ព័ត៌មានអន្ដរជាតិ

សម្ដេចប៉ាប Leo ប្រាប់ថាបើកទ្វារបុរីវ៉ាទីកង់ឲ្យរុស្ស៊ី-អ៊ុយក្រែនធ្វើជាកន្លែងចរចាសន្ដិភាព

បានផុស

១ year មុន

នៅ

ថ្ងៃពុធ ២១ ឧសភា ២០២៥

ដោយ

Chheang

សម្ដេចប៉ាប Leo XIV បានបញ្ជាក់ពីឆន្ទៈរបស់បុរីវ៉ាទីកង់ ក្នុងការធ្វើជាម្ចាស់ផ្ទះកិច្ចចរចាសន្តិភាពរវាងអ៊ុយក្រែន និងរុស្ស៊ី។ នេះបើយោងតាមការប្រកាសរបស់នាយករដ្ឋមន្ត្រីអីតាលី លោកស្រី Giorgia Meloni កាលពីថ្ងៃទី២០ខែឧសភា បន្ទាប់ពីការសន្ទនាតាមទូរសព្ទជាមួយសម្ដេចប៉ាប Leo។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយត្រូវរើសតាំងឲ្យបន្តវេនពីសម្ដេចប៉ាប Francis នៅក្នុងខែឧសភានេះ សម្តេចប៉ាប Leo បានសម្តែងការប្តេជ្ញាចិត្តយ៉ាងមុតមាំ ចំពោះកិច្ចខិតខំប្រឹងប្រែងសន្តិភាពពិភពលោក។ នៅក្នុងសុន្ទរកថានាពេលថ្មីៗ ទ្រង់បានសង្កត់ធ្ងន់លើការត្រៀមខ្លួនរបស់បុរីវ៉ាទីកង់ ក្នុងការដើរតួជាអ្នកសម្រុះសម្រួលក្នុងជម្លោះអន្តរជាតិ។

សេចក្តីថ្លែងការណ៍របស់រដ្ឋាភិបាលអ៊ីតាលី បានសរសេរថា «ដោយទទួលបានការបញ្ជាក់ពីព្រះបិតាដ៏បរិសុទ្ធអំពីការត្រៀមខ្លួនដើម្បីធ្វើជាម្ចាស់ផ្ទះកិច្ចចរចាបន្ទាប់រវាងភាគីនានានៅបុរីវ៉ាទីកង់ លោកស្រីនាយករដ្ឋមន្ត្រីបានសម្តែងការដឹងគុណយ៉ាងជ្រាលជ្រៅចំពោះសម្តេចប៉ាប Leo XIV ចំពោះការប្តេជ្ញាចិត្តមិនឈប់ឈររបស់ទ្រង់ចំពោះសន្តិភាព»។

កិច្ចចរចាចុងក្រោយបំផុតរវាងអ៊ុយក្រែន និងរុស្ស៊ី បានធ្វើឡើងនៅទីក្រុងអ៊ីស្តង់ប៊ុលនៃប្រទេសតួកគីកាលពីថ្ងៃទី១៦ឧសភា ដែលជាការចរចាដោយផ្ទាល់លើកដំបូងរវាងភាគីទាំងពីរចាប់តាំងពីឆ្នាំ២០២២។ កិច្ចពិភាក្សាមានរយៈពេលតិចជាងពីរម៉ោងដោយមិនឈានដល់កិច្ចព្រមព្រៀងធំដុំអ្វីឡើយ ក្រៅតែពីការផ្លាស់ប្ដូរអ្នកទោស។

កាលពីថ្ងៃទី១៩ខែឧសភា ប្រធានាធិបតីអាមេរិក លោក ដូណាល់ ត្រាំ បានប្រកាសថា រុស្ស៊ី និងអ៊ុយក្រែននឹងចាប់ផ្តើមការចរចាបទឈប់បាញ់ភ្លាមៗ បន្ទាប់ពីការសន្ទនាតាមទូរសព្ទរយៈពេលជាងពីរម៉ោងជាមួយប្រធានាធិបតីរុស្ស៊ីលោក វ៉្លាឌីមៀរ ពូទីន។ លោក ត្រាំ ចាត់ទុកការហៅទូរសព្ទលើកនេះថាទទួលបានផ្លែផ្កាល្អ ដោយបញ្ជាក់ថា មេដឹកនាំទាំងពីរបានយល់ព្រមការផ្តួចផ្តើមកិច្ចចរចាក្នុងគោលបំណងដើម្បីសម្រេចបាននូវបទឈប់បាញ់ និងកិច្ចព្រមព្រៀងសន្តិភាពដ៏ទូលំទូលាយមួយ។ លោកបានស្នើបុរីវ៉ាទីកង់ជាកន្លែងដ៏សក្ដិសមសម្រាប់ការចរចា ដោយមានសម្តេចប៉ាប Leo XIV ស្ម័គ្រចូលរួមសម្រួលដល់កិច្ចពិភាក្សា។

ចំណែកឯប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី បានឆ្លើយតបដោយបញ្ជាក់សាជាថ្មីអំពីការត្រៀមខ្លួនរបស់អ៊ុយក្រែន សម្រាប់បទឈប់បាញ់ដោយគ្មានលក្ខខណ្ឌ និងបានអំពាវនាវឲ្យមានការបង្កើនសម្ពាធអន្តរជាតិលើប្រទេសរុស្ស៊ីឲ្យចូលរួមក្នុងការចរចាដោយស្មោះត្រង់។ លោកក៏បានស្នើផងដែរថា ការពិភាក្សានៅពេលអនាគតអាចត្រូវបានរៀបចំនៅទីតាំងអព្យាក្រឹត ដូចជា បុរីវ៉ាទីកង់ ស្វីស ឬតួកគី៕