មរណភាព​អតី​​ត​ប្រធានរដ្ឋឡាវ​​​​ដ៏​មាន​ឥទ្ធិពល និង​ជា​បងធំនយោបាយ​​ពី​ភាគខាងត្បូង ​តើ​អាច​រង្គើរ​ដល់​​​​​​​​តំណែង​កូនរបស់​គាត់ឬទេ?​​

មរណភាពរបស់បងធំភាគខាង​ត្បូងឡាវ «ខាំតៃ ស៊ីផាន់ដន» ដែល​មាន​ដើមកំណើត​នៅ​​ខេត្ត​ចំប៉ាសាក់​​ ត្រូវបានមជ្ឈដ្ឋាន​នយោបាយឡាវកំពុងតាមដានមើលថា តើ​កូនច្បង​របស់​គាត់ លោកនាយករដ្ឋមន្ត្រី សនសៃ ស៊ី​ផាន់ដន នៅតែអាច​រក្សាការ​កាន់តំណែង​បានយូរ​ប៉ុណ្ណា​?​ ខណៈ​​អ្នក​នយោបាយ​ឡាវ​ដ៏​មានឥទ្ធិពល​​​កំពុង​កាន់​តំណែង​ជាអគ្គលេខាធិការ​បក្ស​​​និង​ជា​ប្រធានរដ្ឋឡាវបច្ចុប្បន្ន​ដែល​មាន​សិទ្ធិដកហូត​និង​តែងតាំង​​​ថ្នាក់​ដឹកនាំ​រដ្ឋាភិបាល​​ លោក ថងលូន ស៊ីសូលីត ត្រូវគេដឹងថា ជា​ប​ង​ធំ​​ពីភាគខាងជើង។

ជាង២ទសវត្សរ៍​កន្លងមកហើយ ​ចាប់​តាំង​ពីលោកឧត្តមសេនីយ៍ ខាំតៃ ស៊ីផាន់ដន (Khamtai Siphandon) បាន​ចូល​កាន់​កាប់កាច់ចង្កូត​​នយោបាយ​ឡាវ និងមុន​ពេលឈានដល់​ដង្ហើម​ចុង​ក្រោយនេះ លោកបានរៀបចំអ្នក​ស្នង​មរតករបស់លោកចំនួន៤នាក់ ដោយតែងតាំងឱ្យកាន់មុខ​តំណែង​សំខាន់ៗ​ក្នុងជួរបក្សនិង​រដ្ឋ។ យោង​​សារព័ត៌មាន​ The Nations ​របស់​ប្រទេសថៃ​​។

​អតីត​ប្រធានរដ្ឋឡាវ លោកឧត្តមសេនីយ៍ ខាំតៃ ស៊ីផាន់ដន (Khamtai Siphandon) គឺជាអតីតអគ្គលេខាធិមជ្ឈិមបក្សប្រជាជនបដិវត្តន៍ឡាវ បានទទួលមរណភាពកាលពីថ្ងៃទី២ ខែមេសា ឆ្នាំ២០២៥ ក្នុងវ័យ១០១ឆ្នាំ។

មរណភាព​របស់លោកឧត្តមសេនីយ៍ ខាំតៃ ស៊ីផាន់ដន បានជះឥទ្ធិពល​យ៉ាង​ខ្លាំងដល់មជ្ឈដ្ឋាន​នយោបាយឡាវ ព្រោះកន្លងមក លោកឧត្តមសេនីយ៍ ខាំតៃ ស៊ីផាន់ដន គឺជានិមិត្តរូបនយោបាយដ៏សំខាន់ ឬអាចហៅបានថា ជាបងធំនយោបាយនៅភាគខាងត្បូងឡាវ។

នៅក្នុងសង្គមឡាវសុទ្ធតែបានដឹងយ៉ាងច្បាស់ថា ក្នុងចំណោមអ្នកដឹកនាំឡាវរួមមាន៖ រដ្ឋមន្ត្រីក្រសួងការពារជាតិ រដ្ឋមន្ត្រីក្រសួងសន្តិសុខ និងអភិបាលខេត្តភាគខាងត្បូង សុទ្ធតែជាកូនចៅជំនិតរបស់លោកឧត្តមសេនីយ៍ ខាំតៃ ស៊ីផាន់ដន ទាំងអស់។

បន្ទាប់ពីលោកឧត្តមសេនីយ៍ ខាំតៃ ស៊ីផាន់ដន ប្រកាសចូលនិវត្តន៍នៅឆ្នាំ២០០៦ លោកបានផ្លាស់ទៅរស់នៅផ្ទះឯកជនមួយនៅក្រុងប៉ាកសេ (Pakse) ខេត្តចំប៉ាសាក់ (Champasak) ដោយដើរតួជាអ្នកដឹកនាំនៅពីក្រោយក្នុងការតែងតាំងលោក ជុំម៉ាលី សៃយ៉ាសន (Choummaly Sayasone) និងតែងតាំងលោក ប៊ុនញ៉ាំង វរឡាចីត (Bounnhang Vorachith) ឱ្យឡើងកាន់តំណែងជាប្រធានរដ្ឋឡាវជាបន្តបន្ទាប់។

សំខាន់ជាងនេះទៅទៀត នៅមុនពេលលោកឧត្តមសេនីយ៍ ខាំតៃ ស៊ីផាន់ដន លាលែងពីតំណែងជាប្រធានរដ្ឋ​ឡាវ​ លោកក៏បានផ្ចុងផ្តើមកូនប្រុសធម៌របស់លោកម្នាក់ ឈ្មោះ ប៊ូសន បុផាវ៉ាន់ (Buason Buphawan) ឱ្យឡើងកាន់តំណែងជានាយករដ្ឋមន្ត្រីនៅឆ្នាំ២០០៦ ប៉ុន្តែបន្ទាប់ពីកាន់អំណាចបាន៤ឆ្នាំ ក៏លាលែងពីតំណែងវិញ ដោយសារ​មាន​បញ្ហាផ្ទៃក្នុង​គ្រួសារ។

បច្ចុប្បន្ននេះ លោកឧត្តមសេនីយ៍ ខាំតៃ ស៊ីផាន់ដន មានកូនចំនួន៤នាក់ដែលកាន់តំណែងសំខាន់ៗក្នុងជួររដ្ឋាភិបាលរួមមាន៖

១-លោក សនសៃ ស៊ីផាន់ដន (Sonsai Siphandon) កូនប្រុសច្បងរបស់លោកដែលកាន់តំណែងជានាយករដ្ឋមន្ត្រីឡាវបច្ចុប្បន្ន ដែលជាក្តីសុបិនចុងក្រោយរបស់លោកដែលចង់ឃើញកូនប្រុសច្បងរបស់ខ្លួនរូបនេះ ក្លាយជានាយករដ្ឋមន្ត្រី។

២-លោកស្រី វៀងថង ស៊ីផាន់ដន (Viengthong Siphandon) កាន់តំណែងជាប្រធានតុលាការកំពូល។

៣-លោក អាតសាផាំងថង ស៊ីផាន់ដន (Adsaphanthong Siphandon) កាន់តំណែងជាចៅហ្វាយក្រុងវៀងចន្ទន៍បច្ចុប្បន្ន។

៤-លោក វៀងសាវ៉ាត់ ស៊ីផាន់ដន (Viengsawat Siphandon) កាន់តំណែងជាអភិបាលខេត្តហ្លួងណាំថា(Luang Namtha) ខេត្តដ៏ធំមួយជាប់ព្រំដែនប្រទេសចិន។

សេចក្តីរាយការណ៍របស់ NationWeekend បានបន្តថា នៅឆ្នាំ២០២១ ក្នុងមហាសន្និបាតលើកទី១១ របស់គណបក្សប្រជាជនបដិវត្តន៍ឡាវ លោក ថងលូន ស៊ីសូលីត (Thongloun Sisoulith) ត្រូវបានទទួលការទុកចិត្តពីមហាសន្និបាតឱ្យធ្វើជាអគ្គលេខាធិការមជ្ឈឹមបក្សសម្រាប់អាណត្តិទី២ និងបន្តកាន់តំណែងជាប្រធានរដ្ឋឡាវបច្ចុប្បន្ន។

ក្នុងមជ្ឈដ្ឋាន​នយោបាយឡាវទាំង​អស់បានលើកឡើងស្រដៀង​ៗ​គ្នា​ថា មហា​សន្និបាត​គណបក្សប្រជាជនបដិវត្តន៍ឡាវ​លើក​ទី​១២ នៅឆ្នាំ​២០២៦ នឹង​ក្លាយ​ជា​ចំណុច​របត់​ដ៏សំខាន់​សម្រាប់​នយោបាយ​ឡាវ។

នៅ​ពេលបងធំនៅភាគខាង​ត្បូងឡាវ ខាំតៃ ស៊ីផាន់ដន បានលាចាកលោកនៅ​ជាមួយបងធំជំនាន់ដំបូងគេបង្អស់ ពោលគឺលោក ​កៃសុន ភូមិវិហាន (Kaisone Phomvihan) និងលោក នូហាក់ ភូមិសាវ៉ាន់ (Noohak Phoumsavan)។

​​សូម​​ទាញ​ការ​ចាប់អារម្មណ៍ថា លោក ថងលូន ស៊ីសូលីត ប្រធានរដ្ឋឡាវបច្ចុប្បន្ន គឺជាមេដឹកនាំឡាវដែលមានដើមកំណើតនៅភាគខាងជើង។ សំណួរសួរថា តើលោក ថងលូន នឹងប្រគល់តួនាទីអគ្គលេខាធិការបក្ស និងតំណែងប្រធានរដ្ឋទៅឱ្យនរណាជាអ្នកស្នងបន្ត? តើ លោក សនសៃ ស៊ីផាន់ដន នឹងនៅអាចរក្សាតំណែងនាយករដ្ឋមន្ត្រីដដែលបានដែរឬទេ នៅពេលដែលគ្មានស្រមោលឪពុករបស់ខ្លួននៅពីក្រោយ​ឆាក​នយោបាយ​យ៉ាងដូច្នេះ?៕​

ដោយ ភ្នាក់ងារ