ព័ត៌មានអន្ដរជាតិ

UN៖ អ៊ីរ៉ង់ជិតសម្រេចការផលិតគ្រាប់បែកនុយក្លេអ៊ែរ

បានផុស

៣ ខែ មុន

នៅ

ថ្ងៃព្រហស្បតិ៍ ១៧ មេសា ២០២៥

ដោយ

Chheang

លោក Rafael Grossi ប្រធានក្រុមឃ្លាំមើលនុយក្លេអ៊ែរនៃអង្គការសហប្រជាជាតិ និងជាអគ្គនាយកនៃទីភ្នាក់ងារថាមពលអាតូមិកអន្តរជាតិ (IAEA) បាននិយាយកាលថ្ងៃទី១៦ខែមេសាថា ប្រទេសអ៊ីរ៉ង់«នៅមិនឆ្ងាយទេ»ពីការសម្រេចបាននូវគ្រាប់បែកនុយក្លេអ៊ែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Grossi បានប្រដូចដំណើរការនុយក្លេអ៊ែររបស់អ៊ីរ៉ង់ទៅនឹងរូបផ្គុំ ដោយលើកឡើងថា៖ «ពួកគេមានជាបំណែកៗហើយនៅថ្ងៃណាមួយពួកគេអាចដាក់បញ្ចូលគ្នាបាន។ វានៅតែមានផ្លូវដើម្បីដោះស្រាយបញ្ហានេះនៅមុនពេលដែលពួកគេសម្រេចវាបាន»។

ការវាយតម្លៃនេះធ្វើឡើងខណៈដែលអ៊ីរ៉ង់បន្តបង្កើនសារធាតុអ៊ុយរ៉ាញ៉ូមរហូតដល់ភាពសុទ្ធ៦០% ដែលលើសពីដែនកំណត់ ៣,៦៧% នៃកិច្ចព្រមព្រៀងកម្មវិធីនុយក្លេអ៊ែរ (JCPOA)ឆ្នាំ២០១៥។ យ៉ាងណាវានៅតែទាបជាងភាពសុទ្ធ ៩០% ដែលត្រូវការសម្រាប់ការផលិតអាវុធនុយក្លេអ៊ែរ។ IAEA រាយការណ៍ថា បច្ចុប្បន្នអ៊ីរ៉ង់មានសារធាតុអ៊ុយរ៉ាញ៉ូមប្រមាណ ២៧៤,៨គីឡូក្រាមដែលបន្សុទ្ធដល់កម្រិត ៦០%។

កិច្ចចរចាជុំទីពីររវាងអ៊ីរ៉ង់ និងសហរដ្ឋអាមេរិក ពាក់ព័ន្ធនឹងកម្មវិធីអាវុធនុយក្លេអ៊ែរ នឹងរៀបចំក្នុងទីក្រុងរ៉ូមប្រទេសអ៊ីតាលី នៅថ្ងៃសៅរ៍សប្ដាហ៍នេះ បន្ទាប់ពីប្រទេសទាំងពីរបានពិភាក្សាកម្រិតខ្ពស់បំផុតកាលពីសប្ដាហ៍មុននៅប្រទេសអូម៉ង់។

សូមរឭកថា អាមេរិក និងអ៊ីរ៉ង់ធ្លាប់ធ្វើកិច្ចព្រមព្រៀងនុយក្លេអ៊ែរអន្តរជាតិកាលពីឆ្នាំ២០១៥អំឡុងពេលលោក Barack Obama ធ្វើជាប្រធានាធិបតីអាមេរិក ដែលបានរឹតបន្តឹងកម្មវិធីនុយក្លេអ៊ែររបស់អ៊ីរ៉ង់ជាថ្នូរនឹងការដកទណ្ឌកម្ម។ ប៉ុន្តែលោក ត្រាំ បានដកសហរដ្ឋអាមេរិកជាឯកតោភាគីចេញពីកិច្ចព្រមព្រៀងនុយក្លេអ៊ែរក្នុងឆ្នាំ២០១៨ ដោយហៅវាថាជា «កិច្ចព្រមព្រៀងដ៏អាក្រក់បំផុតមិនធ្លាប់មាន»។

លុះដល់អាណត្តិរបស់លោក ចូ បៃដិន អ៊ីរ៉ង់និងអាមេរិកបានធ្វើការចរចាដោយប្រយោលនៅទីក្រុងវីយែនប្រទេសអូស្ត្រាលីក្នុងឆ្នាំ២០២១ ក្នុងគោលបំណងស្តារឡើងវិញនូវកិច្ចព្រមព្រៀងនុយក្លេអ៊ែរ។ យ៉ាងណាមិញ កិច្ចពិភាក្សានោះ មិនបានឈានដល់កិច្ចព្រមព្រៀងណាមួយឡើយ៕

ដោយ៖ ឈាង