោកនិយាយថា ទ្វីបអឺរ៉ុបកំពុងឡើងកម្តៅខ្ពស់ជាងពីរដងនៃមធ្យមភាគសកល ធ្វើឱ្យកម្តៅអូសបន្លាយយូរ៕

សម្រួល៖ ណឺ មិនា