អតីត​ប្រធានាធិបតី​ហ្វីលីពីន លោក Duterte ត្រូវ​​បាន​ចាប់​ខ្លួន ពី​បទ​ឧក្រិដ្ឋកម្ម​ប្រឆាំង​មនុស្ស​ជាតិ

អតីតប្រធានាធិបតីហ្វីលីពីន លោក Rodrigo Duterte ត្រូវបានចាប់ខ្លួននៅអាកាសយានដ្ឋានអន្តរជាតិ Ninoy Aquino នៅ​ថ្ងៃអង្គារ​ទី១១​ខែមីនា​នេះ ជុំវិញដីកាដែលចេញដោយតុលាការឧក្រិដ្ឋកម្មអន្តរជាតិ (ICC)។

លោក Duterte បាន​ក្លាយជាប្រមុខរដ្ឋហ្វីលីពីនដំបូងគេដែលត្រូវបានចាប់ខ្លួនតាមរយៈដីការបស់តុលាការអន្តរជាតិ។ យោង​តាម​​ការ​ចុះ​ផ្សាយរបស់​សារព័ត៌មាន Rappler បច្ចុប្បន្ន លោក Duterte ​ត្រូវ​បាន​​ចាប់​ឃុំខ្លួន​រួច​ហើយ។

លោក Duterte ប្រឈមមុខនឹងសំណុំរឿងឧក្រិដ្ឋកម្មប្រឆាំងមនុស្សជាតិ នៅចំពោះមុខតុលាការអន្តរជាតិជុំវិញសង្គ្រាមគ្រឿងញៀនរបស់លោក ដែលបានសម្លាប់មនុស្សជិត ៣០ ០០០​នាក់។ នេះបើយោងតាមចំនួនសរុបដោយក្រុមសិទ្ធិមនុស្ស ប៉ុន្តែ​មាន​សេចក្តីរាយការណ៍ខ្លះ​បង្ហាញ​ថា សង្គ្រាម​ប្រឆាំងគ្រឿងញៀនរបស់​លោក គឺសម្លាប់​មនុស្ស​អស់​ជាង​​៦០០០​នាក់។

មុនពេលចាប់ខ្លួន អតីតប្រធានាធិបតីរូបនេះ ត្រូវបាន​ជូនដំណឹងជា​មុន​ដោយ​ប៉ូលិស Interpol បន្ទាប់ពីការចេញដីការបស់ ICC។

លោក Duterte គឺជាអ្នកនយោបាយ ដែលបានកាន់តំណែងជាប្រធានាធិបតីទី​១៦​នៃប្រទេសហ្វីលីពីន ពីឆ្នាំ​២០១៦ ដល់ឆ្នាំ២០២២។ មុនពេលលោកកាន់តំណែងជាប្រធានាធិបតី លោកជាអភិបាលក្រុង Davao អស់រយៈពេលជាង ២២​ឆ្នាំ ដែលត្រូវបានគេស្គាល់សម្រាប់ជំហរតឹងរ៉ឹងលើឧក្រិដ្ឋកម្ម និងសង្រ្គាមដ៏ចម្រូងចម្រាសរបស់គាត់ស្តីពីគ្រឿងញៀន​។

លោក Duterte កើតនៅថ្ងៃទី​២៨​ខែមីនា​ឆ្នាំ​១៩៤៥ នៅ​ទីក្រុង Maasin រដ្ឋ Leyte ហើយក្រោយមកបានផ្លាស់ទៅរស់នៅ​ក្រុង Davao ជាកន្លែងដែលអាជីពនយោបាយរបស់គាត់បានរីកចម្រើន។

ក្នុងនាមជាប្រធានាធិបតី លោក Duterte បានអនុវត្តគោលនយោបាយយ៉ាង​ម៉ឺងម៉ាត់ជា​ទីបំផុត រួមទាំងសង្គ្រាមប្រឆាំងគ្រឿងញៀន ដែលបានទាក់ទាញការរិះគន់ពីអន្តរជាតិចំពោះការរំលោភសិទ្ធិមនុស្ស។ លោកក៏បានបន្តគោលនយោបាយការបរទេសឯករាជ្យ ដោយពង្រឹងទំនាក់ទំនងជាមួយចិន និងរុស្ស៊ី ស្របពេលដែលហ្វីលីពីនឃ្លាតឆ្ងាយពីសហរដ្ឋ​អាមេរិក។

រដ្ឋបាលរបស់​លោក​បានផ្តោតលើការអភិវឌ្ឍ​ហេដ្ឋារចនាសម្ព័ន្ធក្រោមកម្មវិធី «កសាង កសាង កសាង (Build, Build, Build)» និងបានអនុម័តច្បាប់សំខាន់ៗ រួមទាំងការ​សិក្សានៅមហាវិទ្យាល័យដោយឥតគិតថ្លៃ និងការថែទាំសុខភាពជាសកល៕

ដោយ៖ ឈាង