ប្រេស៊ីល រកឃើញអ្នកឆ្លងកូវីដថ្មីប្រចាំថ្ងៃមិនធ្លាប់មានជាង ១០ ម៉ឺនករណី

បើយោងតាមក្រសួងសុខាភិបាលប្រេស៊ីលបានឲ្យដឹងថា ប្រទេសប្រេស៊ីលកាលពីថ្ងៃព្រហស្បតិ៍បានកត់ត្រាករណីឆ្លងថ្មីនៃជំងឺកូវីដ ១៩ មិនធ្លាប់មានសាជាថ្មី បន្ទាប់ពីមនុស្ស ១០០,១៥៨ នាក់បានធ្វើតេស្តវិជ្ជមានជំងឺនេះក្នុងរយៈពេល ២៤ ម៉ោងចុងក្រោយនេះ ។

ក្រសួងបាននិយាយថា ប្រទេសអាមេរិកខាងត្បូងមួយនេះមានករណីឆ្លងសរុបចំនួន ១២,៣២០,១៦៩ ករណី ចាប់តាំងពីករណីដំបូងត្រូវបានរកឃើញនៅថ្ងៃទី ២៦ ខែកុម្ភៈ ឆ្នាំ ២០២០ ។

ទន្ទឹមនោះក្នុងរយៈពេល ២៤ ម៉ោងចុងក្រោយដូចគ្នាក៏មានមនុស្សចំនួន ២,៧៧៧ នាក់បានស្លាប់ដោយសារជំងឺនេះដែលធ្វើឲ្យចំនួនអ្នកស្លាប់ទូទាំងប្រទេសកើនដល់ ៣០៣,៤៦២ នាក់ ។

ប្រទេសប្រេស៊ីលមានចំនួនករណីឆ្លង និងស្លាប់ដោយសារជំងឺកូវីដ ១៩ ច្រើនជាងគេទី ២ លើពិភពលោក ខណៈប្រទេសដែលស្ថិតនៅលើគេគឺសហរដ្ឋអាមេរិក ។

ប្រទេសនេះបានជួបប្រទះនូវរលកថ្មីនៃករណីឆ្លងចាប់តាំងពីខែមករា ហើយចំនួនឆ្លងបច្ចុប្បន្នកំពុងវាយលុកសេវាកម្មមន្ទីរពេទ្យជាមួយនឹងអ្នកជំងឺច្រើនលើសលុប ។

បច្ចុប្បន្ននេះប្រទេសប្រេស៊ីលកំពុងមានអត្រាស្លាប់ដោយសារជំងឺកូវីដ ១៩ ចំនួន ១៤៤ នាក់ក្នុងចំណោមប្រជាជន ១០០,០០០ នាក់ និងករណីឆ្លង ៥,៨៦៣ ករណីក្នុងចំណោមប្រជាជន ១០០,០០០ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ ប្រេស៊ីល ជាប្រទេសទី២ មានមនុស្សស្លាប់ដោយសារកូវីដលើស ៣០ម៉ឺននាក់

ចុចអាន ៖ ប្រេស៊ីល បន្តបំបែកកំណត់ត្រាអ្នកស្លាប់ដោយសារកូវីដ មួយថ្ងៃជាង៣ពាន់នាក់