លោក គីម ជុងអ៊ុន កំពុងបាត់ខ្លួន?

យោងតាមរូបថត ដែលចេញផ្សាយដោយទីភ្នាក់ងារសារព័ត៌មានផ្លូវការរបស់ប្រទេសកូរ៉េខាងជើងបានបង្ហាញថា​ មេដឹកនាំ គីម ជុងអ៊ុន មិនបានចូលរួមក្នុងការបាញ់សាកល្បងមីស៊ីល Ballistic ថ្មីរបស់ប្រទេសនេះទេ។

ទីភ្នាក់ងារសារព័ត៌មានផ្លូវការ KCNA របស់កូរ៉េខាងជើងបាននិយាយថា មីស៊ីលយុទ្ធសាស្ត្រប្រភេទថ្មីចំនួនពីរគ្រាប់ បានវាយប្រហារចំគោលដៅនៅឯនាយឆ្នេរសមុទ្រ ភាគខាងកើតកាលពីថ្ងៃព្រហស្បតិ៍។

រូបថតនៅលើគេហទំព័ររបស់កាសែត Rodong Sinmun នៃប្រទេសកូរ៉េខាងជើង បានបង្ហាញពីការបាញ់មីស៊ីលចេញពីជើងទម្រ ក្នុងអណ្តាតភ្លើងឆេះយ៉ាងសន្ធោសន្ធៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ រូបភាពដែលចេញផ្សាយដោយ KCNA មិនបានបង្ហាញពីវត្តមាន មេដឹកនាំកូរ៉េខាងជើង លោក គីម ជុងអ៊ុន ទេ ដែលជាធម្មតា លោកមិនដែលខកខានចំពោះព្រឹត្តិការណ៍បែបនេះឡើយ

រឿងនេះបានបង្កឲ្យមានមន្ទិលសង្ស័យថា តើលោក គីម ជុងអ៊ុន បាត់ខ្លួនឬក៏យ៉ាងណា ហើយពេលនេះលោកកំពុងស្ថិតនៅឯណា។

KCNA បានដកស្រង់សម្តីមន្ត្រីជាន់ខ្ពស់លោក Ri Pyong Chol ដែលត្រួតពិនិត្យការធ្វើតេស្តនេះ ដោយបាននិយាយថា ការអភិវឌ្ឍអាវុធថ្មីគឺមានសារៈសំខាន់ខ្លាំងណាស់ ក្នុងការពង្រឹងអំណាចយោធារបស់ប្រទេស និងរារាំងរាល់ការគំរាមកំហែងផ្នែកយោធាដែលមាននៅក្នុងឧបទ្វីបកូរ៉េ។

ការបាញ់សាកល្បងនេះ គឺជាការបង្កហេតុធំបំផុតលើកដំបូងរបស់កូរ៉េខាងជើង ចាប់តាំងពីប្រធានាធិបតីអាមេរិក លោក ចូ បៃដិន ឡើងកាន់តំណែងកាលពីខែមករា។

អ្នកជំនាញខ្លះនិយាយថា ប្រទេសកូរ៉េខាងជើង មានគោលបំណងដាក់សម្ពាធលើរដ្ឋបាលលោក បៃដិន ដើម្បីបង្កើនអានុភាពរបស់ខ្លួននៅក្នុងកិច្ចចរចានាពេលអនាគត៕

ប្រែសម្រួលដោយ៖ Vann Vann

ប្រភព៖ Daily Mail

ចុចអាន៖ កូរ៉េខាងជើង ថា មីស៊ីលដែលបាញ់កាលពីម្សិលមិញជាការសាកល្បងប្រព័ន្ធអាវុធយុទ្ធសាស្ត្រថ្មី