ព័ត៌មានអន្ដរជាតិ

ស្លាប់៦៤នាក់នៅក្នុងប្រតិបត្តិការបង្ក្រាបគ្រឿងញៀនដ៏ធំបំផុតមិនធ្លាប់មាននៅប្រេស៊ីល

បានផុស

៩ ខែ មុន

នៅ

ថ្ងៃពុធ ២៩ តុលា ២០២៥

ដោយ

Chheang

ប្រតិបត្តិការប៉ូលិសដ៏ធំប្រឆាំងនឹងការជួញដូរគ្រឿងញៀននៅទីក្រុង Rio de Janeiro នៃប្រទេសប្រេស៊ីល បានបណ្តាលឲ្យមនុស្សយ៉ាងហោចណាស់៦៤នាក់បានស្លាប់ ក្នុងនោះមានមន្រ្តីប៉ូលិស៤នាក់ ដែលអាជ្ញាធរបានពណ៌នាថាជាប្រតិបត្តិការសន្តិសុខដ៏ធំបំផុតនៅក្នុងប្រវត្តិសាស្រ្តរបស់រដ្ឋ។

ប៉ូលិសដើរកាត់រថយន្តដែលឆេះប្រើជារបាំងផ្លូវក្នុងអំឡុងពេលប្រតិបត្តិការប៉ូលិសប្រឆាំងនឹងអ្នកជួញដូរគ្រឿងញៀនក្នុងតំបន់ Complexo do Alemao favela (រូបថត៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អភិបាលរដ្ឋ Claudio Castro បាននិយាយថា ការវាយលុកដែលបានចាប់ផ្តើមនៅព្រឹកថ្ងៃអង្គារទី២៨តុលា មានការចូលរួមពីមន្ត្រីប៉ូលិសចំនួន ២ ៥០០នាក់ កំណត់គោលដៅលើក្រុម Comando Vermelho (Red Command) ដែលជាអង្គការឧក្រិដ្ឋកម្មដ៏មានឥទ្ធិពលបំផុតមួយរបស់ប្រទេសប្រេស៊ីល។ ប្រតិបត្តិការនេះបានព្យាយាមទប់ស្កាត់«ការពង្រីកទឹកដី»របស់ក្រុមគ្រឿងញឿននៅក្នុងទីក្រុង។

កងកម្លាំងសន្តិសុខបានចូលទៅក្នុងបរិវេណ Alemao និង da Penha favela នៅភាគខាងជើងទីក្រុង Rio នៅព្រឹកព្រលឹម រួចធ្វើការប្រយុទ្ធគ្នាយ៉ាងខ្លាំងក្លា។ យោងតាមលោក Castro ការប៉ះទង្គិចគ្នាមានទាំងការបាញ់កាំភ្លើង និងការបោកគ្រាប់បែកដៃដែលទម្លាក់ចេញពីយន្តហោះគ្មានមនុស្សបើក។

អភិបាលក្រុងបានបន្តថា «វាមិនមែនជាឧក្រិដ្ឋកម្មធម្មតាទៀតទេ វាគឺជាភេរវកម្មគ្រឿងញៀន»។

គិតត្រឹមល្ងាចថ្ងៃអង្គារ រដ្ឋាភិបាលរដ្ឋបានរាយការណ៍ពីការចាប់ខ្លួនចំនួន៨១នាក់ រឹបអូសបានកាំភ្លើងចំនួន៤២ដើម និង«គ្រឿងញៀនមួយចំនួនធំ»។ ប៉ូលិសបានដាក់ពង្រាយរថពាសដែកចំនួន៣២គ្រឿងនៅទូទាំងតំបន់ប្រតិបត្តិការ ដែលមានការប៉ះទង្គិច។

អាជ្ញាធរបានជំរុញឲ្យប្រជាពលរដ្ឋនៅក្នុងផ្ទះ ព្រោះអំពើហិង្សាបានរំខានដល់ជីវិតសាធារណៈ។ ស្ថាប័ននីតិប្បញ្ញត្តិរបស់រដ្ឋបាននិយាយថា មនុស្សជាង ២០ម៉ឺននាក់ត្រូវបានរងផលប៉ះពាល់ ដោយសាលារៀនបិទទ្វារ សេវាសុខភាពផ្អាក និងមានការបង្វែរផ្លូវដឹកជញ្ជូនសាធារណៈ។

លោក Castro ដែលជាសម្ព័ន្ធមិត្តនយោបាយរបស់អតីតប្រធានាធិបតីស្តាំនិយម Jair Bolsonaro បានពណ៌នាប្រតិបត្តិការនេះថាមានទំហំធំជាងយុទ្ធនាការសន្តិសុខឆ្នាំ២០១០ ដែលឃើញកងកម្លាំងប៉ូលិស និងយោធារួមគ្នាដណ្តើមបានមកវិញនូវតំបន់ដដែលបន្ទាប់ពីការប្រយុទ្ធគ្នាមួយសប្តាហ៍ដែលបានសម្លាប់មនុស្សប្រហែល៣០នាក់។

ប៉ូលិស-យោធាឃាត់ខ្លួនអ្នកជួញដូរគ្រឿងញៀននៅទីក្រុង Rio de Janeiro ប្រទេសប្រេស៊ីលកាលពីថ្ងៃអង្គារ (រូបថត៖ Reuters)

ការបង្រ្កាបនាពេលនេះ កើតឡើងចំពេលមានការជជែកដេញដោលគ្នារវាងអាជ្ញាធររដ្ឋ និងសហព័ន្ធអំពីរបៀបចាត់ថ្នាក់ក្រុមឧក្រិដ្ឋកម្មគ្រឿងញៀន។ កាលពីខែឧសភា រដ្ឋាភិបាលរបស់ប្រធានាធិបតី Luiz Inácio Lula da Silva បានច្រានចោលសំណើមួយ ដើម្បីចាត់តាំងក្រុមដូចជា Comando Vermelho ជាអង្គការភេរវករ ដោយលើកហេតុផលថា សកម្មភាពរបស់ពួកគេទោះមានអំពើហិង្សា តែមិនស្របតាមនិយមន័យផ្លូវច្បាប់នៃអំពើភេរវកម្មនៅក្រោមច្បាប់របស់ប្រទេសប្រេស៊ីលទេ៕

ដោយ៖ ឈាង

Related Topics:ប្រទេសប្រេស៊ីល