ព័ត៌មានអន្ដរជាតិ

លោក ត្រាំ ចង់តែងតាំង ប្រធាន FIFA ជាប្រមុខ UN សម្រាប់អាណត្តិបន្ទាប់ ចាប់ពីដើមឆ្នាំក្រោយ

បានផុស

១៣ នាទី មុន

នៅ

ថ្ងៃពុធ ២២ កក្កដា ២០២៦

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ លើកឡើងថា ខ្លួនចង់ឱ្យប្រធាន FIFA លោក Gianni Infantino ក្លាយជាអគ្គលេខាធិការបន្ទាប់ របស់អង្គការសហប្រជាជាតិ(UN)។ នេះបើយោងតាមការចុះផ្សាយរបស់កាសែត New York Post កាលពីថ្ងៃអង្គារ ទី២១ ខែកក្កដា ឆ្នាំ ២០២៦ ។

ប្រភពជិតស្និទ្ធរបស់រដ្ឋបាលអាមេរិក ត្រូវបានស្រង់សម្តីដូចនិយាយថា៖ « ប្រធានាធិបតីជឿជាក់ថា លោក Infantino ទទួលបានការគោរពដោយមនុស្សគ្រប់គ្នានៅជុំវិញពិភពលោក ហើយទទួលស្គាល់ថា លោកមានសមត្ថភាពពិសេសក្នុងការនាំមនុស្សមកជួបជុំគ្នា»។

ប្រធាន FIFA, លោក ត្រាំ និងមេដឹកនាំម៉ិកស៊ិក ក្នុងព្រិត្តិការណ៍ FIFA។ រូបភាព៖ AA

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Infantino អាយុ ៥៦ ឆ្នាំ បានបង្កើតទំនាក់ទំនងជិតស្និទ្ធជាមួយ លោក ត្រាំ អំឡុងពេលព្រឹត្តិការណ៍បាល់ទាត់ពិភពលោកឆ្នាំនេះ ដោយប្រធាន FIFA ជាអ្នកកើតនៅប្រទេសស្វីស បានខិតខំប្រឹងប្រែងម្តងហើយម្តងទៀត ដើម្បីបង្កើនភាពជិតស្និទ្ធិជាមួយមេដឹកនាំអាមេរិក រួមទាំងការប្រគល់រង្វាន់សន្តិភាពដំបូងរបស់ FIFA ដល់លោក ត្រាំ នៅក្នុងខែធ្នូ ឆ្នាំ២០២៣ ទៀតផង។

គួរបញ្ជាក់ថា អ្នកស្នងតំណែងរបស់ លោក Antonio Guterres ប្រធានអង្គការសហប្រជាជាតិបច្ចុប្បន្ន នឹងបម្រើការងាររយៈពេល ៥ឆ្នាំ ដោយចាប់ផ្តើមពីថ្ងៃទី០១ ខែមករា ឆ្នាំ ២០២៧។

យោងតាមមាត្រា៩៧ នៃធម្មនុញ្ញអង្គការសហប្រជាជាតិ អគ្គលេខាធិការត្រូវបានតែងតាំងដោយមហាសន្និបាតតាមអនុសាសន៍របស់ក្រុមប្រឹក្សាសន្តិសុខ។

ដើម្បីទទួលបានតំណែងនេះ លោក Infantino ត្រូវការការគាំទ្រពីក្រុមប្រឹក្សាសន្តិសុខដែលមានសមាជិក ១៥រូបជាមុនសិន ដែលសមាជិកអចិន្ត្រៃយ៍ទាំង ៥រូបអាចប្រើសិទ្ធិ មុនពេលទទួលបានការយល់ព្រមពីមហាសន្និបាត។

លោក ត្រាំ បានរិះគន់ម្តងហើយម្តងទៀត ចំពោះការបរាជ័យរបស់អង្គការសហប្រជាជាតិក្នុងការដើរតួនាទីយ៉ាងសកម្មក្នុងការដោះស្រាយជម្លោះសកលធំៗ។

ចាប់តាំងពីវិលត្រឡប់ទៅកាន់សេតវិមានវិញកាលពីឆ្នាំមុន លោក ត្រាំ បានកាត់បន្ថយមូលនិធិរបស់សហរដ្ឋអាមេរិកសម្រាប់អង្គការសហប្រជាជាតិយ៉ាងច្រើន ថែមទាំងដកសហរដ្ឋអាមេរិកចេញពីអង្គការជាច្រើនដែលជាប់ពាក់ព័ន្ធជាមួយអង្គការសហប្រជាជាតិ រួមទាំងអង្គការសុខភាពពិភពលោក (WHO) ផងដែរ៕