ព័ត៌មានអន្ដរជាតិ

៤ថ្ងៃទៀត ទំនងដឹងច្បាស់ថា ដំណើរការចរចារឿងសង្គ្រាមនៅអ៊ុយក្រែន

បានផុស

១ year មុន

នៅ

ថ្ងៃចន្ទ ១០ កុម្ភៈ ២០២៥

ដោយ

៤ថ្ងៃទៀតទំនងនឹងដឹងកាន់តែច្បាស់អំពីដំណើរការចរចាបទឈប់បាញ់និងឈានទៅចរចាសន្តិភាពអ៊ុយក្រែនទាំងស្រុង បន្ទាប់ពីថ្នាក់ដឹកនាំកំពូលអ៊ុយក្រែននិងសហរដ្ឋអាមេរិកកំណត់ពេលជួបនិយាយគ្នាលើកដំបូងនៅទីក្រុងមុយនិកក្នុងប្រទេសអាល្លឺម៉ង់ ជាទីដែលបេសកជនរបស់លោក ដូណាល់ ត្រាំ សម្រាប់អ៊ុយក្រែននិងរុស្ស៊ីក៏នឹងចូលរួមដែរ។

អនុប្រធានាធិបតីសហរដ្ឋអាមេរិក លោក JD Vance (ឆ្វេង) និងប្រធានាធិបតីអ៊ុយក្រែន លោក វ៉ុលឌីមៀរ ហ្សេលេនស្គី។ Kyiv Post

ចន្លោះថ្ងៃទី១៤ដល់ថ្ងៃទី១៦ខែកុម្ភៈនេះ ប្រទេសអាល្លឺម៉ង់នឹងរៀបចំសន្និសីទសន្តិសុខប្រចាំឆ្នាំនៅទីក្រុងមុយនិក ដោយមានប្រមុខរដ្ឋជាច្រើនប្រទេស ជាពិសេសវត្តមានរបស់អនុប្រធានាធិបតីសហរដ្ឋអាមេរិក លោក JD Vance និងប្រធានាធិបតីអ៊ុយក្រែន លោក វ៉ុលឌីមៀរ ហ្សេលេនស្គី (Volodymyr Zelenskyy) ទៅចូលរួម ដោយភាគីទាំងពីរក៏បានកំណត់ជំនួបទ្វេភាគីដ៏សំខាន់នេះដែរ។

មានសេចក្តីរាយការណ៍មួយចំនួនធ្លាប់បានលើកឡើងថា លោក Keith Kellogg បេសកជនពិសេសរបស់ប្រធានាធិបតី ដូណាល់ ត្រាំ នឹងធ្វើបទបង្ហាញជាសាធារណៈលើកដំបូងអំពីដំណើរការចរចារវាងអ៊ុយក្រែននិងរុស្ស៊ី នៅសន្និសីទ ប៉ុន្តែក្រោយមកក៏ត្រូវបានបដិសេធវិញ។

ដូចដែលបានរាយការណ៍មក ប្រធានាធិបតីអ៊ុយក្រែនលោក លោក វ៉ុលឌីមៀរ ហ្សេលេនស្គី នឹងដឹកនាំគណៈប្រតិភូអ៊ុយក្រែនទៅកាន់សន្និសិទសន្តិសុខទីក្រុង Munich ជាទីដែលភាគីអ៊ុយក្រែននឹងបង្ហាញពីជំហររបស់ប្រទេសក្នុងការបញ្ចប់សង្រ្គាម និងចក្ខុវិស័យរបស់ខ្លួនអំពីរបៀបដើម្បីសម្រេចបាន «សន្តិភាពយូរអង្វែង និងនិរន្តរភាព» លោក Andriy Yermak ប្រធានការិយាល័យប្រធានាធិបតីអ៊ុយក្រែនបាននិយាយ។

មុននេះ បេសកជនពិសេសរបស់ប្រធានាធិបតីអាមេរិក Donald Trump ទទួលបន្ទុកអ៊ុយក្រែន និងរុស្ស៊ី លោក Keith Kellogg បាននិយាយថា លោកនឹងចូលរួមក្នុងសន្និសីទសន្តិសុខនៅទីក្រុង Munich ដែលលោកនឹងនិយាយអំពីការបញ្ចប់សង្គ្រាមរុស្ស៊ី-អ៊ុយក្រែន។

លោក Keith Kellogg ក៏ត្រូវបានគេរំពឹងថានឹងធ្វើទស្សនកិច្ចនៅទីក្រុងកៀវនៅខែកុម្ភៈនេះ បន្ទាប់ពីសន្និសីទសន្តិសុខទីក្រុងមុយនិក។

លោក Keith Kellogg បេសកជនពិសេសរបស់លោកត្រាំសម្រាប់ដំណើរការចរចា អ៊ុយក្រែននិងរុស្ស៊ី។ REUTERS

រយៈពេល២ថ្ងៃចុងក្រោយនេះ មានការផ្សព្វផ្សាយដ៏គួរឲ្យចាប់អារម្មណ៍អំពីការបែកធ្លាយឯកសារចរចា ដែលបានដាក់ពេលវេលាជាក់លាក់ក្នុងការបញ្ចប់សង្គ្រាមនៅអ៊ុយក្រែន ដោយនៅក្នុងនោះរួមមានទាំងការយល់ព្រមកាត់ដីអ៊ុយក្រែនដែលរុស្ស៊ីកាន់កាប់ទៅឲ្យភាគីរុស្ស៊ី ការគាំទ្រអ៊ុយក្រែនស្តារសេដ្ឋកិច្ចឡើងវិញ ការកំណត់ឲ្យអ៊ុយក្រែនចូលសហភាពអឺរ៉ុប ជាដើម។

យោងតាមសារព័ត៌មានអង់គ្លេស The Daily Mail ដែលបានដកស្រង់ផ្សាយបន្តពីសារព័ត៌មាន Strana របស់អ៊ុយក្រែន ឯកសារដែលបែកធ្លាយក្នុងដំណើរការចរចាសន្តិភាពក្រោមរដ្ឋបាល លោក ដូណាល់ ត្រាំ នេះ មានការកំណត់ជាក់លាក់ពីការអនុវត្តបទឈប់បាញ់នៅថ្ងៃទី២០ខែមេសាឆ្នាំ២០២៥ និងការហាមប្រាមអ៊ុយក្រែនចូលអង្គការណាតូជាដើម។

តាមរយៈការចុះផ្សាយនោះ ថ្ងៃទី៩ខែឧសភា ឆ្នាំ២០២៥ គឺជាថ្ងៃប្រកាសបញ្ចប់សង្គ្រាមជាស្ថាពររវាងរុស្ស៊ី និងអ៊ុយក្រែន។ ផែនការស្តារអ៊ុយក្រែនឡើងវិញ ត្រូវបានដាក់ទឹកប្រាក់ចំនួន៤៨៦ពាន់លានដុល្លារសហរដ្ឋអាមេរិក សម្រាប់រយៈពេល១០ឆ្នាំ។

ទោះបីជាបែបណាក៏ដោយ បន្ទាប់ពីបែកធ្លាយឯកសារទាំងនោះ ភាគីរុស្សីនិងអ៊ុយក្រែនមិនទាន់ប្រកាសទទួលស្គាល់ថា ពួកគេបានចូលរួមក្នុងការចរចាសម្ងាត់ក្នុងពេលកន្លងមកនោះទេ ដោយភាគីរុស្ស៊ីដែលជាសត្រូវប្រជែងឥទ្ធិពលជាមួយសហរដ្ឋអាមេរិកនោះ ចាត់ទុកថា សហរដ្ឋអាមេរិកមិនទាន់បានកំណត់រូបមន្តសម្រាប់ការចរចានោះទេ។

កន្លងមកនេះក៏មានសេណារីយ៉ូច្រើនក្នុងការចរចាដើម្បីបញ្ចប់សង្គ្រាមអ៊ុយក្រែន ដោយមានទាំងការចរចាទ្វេភាគី រវាងសហរដ្ឋអាមេរិកនិងរុស្ស៊ី ការចរចាត្រីភាគី ដោយបូករួមនឹងអ៊ុយក្រែន និងការចរចាចតុភាគី ដោយបួកសហភាពអឺរ៉ុបមួយទៀត ដើម្បីធានាដល់សន្តិភាពយូរអង្វែងសម្រាប់អ៊ុយក្រែន៕

ដោយ រ៉ាន់ រើយ