អង់គ្លេស ត្រៀមបញ្ជូនទ័ពទៅ អ៊ុយក្រែន

ក្នុងអត្ថបទដែលចុះផ្សាយនៅកាសែត Telegraph កាលពីថ្ងៃអាទិត្យទី១៦ខែកុម្ភៈឆ្នាំ២០២៥ នាយករដ្ឋមន្ត្រីអង់គ្លេសលោក Keir Starmer បានបង្ហាញពីជំហរនិងប្រកាសត្រៀមខ្លួនរួចជាស្រេច ក្នុងការបញ្ជូនកងទ័ពទៅប្រទេសអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះគឺជាសេចក្តីប្រកាសយ៉ាងភ្ញាក់ផ្អើល ប៉ុន្តែយ៉ាងណាលោកបញ្ជាក់ថា កងទ័ពទាំងនោះគឺដើម្បីធានាសន្តិសុខ និងជាផ្នែកមួយនៃកងរក្សាសន្តិភាព ប្រសិនបើរុស្ស៊ី-អ៊ុយក្រែន ឈានដល់បទឈប់បាញ់។

លោកសរសេរថា «វាពិតជាពិបាកទទួលយកដែលខ្ញុំត្រូវទទួលត្រូវក្នុងការដាក់ទ័ពអង់គ្លេស នៅលើផ្លូវដ៏គ្រោះថ្នាក់ ប៉ុន្តែតួនាទីណាមួយក្នុងការជួយធានាសន្តិសុខរបស់អ៊ុយក្រែន គឺដូចជាការជួយធានាសន្តិសុខនៃទ្វីបរបស់យើង និងសន្តិសុខរបស់ប្រទេសនេះផងដែរ»។

នេះគឺ​ជា​លើក​ដំបូងហើយ ​ដែល​​នាយក​រដ្ឋមន្ត្រី​អង់គ្លេស ​បញ្ជាក់​យ៉ាង​ច្បាស់ៗ​អំពីបំណង​ដាក់​ពង្រាយ​កង​រក្សា​សន្តិភាពទៅ​អ៊ុយក្រែន ហើយសេចក្តីប្រកាសនេះ ​កើត​ឡើង​​មុន​កិច្ច​ពិភាក្សា​បន្ទាន់​ជាមួយ​មេដឹកនាំ​អឺរ៉ុប​នៅ​ទីក្រុង​ប៉ារីស។

ទន្ទឹមនោះ តំណាងអាមេរិកនិងរុស្ស៊ី ក៏នឹងជួបចរចាគ្នាផងដែរនៅប្រទេសអារ៉ាប៊ីសាអូឌីត សម្រាប់រកដំណោះស្រាយបំបែកភាពទាល់ច្រក ឈានឆ្ពោះទៅរកកិច្ចព្រមព្រៀងសន្តិភាពក្នុងសង្គ្រាមអ៊ុយក្រែន។ យ៉ាងណាជុំវិញរឿង ប្រភពមួយនៅអ៊ុយក្រែនបានប្រាប់ BBC ថា ទីក្រុងកៀវ នឹងមិនត្រូវបានអញ្ជើញឲ្យចូលរួមក្នុងជំនួបនេះឡើយ។

សូមជម្រាបជាថ្មី មេដឹកនាំអ៊ុយក្រែន លោក វ្ល៉ាឌីមៀរ ហ្សេលេនស្គី ធ្លាប់លើកឡើងកាលពីខែមករាថា ទីក្រុងកៀវ ត្រូវការទាហានអ៊ឺរ៉ុប យ៉ាងតិច ២០០ ០០០ នាក់ ធ្វើជាអ្នករក្សាសន្តិភាព ដើម្បីអនុវត្តកិច្ចព្រមព្រៀងដ៏មានសក្តានុពលណាមួយជាមួយរុស្ស៊ី។

ទោះបីជាយ៉ាងណាក៏ដោយ អ្នកវិភាគនៅកាសែត New York Times នាពេលថ្មីៗនេះ ចាត់ទុកថា តួលេខនេះគឺច្រើនពេកហើយ កុំថាឡើយ ២០ម៉ឺននាក់ សូម្បី ៤ម៉ឺននាក់ក៏ប្រហែលជាជួបបញ្ហាប្រឈមដែរ៕

អត្ថបទ៖ សុខ សុវណ្ណ

ចុចអាន៖ មន្ត្រី​សំខាន់ៗ​របស់​​ពូទីន​ចេញ​ទៅ​អារ៉ាប៊ី សាអូឌីត​ ក្នុងបុព្វហេតុ​​ជំនួប​កំពូល «ត្រាំ-ពូទីន»