ប្រធានាធិបតីថ្មី​របស់​មីយ៉ាន់ម៉ា ប្រកាសចង់ស្តារទំនាក់ទំនងជាមួយអាស៊ានឡើងវិញ

លោក ⁠Min Aung Hlaing ប្រធានាធិបតីថ្មីនៃប្រទេសមីយ៉ាន់ម៉ា បានថ្លែងនា​ថ្ងៃសុក្រ​ទី​១០​ខែ​មេសា​នេះ​ថា រដ្ឋាភិបាលថ្មីរបស់លោកមានបញ្ហាប្រឈមជាច្រើនដែលត្រូវដោះស្រាយ ប៉ុន្តែលោកបានសន្យាថានឹងពង្រឹងទំនាក់ទំនងអន្តរជាតិឲ្យ​កាន់តែប្រសើរឡើង ជាពិសេសគឺការខិតខំធ្វើយ៉ាងណាឲ្យ​ទំនាក់ទំនងជាមួយប្លុកអាស៊ានត្រឡប់មកសភាពធម្មតាវិញ។

យោង​តាម​ The Star ក្នុងសុន្ទរកថាដំបូងទៅកាន់សភា លោក Min Aung Hlaing បានសង្កត់ធ្ងន់ថា សន្តិភាព និងប្រជាធិបតេយ្យ គឺជាអាទិភាពចម្បងរបស់លោក ហើយរដ្ឋាភិបាលថ្មីនេះនឹងជំរុញការវិនិយោគពីបរទេស អភិវឌ្ឍវិស័យកសិកម្ម និងបង្កើតផែនការយុទ្ធសាស្ត្ររយៈពេលវែងឲ្យមានប្រសិទ្ធភាព។ លោក​ក៏​បានសង្កត់ធ្ងន់លើការប្តេជ្ញាចិត្តចំពោះផែនការផ្លាស់ប្តូរផ្នែកការទូតក្នុងតំបន់ផង​ដែរ។ ពាក់ព័ន្ធ​នឹង​ទំនាក់ទំនងជាមួយអាស៊ាន លោកបាននិយាយ​ថា «យើងនឹងពង្រឹងទំនាក់ទំនងអន្តរជាតិ និងខិតខំស្តារទំនាក់ទំនងធម្មតាជាមួយអាស៊ានឡើងវិញ»។

គួររំលឹកថា ចាប់តាំងពីរដ្ឋប្រហារមក មីយ៉ាន់ម៉ាត្រូវបានសមាគមអាស៊ានដាក់ទណ្ឌកម្ម ដោយមិនអនុញ្ញាត​ឲ្យ​ថ្នាក់ដឹកនាំយោធាចូលរួមក្នុងកិច្ចប្រជុំកំពូលឡើយ។

ការឡើងកាន់តំណែងជាប្រធានាធិបតី​របស់​លោក Min Aung Hlaing គឺជាការរៀបចំយ៉ាងសម្រិតសម្រាំងដើម្បីពង្រឹងអំណាចនយោបាយរបស់លោក បន្ទាប់ពីលោកបានដឹកនាំរដ្ឋប្រហារធ្វើឲ្យប្រទេសធ្លាក់ក្នុងភាពចលាចលអស់រយៈពេល៥ឆ្នាំកន្លងមក។ លោក Min Aung Hlaing ត្រូវបានសភាបោះឆ្នោតជ្រើសរើសឲ្យ​ធ្វើជាប្រធានាធិបតីកាលពីមួយសប្តាហ៍មុន បន្ទាប់ពីគណបក្សដែលគាំទ្រដោយយោធាបានឈ្នះឆ្នោតយ៉ាងភ្លូកទឹកភ្លូកដី។ ទោះជាយ៉ាងណា ការបោះឆ្នោតនេះត្រូវបានក្រុមអ្នករិះគន់ និងរដ្ឋាភិបាលបស្ចិមប្រទេស ចាត់ទុកថាជាល្បែងនយោបាយបោកប្រាស់ ដើម្បីបន្តការគ្រប់គ្រងរបស់យោធាក្រោមស្លាកប្រជាធិបតេយ្យ​តែប៉ុណ្ណោះ៕

ប្រែសម្រួល៖​ ឈាង