ព័ត៌មានអន្ដរជាតិ

កូរ៉េខាងជើង គំរាមសងសឹក ក្រោយអាមេរិកបញ្ជូនយន្តហោះទម្លាក់គ្រាប់បែកទៅកូរ៉េខាងត្បូង

បានផុស

១ ម៉ោង មុន

នៅ

ថ្ងៃព្រហស្បតិ៍ ១៧ មេសា ២០២៥

ដោយ

Chheang

នៅថ្ងៃទី១៧ខែមេសាឆ្នាំ២០២៥ ប្រទេសកូរ៉េខាងជើងបានចេញការព្រមានសងសឹកខ្លាំងៗ បន្ទាប់ពីសហរដ្ឋអាមេរិកបានដាក់ពង្រាយយន្តហោះទម្លាក់គ្រាប់បែករយៈចម្ងាយឆ្ងាយ B-1B នៅកូរ៉េខាងត្បូង ក្នុងអំឡុងពេលសមយុទ្ធយោធារួមគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមយុទ្ធដែលធ្វើឡើងកាលពីថ្ងៃទី១៥ខែមេសា រួមមាន យន្តហោះចម្បាំងអាមេរិក និងកូរ៉េខាងត្បូង ហើយមានបំណងបង្ហាញពីសមត្ថភាពទប់ស្កាត់រួមគ្នារបស់សម្ព័ន្ធមិត្ត ចំពោះកម្មវិធីនុយក្លេអ៊ែររបស់កូរ៉េខាងជើង។

ក្រសួងការពារជាតិកូរ៉េខាងជើង បានថ្កោលទោសសមយុទ្ធនេះថាជា«ការបង្កហេតុដ៏ធ្ងន់ធ្ងរ» និងជា«ការគំរាមកំហែងបើកចំហ» ដល់សន្តិសុខជាតិរបស់ខ្លួន ដោយអះអាងថា សកម្មភាពបែបនេះបង្កើនភាពតានតឹងផ្នែកយោធានៅក្នុងតំបន់ដល់កម្រិតគ្រោះថ្នាក់បំផុត។ ទីក្រុងព្យុងយ៉ាង រមែងចាត់ទុកសមយុទ្ធរួមគ្នាទាំងនេះថាជាការហាត់សមសម្រាប់ការឈ្លានពាន ជាពិសេសកូរ៉េខាងជើងតែងប្រឆាំងនឹងការដាក់ពង្រាយសព្វាវុធជាយុទ្ធសាស្ត្ររបស់អាមេរិក ដូចជា យន្តហោះទម្លាក់គ្រាប់បែករយៈចម្ងាយឆ្ងាយជាដើម។

ក្នុងពេលដំណាលគ្នាជាមួយសមយុទ្ធរវាងអាមេរិកនិងកូរ៉េខាងត្បូង ក្រុងព្យុងយ៉ាងបានប្រារព្ធខួបលើកទី១១៣ នៃថ្ងៃកំណើតរបស់លោក គីម អ៊ីលសុង ដែលជាថ្ងៃបុណ្យជាតិដ៏សំខាន់បំផុត។ ការរៀបចំសមយុទ្ធយោធារួមគ្នានៅចំថ្ងៃពិសេសនេះ ទំនងជាធ្វើឲ្យកូរ៉េខាងជើងក្ដៅស្លឹកត្រចៀកជាខ្លាំង។

សូមបញ្ជាក់ថា កងកម្លាំងអាកាសរបស់កូរ៉េខាងត្បូងបានប្រកាសចាប់ផ្តើមសមយុទ្ធលើអាកាស «Freedom Flag» ប្រចាំឆ្នាំរបស់ខ្លួនជាមួយកងកម្លាំងអាមេរិក ដែលមានរយៈពេល២សប្តាហ៍ ដោយមានការចូលរួមពីយន្តហោះចំនួន ៩០គ្រឿង និងទាហាន ១ ១០០នាក់។ យន្តហោះចម្បាំងពីភាគីកូរ៉េខាងត្បូង មានដូចជា F-35A, F-15K និង KF-16 ខណៈអាមេរិកវិញបានបញ្ជូនយន្តហោះ F-16, B-1B និង F-35 B ព្រមទាំងដ្រូន MQ-1 និង MQ-9៕