ព័ត៌មានអន្ដរជាតិ

វៀតណាម បំបែកសម្បុកក្រុមលាងលុយកខ្វក់ ក្នុងទំហំទឹកប្រាក់ ១,២ពាន់លានដុល្លារ

បានផុស

២ ខែ មុន

នៅ

ថ្ងៃព្រហស្បតិ៍ ២៣ មករា ២០២៥

ដោយ

Chheang

ប៉ូលិសវៀតណាម បានចាប់ខ្លួនមនុស្ស ៥នាក់ និងបំបែកក្រុមលាងលុយកខ្វក់ពីបរទេស ក្នុងទំហំទឹកប្រាក់ចំនួន ១,២ពាន់លានដុល្លារ។ នេះបើយោងតាមការចុះផ្សាយរបស់ទីភ្នាក់ងារព័ត៌មាន AFP នៅថ្ងៃទី២៣ខែមករាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចន្លោះឆ្នាំ២០២២ និងឆ្នាំ២០២៤ សមាជិកក្រុមនេះ ដែលមានទាំងបុគ្គលិកធនាគារម្នាក់ បានក្លែងបន្លំអត្តសញ្ញាណប័ណ្ណ និងត្រាធនាគារ ដើម្បីបង្កើតអាជីវកម្មចំនួន១៨៧ ដោយបើកគណនីធនាគារសម្រាប់សាជីវកម្មជាង ៦០០គណនី។

ប៉ូលិសវៀតណាម បានចេញសេចក្តីថ្លែងការណ៍មួយកាលពីថ្ងៃពុធទី២២មករាថា គណនីទាំងនោះត្រូវបានប្រើប្រាស់ ដើម្បីផ្ទេរ និងធ្វើឲ្យស្របច្បាប់នូវទឹកប្រាក់ដែលទទួលបានតាមរយៈការក្លែងបន្លំ ឬការលេងល្បែងនៅក្រៅប្រទេស ដោយបន្ថែមថា ប្រតិបត្តិការសរុបមានចំនួនប្រហែល ១,២ពាន់លានដុល្លារ។

ការចាប់ខ្លួន ត្រូវបានធ្វើឡើងនៅក្នុងទីក្រុង Danang ជាកន្លែងដែលប៉ូលិសបាននិយាយថា វាជាករណីលាងលុយកខ្វក់ដ៏ធំបំផុតមិនធ្លាប់មាន។

នៅក្នុងការបង្ក្រាប ប៉ូលិសបានរឹបអូសត្រាក្លែងក្លាយចំនួន ១២២ត្រា និងច្បាប់ចម្លងដើមនៃវិញ្ញាបនបត្រចុះបញ្ជីអាជីវកម្មចំនួន ៤០។

គួររំឮកថា កាលពីខែតុលាឆ្នាំ២០២៤ មហាសេដ្ឋីអចលនទ្រព្យវៀតណាម លោកស្រី Truong My Lan ត្រូវបានកាត់ទោសឲ្យជាប់ពន្ធនាគារអស់មួយជីវិតពីបទលាងលុយកខ្វក់ បើទោះជាលោកស្រីកំពុងប្តឹងឧទ្ធរណ៍ចំពោះសាលក្រមក្តីនេះក៏ដោយ។ ទន្ទឹមនោះ សេដ្ឋីនីរូបនេះ ក៏ត្រូវបានតុលាការកាត់ទោសប្រហារជីវិតផងដែរសម្រាប់ការក្លែងបន្លំប្រាក់សរុបចំនួន ២៧ពាន់លានដុល្លារនៅក្នុងករណីដាច់ដោយឡែកមួយផ្សេងទៀត៕

ដោយ៖ ឈាង

Related Topics:ប្រទេសវៀតណាម