អ៊ុយក្រែន វាយប្រហារឃ្លាំងក្រុមហ៊ុនលក់ទំនិញអនឡាញដ៏ធំ របស់រុស្ស៊ី បង្កជាអគ្គិភ័យ ស្លាប់ទាំងមនុស្ស

អ៊ុយក្រែន ​នៅតែបង្កើនការវាយប្រហារលើរុស្ស៊ី ឥតឈប់និងខ្លាំងទៅៗ ដោយចុងក្រោយនេះ កងកម្លាំងរបស់លោក វ៉ូឡូឌីមៀរ ហ្សេលេនស្គី បានបញ្ជូនដ្រូនទៅបុកបំផ្ទុះឃ្លាំងរបស់ក្រុមហ៊ុនលក់ទំនិញអនឡាញដ៏ធំរបស់រុស្ស៊ី ជាថ្មីម្តងទៀត បង្កការអគ្គិភ័យឆាបឆេះយ៉ាងសន្ធោសន្ធៅ។

តាមការផ្សាយរបស់ RT, ដ្រូនអ៊ុយក្រែន បានវាយប្រហារឃ្លាំងក្រុមហ៊ុន Wildberries ២កន្លែង កាលពីថ្ងៃពុធ ទី២២ ខែកក្កដា ឆ្នាំ២០២៦ ដែលមួយកន្លែងស្ថិតក្នុងទីក្រុង Krasnodar និងមួយទៀតនៅ Nevinnomyssk នៃតំបន់ Stavropol បណ្តាលឲ្យបុគ្គលិកម្នាក់ស្លាប់ និងច្រើននាក់ទៀត រងរបួស។

មិនមែនតែឃ្លាំងទេ! បំណែកដ្រូនអ៊ុយក្រែន ក៏ធ្លាក់ត្រូវអាផាតមិន ២កន្លែងផងដែរ ក្នុងទីក្រុង Krasnodar និងផ្ទះពលរដ្ឋ ២ខ្នងទៀតនៅ Dinskaya ប៉ុន្តែមិនមានមនុស្សស្លាប់ និងរបួសឡើយ។

សូមជម្រាបថា Wildberries គឺជាក្រុមហ៊ុនលក់រាយតាមអនឡាញ ធំជាងគេបង្អស់នៅក្នុងប្រទេសរុស្ស៊ី។ ក្រុមហ៊ុននេះពេញនិយមខ្លាំងណាស់ រហូតដល់ត្រូវបានគេប្រៀបប្រដូចទៅនឹង Amazon របស់សហរដ្ឋអាមេរិក។

ក្រុមហ៊ុននេះ ត្រូវបានបង្កើតឡើងក្នុងឆ្នាំ ២០០៤ ដោយអ្នកស្រី Tatyana Kim ដែលដំបូងឡើយ វាជាអាជីវកម្មខ្នាតតូច ដំណើរការចេញពីផ្ទះល្វែងរបស់គាត់ ដោយចាប់ផ្តើមពីការទិញ និងលក់បន្តនូវសម្លៀកបំពាក់នារី ពីកាតាឡុកអឺរ៉ុប រហូតដល់ជោគជ័យ ក្លាយជាក្រុមហ៊ុនយក្ស។

នេះមិនមែនទើបលើកដំបូងឡើយ ដែលក្រុមហ៊ុន Wildberries រងការវាយប្រហារពីសំណាក់ដ្រូនអ៊ុយក្រែន។ ពោលគឺកាលពីថ្ងៃទី១៨ ខែកក្កដា ដ្រូនអ៊ុយក្រែន ក៏ហោះបុកបំផ្ទុះឃ្លាំងចំនួនពីរ ផងដែរ រួមមាននៅក្នុងក្រុង Kotovsk នៃតំបន់ Tambov និងក្រុង Elektrostal នៃតំបន់មូស្គូ។

ការវាយប្រហារ បានបណ្តាលឲ្យកម្មករឃ្លាំង ៨នាក់ស្លាប់ និងមនុស្សជាង ៦០ នាក់ផ្សេងទៀត រងរបួស៕

អត្ថបទ៖ សុវណ្ណ