ព័ត៌មានអន្ដរជាតិ

ត្រាំ គំរាមហាម៉ាសឲ្យដោះលែងចំណាប់ខ្មាំងទាំងអស់ត្រឹមថ្ងៃសៅរ៍ បើមិនដូច្នោះលុបបទឈប់បាញ់ រួចវាយកម្ទេចក្រុមនេះតែម្ដង

បានផុស

១ year មុន

នៅ

ថ្ងៃអង្គារ ១១ កុម្ភៈ ២០២៥

ដោយ

Chheang

ក្រុមហាម៉ាស គួរតែដោះលែងចំណាប់ខ្មាំងទាំងអស់នៅហ្គាហ្សា នៅត្រឹមថ្ងៃត្រង់ថ្ងៃសៅរិ៍សប្ដាហ៍នេះ បើមិនដូច្នោះទេនឹងមានការលុបចោលបទឈប់បាញ់រវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីន រួចការវាយប្រហារនឹងផ្ទុះឡើងតែម្ដង។ នេះជាសារព្រមានមិនសំចៃមាត់របស់ប្រធានាធិបតីអាមេរិក លោក ដូណាល់ ត្រាំ កាលពីថ្ងៃចន្ទទី១០ខែកុម្ភៈឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បានសម្តែងការខកចិត្តចំពោះលក្ខខណ្ឌនៃការដោះលែងក្រុមចំណាប់ខ្មាំងចុងក្រោយរបស់ក្រុមហាម៉ាស និងការប្រកាសដោយក្រុមសកម្មប្រយុទ្ធនេះថា ខ្លួននឹងផ្អាកការដោះលែងចំណាប់ខ្មាំងបន្ថែមទៀត។

លោក ត្រាំ បាននិយាយថា៖ «តាមដែលខ្ញុំបារម្ភ បើចំណាប់ខ្មាំងទាំងអស់មិនត្រូវបានត្រឡប់មកវិញនៅថ្ងៃសៅរ៍នៅម៉ោង១២ថ្ងៃត្រង់ ខ្ញុំគិតថាវាជាពេលវេលាសមស្រប។ ខ្ញុំនឹងនិយាយថា លុបចោលវា ហើយការភ្នាល់ទាំងអស់ត្រូវបានបិទ ហើយទុកឲ្យសង្គ្រាមផ្ទុះឡើង។ ខ្ញុំចង់និយាយថា ពួកគេគួរតែត្រឡប់មកវិញនៅម៉ោង១២នៅថ្ងៃសៅរ៍»។

មេដឹកនាំវ័យ៧៨ឆ្នាំ បានបន្ថែមថា លោកចង់ឲ្យមានការដោះលែងចំណាប់ខ្មាំងទ្រង់ទ្រាយធំ មិនមែនដោះលែងម្ដងពីរបីនាក់នោះឡើយ។

លោក ត្រាំ បានសង្កត់ធ្ងន់ថា ប្រទេសអ៊ីស្រាអែលអាចនឹងមិនយល់ស្របចំពោះចំណាត់ការមួយនេះ ប៉ុន្តែលោកបានបញ្ជាក់ថា លោកនឹងអាចជជែកជាមួយនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បន្ថែមអំពីរឿងនេះ។

លោក ត្រាំ ក៏បានប្រាប់ដែរថា លោកអាចនឹងរារាំងជំនួយដល់ប្រទេសហ្ស៊កដានី និងអេហ្ស៊ីប បើពួកគេមិនព្រមទទួលយកជនភៀសខ្លួនប៉ាឡេស្ទីនដែលត្រូវបានផ្លាស់ប្តូរទីលំនៅពីតំបន់ហ្គាហ្សា។ លោក ត្រាំ នឹងជួបជាមួយស្តេច Abdullah នៃប្រទេសហ្ស៊កដានី នៅថ្ងៃអង្គារនេះ៕