រុស្ស៊ី ចាប់ផ្តើមប្រារព្ធទិវាជ័យជម្នះ ក្រោមការគំរាមកំហែងផ្នែកសន្តិសុខពី អ៊ុយក្រែន

ក្បួនព្យុហយាត្រាទិវាជ័យជម្នះបានចាប់ផ្តើមជាផ្លូវការហើយនៅថ្ងៃសុក្រទី៩ខែឧសភាឆ្នាំ២០២៥ លើទីលានក្រហម ក្នុងទីក្រុងមូស្គូនៃប្រទេសរុស្សី ដែលនេះជាខួបលើកទី៨០នៃជ័យជម្នះរបស់សហភាពសូវៀតលើពួកណាស៊ីអាល្លឺម៉ង់ ក្នុងសង្គ្រាមលោកលើកទីពីរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT, ទិវាឆ្នាំនេះ គឺជាព្រឹត្តិការណ៍ដ៏ធំបំផុតមួយ ដែលមានមានការចូលរួមពីសំណាក់កងទ័ពជាង ១១ ០០០នាក់និងការអួតបង្ហាញគ្រឿងសឹកទំនើបៗ រួមទាំងយន្តហោះគ្មានមនុស្សបើក ដែលប្រើប្រាស់នៅក្នុងប្រទេសអ៊ុយក្រែនផងដែរ។

មេដឹកនាំវិមានក្រឹមឡាំង វ្ល៉ាឌីមៀរ ពូទីន បានធ្វើជាអធិបតីក្នុងពិធីនេះ ខណៈថ្នាក់ដឹកនាំអន្តរជាតិជាច្រើនទៀតក៏ចូលរួមផងដែរ ជាពិសេសប្រធានាធិបតី​ចិន ស៊ី ជីនពីង ដែលបាន​ចូលរួម​ក្នុង​នាម​ជា​ភ្ញៀវកិត្តិយស ​រួម​ជាមួយ​មេដឹកនាំ​មកពី​ប្រទេស​ប្រេស៊ីល អេហ្ស៊ីប វៀតណាម និងប្រជាជាតិផ្សេង​ទៀត។

ឆ្នាំនេះ ទិវាជ័យជម្នះត្រូវប្រារព្ធធ្វើឡើង ​ក្រោម​ការ​ពង្រឹង​សន្តិសុខយ៉ាងតឹងរ៉ឹង ព្រោះទីក្រុងកៀវ កំពុងបង្កការគំរាមកំហែង។ ជាក់ស្តែងមុនពិធីនេះមកដល់ មានការវាយប្រហារដោយយន្តហោះគ្មានមនុស្សបើករបស់អ៊ុយក្រែន ប៉ុន្មានថ្ងៃជាប់គ្នាដែលជាហេតុជំរុញឲ្យមានការបិទដែនអាកាសរបស់ទីក្រុងមូស្គូ និងការរំខាននៅអាកាសយានដ្ឋានសំខាន់ៗ។

ជាវិធានការសន្តិសុខ រុស្ស៊ីបានពង្រឹងសន្តិសុខយ៉ាងខ្លាំង ដោយដាក់ពង្រាយកងកម្លាំងនិងហាមមិនឲ្យប្រើអ៊ីនធឺណិតតាមទូរសព្ទចល័តនៅក្នុងតំបន់ជុំវិញកន្លែងប្រារព្ធពិធីនេះ។

មុននេះដែរ លោកពូទីន បានប្រកាសពីបទឈប់បាញ់ ដែល​ចាប់​អនុវត្ត​​ពី​ពាក់កណ្តាលអាធ្រាត្រថ្ងៃព្រហស្បតិ៍ រហូតដល់ពាក់កណ្តាលអាធ្រាត្រថ្ងៃទី១០ឈានដល់ថ្ងៃទី១១ខែឧសភា ខណៈវិមានក្រឹមឡាំងអះអាងថា បទឈប់បាញ់នេះគឺជាកាយវិការមនុស្សធម៌ ដើម្បីអបអរខួបលើកទី៨០នៃជ័យជម្នះរបស់សូវៀតលើពួកណាស៊ីអាល្លឺម៉ង់ និងមានគោលបំ​ណងទុកពេលសម្រាប់កិច្ចចរចាស្វែងរកសន្តិភាពដោយផ្ទាល់ជាមួយអ៊ុយក្រែនដោយគ្មានលក្ខខណ្ឌ។

ទោះបីជាយ៉ាងណាក៏ដោយ លោកហ្សេលេនស្គី មិនគាំទ្របទឈប់បាញ់នេះឡើយ ដោយចាត់ទុកថា វាគឺជាកលល្បិចរបស់លោកពូទីន ហើយថែមទាំងចោទប្រកាន់រុស្ស៊ីថា យកលេសផ្នែកមនុស្សធម៌ដើម្បីបម្រើឲ្យផលប្រយោជន៍របស់ខ្លួនថែមទៀតផង៕

អត្ថបទ៖ សុខ សុវណ្ណ

ចុចអាន៖ ពូទីន ប្រកាសប្រើអំណាច ធ្វើគ្រប់យ៉ាង រារាំងពិភពលោក មិនឲ្យកើតសង្គ្រាមថ្មី