ធ្លាក់យន្តហោះយោធានៅស៊ូដង់សម្លាប់​យោធា​​និង​ជនស៊ីវិល ៤៦នាក់

ធ្លាក់យន្តហោះយោធាស៊ូដង់នៅ​តំបន់​​​ប្រជុំ​ជន​​ Omdurman ជាយរដ្ឋធានី​ ខាទុំ​ (Khartoum) ​បាន​បណ្តាល​ឲ្យ​​​មាន​មនុស្ស​ស្លាប់​​កើនឡើងដល់៤៦នាក់​។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី២៧ខែកុម្ភៈនេះ។

យន្តហោះ Antonov បានធ្លាក់កាលពីយប់ថ្ងៃអង្គារ អំឡុងពេលហោះចេញពីអាកាសយានដ្ឋានយោធា Wadi Seidna បន្ទាប់មកបានធ្លាក់​​​​ចំ​ពី​លើផ្ទះជនស៊ីវិលនៅក្នុងស្រុក Karrari របស់​តំបន់​ Omdurman។

ក្រសួងសុខាភិបាល​ស៊ូដង់​ ដំបូងបានរាយការណ៍​មានមនុស្សស្លាប់១៩នាក់ប៉ុណ្ណោះ ដោយក្នុងចំណោមអ្នកស្លាប់ក៏មានលោកឧត្តមសេនីយ៍ Bahr Ahmed ដែលជាមេបញ្ជាការជាន់ខ្ពស់នៅទីក្រុងខាទុំ​ និងយ៉ាងហោចណាស់មានមនុស្ស​១០នាក់​ផ្សេងទៀតបានរងរបួស។ លើសពីនេះការផ្ទុះពីការធ្លាក់យន្តហោះបានបំផ្លាញផ្ទះ​ប្រជាជន​ជាច្រើនខ្នង និងបណ្តាលឱ្យដាច់ចរន្តអគ្គិសនីនៅក្នុងសង្កាត់ក្បែរនោះ។

យោធាស៊ូដង់បានបញ្ជាក់ពីការធ្លាក់យន្តហោះនេះនៅក្នុងសេចក្តីថ្លែងការណ៍មួយថា ទាំងបុគ្គលិកយោធា និងជនស៊ីវិលត្រូវបានសម្លាប់ តែមិនបានបញ្ជាក់ពីមូលហេតុនៃការធ្លាក់យន្តហោះនោះទេ។ ​ទោះ​បី​យ៉ាងណា បើតាមប្រភពយោធា បានប្រាប់ទីភ្នាក់ងារព័ត៌មាន Reuters ថា ការធ្លាក់យន្តហោះនេះទំនងជាបណ្ដាលមកពីបញ្ហាបច្ចេកទេស។

គួរបញ្ជាក់ថា ឧប្បត្តិហេតុនេះកើតឡើងនៅពេលដែលប្រទេសស៊ូដង់នៅតែជាប់​​​ផុត​នៅក្នុងជម្លោះដ៏ឃោរឃៅរវាងយោធានិង​កងកម្លាំងគាំទ្ររហ័ស (RSF) ដែលបានផ្ទុះឡើងក្នុងខែមេសាឆ្នាំ២០២៣។

សង្រ្គាមស៊ីវិល​នេះបានសម្លាប់មនុស្សរាប់ម៉ឺននាក់រួច​ទៅ​ហើយ ដោយ​បានចាប់ផ្តើមបន្ទាប់ពីការបែកបាក់រវាងមេទ័ព Abdel Fattah al-Burhan និងមេបញ្ជាការ RSF លោក Mohamed Hamdan Daglo ជុំវិញរចនាសម្ព័ន្ធអនាគតរបស់រដ្ឋាភិបាល។ បច្ចុប្បន្ន យោធាកំពុងបង្ក្រាបប្រឆាំងនឹង RSF នៅ​ភាគកណ្តាលប្រទេស​ស៊ូដង់ និង​រដ្ឋធានី ខាទុំ​៕

អត្ថបទ៖ ប៊ុន សុភាព