ពូទីន ធ្វើទស្សនកិច្ចតំបន់ Kursk ជាលើកដំបូង ចាប់តាំងពីរុស្ស៊ី រំដោះពីអ៊ុយក្រែន បានវិញ

មេដឹកនាំវិមានក្រឹមឡាំង វ្ល៉ាឌីមៀរ ពូទីន បានបំពេញទស្សនកិច្ចយ៉ាងភ្ញាក់ផ្អើលទៅកាន់តំបន់ Kursk ហើយក្នុងអំឡុងពេលនោះ លោកក៏ទៅមើលរោងចក្រនុយក្លេអ៊ែរ Kursk 2 ថ្មីផងដែរ។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT នៅថ្ងៃពុធទី២១ខែឧសភាឆ្នាំ២០២៥ នេះគឺជាលើកដំបូងហើយដែលប្រមុខរដ្ឋាភិបាលទីក្រុងមូស្គូ ធ្វើដំណើរទៅទីនោះ ចាប់តាំងពីកងកម្លាំងរុស្ស៊ី រំដោះបានទឹកដី Kursk ពីអ៊ុយក្រែន។

ក្នុងសេចក្តីថ្លែងការណ៍របស់វិមានក្រឹមឡាំង៖ អំឡុងដំណើរទស្សនកិច្ច លោកពូទីន បានជួបជាមួយអភិបាលតំបន់ Aleksandr Khinshtein ព្រមទាំងប្រជាពលរដ្ឋនិងក្រុមអ្នកស្ម័គ្រចិត្ត ដែលត្រូវរងទុក្ខនិងផលប៉ះពាល់ពីការវាយលុករបស់អ៊ុយក្រែន។

ទោះបីជាយ៉ាងណាក៏ដោយ លោកពូទីនបានប្រាប់ទៅអ្នកទាំងនោះថា ស្ថានការណ៍ក្នុងតំបន់ Kursk មិនទាន់ធូរស្រាលទេ ទោះរុស្ស៊ីរំដោះបានទាំងស្រុងក៏ដោយ ព្រោះកងទ័ពទីក្រុងកៀវ នៅតែចិញ្ចឹមចិត្ត ប៉ុនប៉ងវាយលុកចូលព្រំដែនរុស្ស៊ីដដែល។ 

សូមជម្រាបថា អ៊ុយក្រែនបានបើកប្រតិបត្តិការវាយលុកចូលតំបន់ Kursk កាលពីខែសីហាឆ្នាំមុន ដោយប្រើយន្តហោះគ្មានមនុស្សបើកនិងសព្វាវុធធុនធ្ងន់ដែលផ្គត់ផ្គង់ដោយលោកខាងលិច ដើម្បីវាយលុកតាមព្រំដែនរុស្ស៊ី ហើយមានពេលមួយកងទ័ពលោកហ្សេលេនស្គី ថែមទាំងវាយចូលគ្រប់គ្រងបានទឹកដីរហូតដល់ទៅ ១ ៤០០គីឡូម៉ែត្រក្រឡាទៀតផង។

យ៉ាងណា កាលពីចុងខែមេសា លោកពូទីន បានប្រកាសពីការរំដោះបានទឹកដីនេះទាំងស្រុងមកវិញ ខណៈក្រសួងការពារជាតិរុស្ស៊ី អះអាងកាលនោះថា មានកងទ័ពអ៊ុយក្រែនច្រើននាក់ បានបាត់បង់ជីវិត៕

អត្ថបទ៖ សុខ សុវណ្ណ

ចុចអាន៖ និយាយទូរស័ព្ទជាមួយពូទីនចប់ភ្លាម, ត្រាំ បន្ទោស បៃដិន ថា មិនគួរលូកដៃចូលសង្គ្រាមរុស្ស៊ី-អ៊ុយក្រែន សោះ