ព័ត៌មានអន្ដរជាតិ

ចិន ប្រាប់ឲ្យអាមេរិកកុំភ្ជាប់ក្រុងប៉េកាំងទៅពាក់ព័ន្ធនឹងបញ្ហាព្រែកជីកប៉ាណាម៉ា

បានផុស

២ ខែ មុន

នៅ

ថ្ងៃព្រហស្បតិ៍ ១០ មេសា ២០២៥

ដោយ

Chheang

ប្រទេសចិន បានជំទាស់ខ្លាំងៗចំពោះការលើកឡើងនាពេលថ្មីៗនេះរបស់មន្ត្រីអាមេរិកទាក់ទងនឹងព្រែកជីកប៉ាណាម៉ា ដោយជំរុញឲ្យក្រុងវ៉ាស៊ីនតោនបញ្ឈប់ការផ្សព្វផ្សាយព័ត៌មានមិនពិត និងធ្វើការចោទប្រកាន់ដោយគ្មានមូលដ្ឋាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការឆ្លើយតបរបស់ក្រសួងការបរទេសចិន ធ្វើឡើងបន្ទាប់ពីការអត្ថាធិប្បាយរបស់រដ្ឋមន្ត្រីការពារជាតិអាមេរិក លោក Pete Hegseth ដែលបានបង្ហាញចេតនាចង់យកព្រែកប៉ាណាម៉ាមកគ្រប់គ្រងវិញពីអ្វីដែលលោកពណ៌នាថាជាឥទ្ធិពលរបស់ចិន។ លោក Hegseth បានព្រមានខ្លាំងៗថា ទីក្រុងវ៉ាស៊ីនតោន នឹងមិនអនុញ្ញាតឲ្យចិន មករញ៉េរញ៉ៃនៅព្រែកជីកប៉ាណាម៉ា បានឡើយ ខណៈលោកប្រកាសថា ព្រែកជីកនេះ ប្រឈមការគំរាមកំហែងមិនដាច់។ លោកបន្ថែមថា ក្រុមហ៊ុនរបស់ចិន កំពុងគ្រប់គ្រងកំពង់ផែនៅច្រកចូលទាំងពីរនៃព្រែកជីកប៉ាណាម៉ា។

ក្រសួងការបរទេសចិន និងស្ថានទូតចិនប្រចាំប្រទេសប៉ាណាម៉ា បានសង្កត់ធ្ងន់ថា សេចក្តីថ្លែងការណ៍បែបនេះគឺជាការមួលបង្កាច់ទាំងស្រុង ក្នុងគោលបំណងជំរុញផលប្រយោជន៍របស់អាមេរិកក្នុងការគ្រប់គ្រងព្រែកជីក។

ស្ថានទូតចិន បានច្រានចោលយ៉ាងដាច់អហង្ការចំពោះការចោទប្រកាន់ទាំងនេះ ដោយអះអាងថា អាមេរិកកំពុងបង្ខូចកេរ្តិ៍ឈ្មោះ និងបំផ្លើសពីឥទ្ធិពលចិន ដោយផ្អែកលើហេតុផលភូមិសាស្ត្រនយោបាយ។ ចិនរក្សាថា ខ្លួនគោរពអធិបតេយ្យភាពរបស់ប៉ាណាម៉ាលើព្រែកជីក និងគាំទ្រកិច្ចប្រឹងប្រែងរបស់ប៉ាណាម៉ាក្នុងការគ្រប់គ្រងវាដោយឯករាជ្យ។

ចំណែកឯក្រសួងការបរទេសចិន បានអំពាវនាវឲ្យអាមេរិកបញ្ឈប់ការធ្វើនយោបាយ និងដាក់សម្ពាធសេដ្ឋកិច្ច និងពាណិជ្ជកម្ម ដោយសង្កត់ធ្ងន់ថា សកម្មភាពបែបនេះធ្វើឲ្យប៉ះពាល់ដល់សណ្តាប់ធ្នាប់សេដ្ឋកិច្ច និងពាណិជ្ជកម្មអន្តរជាតិ និងមិនអំណោយផលដល់ផលប្រយោជន៍ពិភពលោកនោះទេ៕

ដោយ៖ ឈាង

ចុចអាន៖ អាមេរិក ព្រមានចិន កុំមករញ៉េរញ៉ៃនៅព្រែកជីកប៉ាណាម៉ា