កូរ៉េ​ខាង​ជើង សម្ដែង​ការ​មិន​ពេញ​ចិត្ត​នឹង​សមយុទ្ធ​រួម​គ្នា​រវាង​អាមេរិក និង​កូរ៉េ​ខាង​ត្បូង

កូរ៉េខាងជើង នៅ​ថ្ងៃ​សុក្រ​ទី​៧​ខែ​មីនា​នេះ បានថ្កោលទោសសមយុទ្ធយោធារួមគ្នានាពេលខាងមុខរវាងសហរដ្ឋអាមេរិក និងកូរ៉េខាងត្បូង ដែលគេស្គាល់ថា​សមយុទ្ធ Freedom Shield ដែលគ្រោងធ្វើចាប់ពីថ្ងៃទី​១០​ដល់ថ្ងៃទី​២០​ខែមីនា​ឆ្នាំ​២០២៥។

ប្រព័ន្ធផ្សព្វផ្សាយរដ្ឋកូរ៉េខាងជើង KCNA រាយការណ៍ថា សមយុទ្ធទាំងនេះត្រូវបានគេរំពឹងថានឹងបង្កើនភាពតានតឹងនៅលើឧបទ្វីបកូរ៉េ។ អគ្គសេនាធិការចម្រុះរបស់ទីក្រុងសេអ៊ូល ពណ៌នាសមយុទ្ធនេះថាជាវិធានការ ដើម្បីបង្កើនការត្រៀមខ្លួនប្រឆាំងនឹងការគំរាមកំហែងដែលអាចកើតមានពីកូរ៉េខាងជើង។

KCNA ​បាន​សង្កត់​ធ្ងន់​ថា​៖ «​យើង​បាន​បញ្ជាក់​ច្បាស់​រួច​ហើយ​ថា បើ​​អាមេរិក​បន្ត​ធ្វើ​បាតុកម្ម​យោធា​ជាថ្មី នោះ​យើង​នឹង​គ្មាន​ជម្រើស​អ្វី​ក្រៅ​ពី​បន្ត​ការ​រារាំង​ជា​យុទ្ធសាស្ត្រ​ឡើយ​»​។

សូម​បញ្ជាក់​ថា កាល​ពី​ពេល​ថ្មីៗ លោកស្រី គីម យ៉ូជុង ដែលជាប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង​លោក គីម ជុងអ៊ុន បានគំរាមកំហែងនូវការឆ្លើយតបដ៏ខ្លាំង​ក្លា ចំពោះការដាក់ពង្រាយនាវាផ្ទុកយន្តហោះ​ចម្បាំង​អាមេរិក USS Carl Vinson នៅក្នុង​ទីក្រុង​ប៊ូសាន​នៃ​ប្រទេសកូរ៉េខាងត្បូង។ លោកស្រី​កំណត់លក្ខណៈសកម្មភាពយោធាបែបនេះថាជា«ភាពច្របូកច្របល់នៃការប្រឈមមុខដាក់គ្នា» ហើយព្រមានថា កូរ៉េខាងជើងអាចនឹងបង្កើនសមត្ថភាពទប់ស្កាត់នុយក្លេអ៊ែររបស់ខ្លួនក្នុងការសងសឹក។

កូរ៉េខាងជើង បានរិះគន់ជាប្រចាំនូវសមយុទ្ធយោធារួមគ្នារវាង​អាមេរិក និងកូរ៉េខាងត្បូង ដោយចាត់ទុកវាថាជាការហាត់សមសម្រាប់ការឈ្លានពាន និងការគំរាមកំហែងដោយផ្ទាល់ចំពោះអធិបតេយ្យភាពរបស់ខ្លួន។ ការបរិហារស្រដៀងគ្នានេះ ក៏​ធ្លាប់​ធ្វើ​ឡើង​ជា​រឿយៗ​សម្រាប់​សមយុទ្ធកន្លងមក ដូចជា សមយុទ្ធ Foal Eagle និង​សមយុទ្ធ Ulchi-Freedom Guardian ដោយកូរ៉េខាងជើងតែងតែព្រមានអំពីការកើនឡើងនៃយោធាជាការឆ្លើយតប៕

ដោយ៖ ឈាង