ព័ត៌មានអន្ដរជាតិ

លោក ត្រាំ ចង់ជួប ពូទីន ឲ្យបានលឿនក្រោយឡើងកាន់តំណែង

បានផុស

២ years មុន

នៅ

ថ្ងៃអង្គារ ១៤ មករា ២០២៥

ដោយ

Chheang

ប្រធានាធិបតីទើបជាប់ឆ្នោតរបស់សហរដ្ឋអាមេរិក លោក ដូណាល់ ត្រាំ បាននិយាយថា លោកគ្រោងនឹងជួបប្រធានាធិបតីរុស្ស៊ី លោក វ៉្លាឌឺមៀរ ពូទីន «យ៉ាងឆាប់រហ័ស» ដោយបន្ថែមថា មេដឹកនាំរុស្ស៊ីក៏ «ចង់ជួប» លោកវិញផងដែរ។

លោក ដូណាល់ ត្រាំ និងលោក វ៉្លាឌឺមៀរ ពូទីន (រូបភាព៖ Getty)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំបូងឡើយ លោក ត្រាំ ធ្លាប់បានប្រកាសក្នុងអំឡុងពេលយុទ្ធនាការបោះឆ្នោតថា លោកនឹងបញ្ចប់សង្រ្គាមរវាងរុស្ស៊ីនិងអ៊ុយក្រែនក្នុងរយៈពេលត្រឹម ២៤ម៉ោងប៉ុណ្ណោះ។ យ៉ាងណា ថ្មីៗនេះ លោក ត្រាំ បាននិយាយថា លោកត្រូវការពេលរហូតដល់ ៦ខែ ដើម្បីនាំភាគីទាំងពីរឈានទៅរកកិច្ចព្រមព្រៀង។

នៅក្នុងបទសម្ភាន៍ជាមួយសារព័ត៌មាន Newsmax កាលពីថ្ងៃចន្ទទី១៣ខែមករាឆ្នាំ២០២៥ លោក ត្រាំ បានបញ្ជាក់ថា លោក ពូទីន ក៏ចង់មានជំនួបនេះផងដែរ ខណៈដែលសង្រ្គាមរបស់រុស្ស៊ីមិនអាចដំណើរការបានរលូន។

លោក ត្រាំ បានលើកឡើងថា៖ «ខ្ញុំដឹងថា គាត់ចង់ជួប ហើយខ្ញុំនឹងជួប (គាត់) យ៉ាងឆាប់រហ័ស» ដោយបន្ថែមថា កិច្ចប្រជុំត្រូវតែធ្វើឡើង បន្ទាប់ពីលោកចូលកាន់តំណែងជាផ្លូវការ។ លោក ត្រាំ ក៏បានកត់សម្គាល់ផងដែរថា ប្រទេសអ៊ុយក្រែនកំពុងត្រូវបាន «បំផ្លាញ» ខណៈទាំងទាហានរុស្ស៊ី និងទាហានអ៊ុយក្រែន «កំពុងត្រូវបានគេសម្លាប់នៅក្នុងចំនួនដ៏ច្រើន»។

សូមបញ្ជាក់ថា វិមានក្រឹមឡាំងបានបង្ហាញពីឆន្ទៈរបស់លោក ពូទីន ក្នុងការជួបលោក ត្រាំ បន្ទាប់ពីលោកចូលកាន់តំណែង ទោះបីជាមិនមានកាលបរិច្ឆេទច្បាស់លាស់ណាមួយត្រូវបានកំណត់ក៏ដោយ។ ប្រទេសស្វីស និងស៊ែប៊ី បានប្រកាសថា ពួកគេបើកចំហរក្នុងការធ្វើជាម្ចាស់ផ្ទះនៃកិច្ចប្រជុំដោយផ្ទាល់រវាងមេដឹកនាំទាំងពីរ។

ការលុកលុយរបស់រុស្ស៊ីលើអ៊ុយក្រែន បានធ្វើឲ្យមនុស្សរាប់ម៉ឺននាក់ស្លាប់ ជម្លៀសខ្លួនមនុស្សរាប់លាននាក់ និងបង្កឲ្យមានការប្រេះឆាទំនាក់ទំនងរវាងទីក្រុងមូស្គូ និងលោកខាងលិច ចាប់តាំងពីវិបត្តិមីស៊ីលគុយបាឆ្នាំ១៩៦២៕

ដោយ៖ ឈាង

ចុចអាន៖ មិនមែន២៤ម៉ោងទេ! ឥឡូវលោក ត្រាំ ថា ត្រូវការពេល៦ខែ ដើម្បីបញ្ចប់សង្គ្រាម រុស្ស៊ី-អ៊ុយក្រែន