ក្រសួងវប្បធម៌ គ្រោងដាក់បញ្ចូលភ្នំដា និងអង្គរបុរី ក្នុងបញ្ជីបេតិកភណ្ឌវប្បធម៌ពិភពលោក

នៅថ្ងៃទី៧ ខែឧសភា ឆ្នាំ២០២៥ លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈបានរៀបចំកិច្ចប្រជុំអន្តរក្រសួងលើកទី១ ស្ដីពីការរៀបចំឯកសារដាក់បញ្ចូលភ្នំដា និងអង្គរបុរី ក្នុងបញ្ជីបេតិកភណ្ឌវប្បធម៌ពិភពលោកនៃអង្គការយូណេស្កូ នាពេលខាងមុខ។ នេះបើតាមក្រសួងវប្បធម៌។

ក្រសួងបានឱ្យដឹងថា កិច្ចប្រជុំនេះ ធ្វើឡើងដើម្បីណែនាំសមាសភាពក្រុមកាងារ និងស្តាប់របាយការណ៍បច្ចុប្បន្នភាពនៃការដាក់បញ្ចូលស្ថានីយភ្នំដា និងអង្គរបុរី ស្ថិតនៅខេត្តតាកែវ ទៅក្នុងបញ្ជីបេតិកភណ្ឌវប្បធម៌ពិភពលោករបស់អង្គការយូណេស្កូនាពេលខាងមុខ។

ចំពោះកិច្ចប្រជុំ មានការចូលរួមពីសមាភាពនៃក្រសួង និងស្ថាប័នចំនួន១១ ដែលមានរដ្ឋលេខាធិការតំណាងក្រសួងពាក់ព័ន្ធ និងការចូលរួមពី អភិបាលខេត្តតាកែវ លោក វ៉ី សំណាង ផងដែរ។

ភ្នំដា គឺជារមណីយដ្ឋានទេសចរណ៍វប្បធម៌ និងប្រវត្តិសាស្ត្រមួយកន្លែង ដែលស្ថិតនៅខាងកើតទីរួមខេត្តតាកែវ ក្នុងភូមិព្រែកតាផ ឃុំគោកធ្លក ស្រុកអង្គរបូរី ខេត្តតាកែវ។ ភ្នំដា មានចម្ងាយ ២៥គីឡូម៉ែត្រតាមផ្លូវទឹក និង៦៥គីឡូម៉ែត្រតាមផ្លូវគោកពីទីរួមខេត្តតាកែវ៕