លោក Pezeshkian ប្រកាសថា អ៊ីរ៉ង់នឹងមិន​ឱន​ក្បាល​ដាក់​អាមេរិក​ដាច់​ខាត

ប្រធានាធិបតីអ៊ីរ៉ង់ លោក Masoud Pezeshkian បានបញ្ជាក់យ៉ាងម៉ឺងម៉ាត់ថា អ៊ីរ៉ង់នឹងមិន​ឱន​ក្បាល​ចំពោះ​​សម្ពាធពីខាងក្រៅឡើយ ដោយ​នេះ​គឺ​ជា​​ការ​ឆ្លើយតបទៅនឹងការរិះគន់ថ្មីៗរបស់ប្រធានាធិបតីអាមេរិក លោក ដូណាល់ ត្រាំ ក្នុងអំឡុងដំណើរទស្សនកិច្ចនៅមជ្ឈិមបូព៌ា។

នៅក្នុងការផ្សាយផ្ទាល់តាមកញ្ចក់ទូរទស្សន៍រដ្ឋអ៊ីរ៉ង់​កាល​ពី​ថ្ងៃ​​ទី​១៤​ឧសភា លោក Pezeshkian បានប្រកាសថា៖ «យើងនឹងមិនឱនក្បាលចំពោះការគំរាមកំហែងណាមួយឡើយ» ដោយសង្កត់ធ្ងន់លើភាពធន់របស់អ៊ីរ៉ង់ប្រឆាំងនឹងការបំភិតបំភ័យ។

សេចក្តីថ្លែងការណ៍នេះ ធ្វើឡើងបន្ទាប់ពីការអំពាវនាវរបស់លោកប្រធានាធិបតី ត្រាំ ទៅកាន់ប្រទេសកាតា​ឲ្យ​សម្រុះសម្រួលកិច្ចព្រមព្រៀងនុយក្លេអ៊ែរថ្មីជាមួយប្រទេសអ៊ីរ៉ង់។ លោក ត្រាំ បានសង្កត់ធ្ងន់លើគ្រោះថ្នាក់ដែលបង្កឡើងដោយសកម្មភាពចម្រាញ់សារធាតុអ៊ុយរ៉ាញ៉ូមរបស់អ៊ីរ៉ង់ ដែលបានឈាន​ជិត​​ដល់កម្រិត​ផលិត​អាវុធ​នុយក្លេអ៊ែរ​។

ថ្មីៗ​នេះ រដ្ឋមន្ត្រីការបរទេសអ៊ីរ៉ង់ លោក Abbas Araqchi បានរំលឹកឡើងវិញនូវជំហររបស់អ៊ីរ៉ង់ចំពោះសិទ្ធិនុយក្លេអ៊ែររបស់ខ្លួន ដោយបញ្ជាក់ថា សមត្ថភាពចម្រាញ់សារធាតុអ៊ុយរ៉ាញ៉ូមរបស់ក្រុង​តេហេរ៉ង់​គឺមិនអាចចរចាបានទេ។ លោកបាន​បញ្ជាក់​ថា កម្មវិធីនុយក្លេអ៊ែររបស់អ៊ីរ៉ង់មានគោលបំណងសន្តិភាព ហើយការចរចាណាមួយត្រូវតែគោរពសិទ្ធិអធិបតេយ្យភាពរបស់អ៊ីរ៉ង់។

ពាក់ព័ន្ធ​នឹង​ភាព​តានតឹង​ជុំវិញ​កម្មវិធី​​នុយក្លេអ៊ែរ​នេះ ក្រសួងរតនាគារសហរដ្ឋអាមេរិកបានដាក់ទណ្ឌកម្មថ្មីលើបុគ្គល និងអង្គភាពពាក់ព័ន្ធក្នុងកម្មវិធីមីស៊ីល​បាលិស្ទិក​របស់អ៊ីរ៉ង់ ដែលធ្វើឲ្យភាពតានតឹងកាន់តែខ្លាំងឡើងរវាងប្រទេសទាំងពីរ។ ទណ្ឌកម្មទាំងនេះគឺជាផ្នែកមួយនៃយុទ្ធនាការ«សម្ពាធអតិបរមា» ដែលកំពុង​ធ្វើ​ឡើង​ក្រោម​​រដ្ឋបាលលោក ត្រាំ ប្រឆាំងនឹងអ៊ីរ៉ង់។

ទោះបីជាមានភាព​តានតឹង​​កើនឡើងក៏ដោយ ក៏កិច្ចខិតខំប្រឹងប្រែងការទូតនៅតែបន្ត​ដដែល។ អ្នកការទូតអ៊ីរ៉ង់ និងអឺរ៉ុប គ្រោងនឹងជួបប្រជុំគ្នានៅទីក្រុងអ៊ីស្តង់ប៊ុល​នា​ថ្ងៃ​សុក្រ​សប្ដាហ៍នេះ ដើម្បីពិភាក្សាអំពីក្របខ័ណ្ឌនៃកិច្ចព្រមព្រៀងនុយក្លេអ៊ែរថ្មីដ៏មានសក្តានុពល។ លោក Araqchi បានបញ្ជាក់ថា កិច្ចពិភាក្សាទាំងនេះមានគោលបំណងដោះស្រាយការខ្វែងគំនិតគ្នា​ជុំវិញការចម្រាញ់សារធាតុអ៊ុយរ៉ាញ៉ូម និងស្វែងរកការឯកភាព​​យ៉ាង​ទូលំទូលាយ​ក្នុងតំបន់​​លើបញ្ហាសន្តិសុខ៕

ដោយ៖ ឈាង