អ៊ីស្រាអែល ទម្លាក់គ្រាប់បែកលើសាលារៀនជាជម្រកជនភៀសខ្លួន នៅហ្គាហ្សា សម្លាប់មនុស្ស ២០នាក់

ប្រទេសអ៊ីស្រាអែល មិនបន្ថយដៃឡើយ ដោយនៅថ្ងៃចន្ទទី២៦ខែឧសភាឆ្នាំ២០២៥ កងកម្លាំងលោក Benjamin Netanyahu បន្តវាយប្រហារយ៉ាងចាស់ដៃលើតំបន់ហ្គាហ្សា ដោយទម្លាក់គ្រាប់បែកលើសាលារៀន Fahmi Al-Jarjawi ដែលយកធ្វើជាជម្រកជនភៀសខ្លួន សម្លាប់មនុស្សចំនួន២០នាក់ ដោយក្នុងនោះមានទាំងកុមារផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Al Jazeera, អ៊ីស្រាអែល បានបើកការវាយប្រហារនេះនៅសង្កាត់ Daraj ដោយបង្កជាអគ្គិភ័យយ៉ាងសន្ធោសន្ធៅ ហើយក្រៅពីមនុស្សស្លាប់ក៏មានរាប់សិបនាក់ទៀតរងរបួសផងដែរ ខណៈមានសេចក្តីរាយការណ៍ថា កុមារមួយចំនួនត្រូវជាប់នៅក្រោមគំនរថ្មបាក់បែក។

ទង្វើចុងក្រោយបំផុតនេះរបស់អ៊ីស្រាអែល បានបង្កឲ្យមានការថ្កោលទោសយ៉ាងខ្លាំងពីសំណាក់អន្តរជាតិ ដោយអំពាវនាវឲ្យលោក Netanyahu បញ្ឈប់ការសម្លាប់ជនស៊ីវិលស្លូតត្រង់ជាបន្ទាន់។

កាលពីសប្តាហ៍មុន ​អ៊ីស្រាអែល ក៏បើកការវាយប្រហារអាកាសនិងបាញ់ផ្លោង សម្លាប់ជនជាតិប៉ាឡេស្ទីន​នៅតំបន់​ហ្គាហ្សា​ ៥២នាក់ផងដែរ ចំពេលមានវិបត្តិមនុស្សធម៌និងការកើនឡើងសម្ពាធជាសកល។

ដ្បិតមានការប្រកាសដោយអ៊ីស្រាអែលថា រថយន្ត​ដឹក​ជំនួយចំនួន៩៣គ្រឿង ត្រូវបានអនុញ្ញាតឲ្យចូលទៅក្នុងហ្គាហ្សាតាមរយៈច្រក Karem Abu Salem ក៏ដោយ ប៉ុន្តែ​មានតែ៥​គ្រឿងប៉ុណ្ណោះ ដែលបានទៅដល់ភាគីប៉ាឡេស្ទីន ខណៈរថយន្តនៅសល់ ត្រូវជាប់គាំងនៅព្រំដែនដោយសារអ៊ីស្រាអែលរឹតបន្តឹង។

ក្រុម​អង្គការ​មនុស្សធម៌ជាច្រើន បានថ្កោលទោស​ចំពោះ​​ការផ្តល់​ជំនួយរឹតត្បិតនេះ ហើយចោទប្រកាន់អ៊ីស្រាអែលថា គ្រាន់តែធ្វើដើម្បី​បង្វែរ​ការចោទប្រកាន់អំពីភាពអត់ឃ្លាននៅហ្គាហ្សាប៉ុណ្ណោះ។

សូមជម្រាបជាថ្មី យុទ្ធនាការរបស់អ៊ីស្រាអែលនៅហ្គាហ្សា ផ្តើមឡើងបន្ទាប់ពីក្រុមសកម្មប្រយុទ្ធឥស្លាមហាម៉ាស បើកការវាយប្រហារអ៊ីស្រាអែលកាលពីថ្ងៃទី៧ខែតុលាឆ្នាំ២០២៣ សម្លាប់មនុស្សប្រហែល ១ ២០០នាក់។ អ៊ីស្រាអែល បានសម្លាប់មនុស្សជាង ៥៣ ០០០នាក់ ភាគច្រើនជាជនស៊ីវិល, បំផ្លិចបំផ្លាញតំបន់ហ្គាហ្សា និងបង្ខំមនុស្សជិតពីរលាននាក់ រត់ចោលផ្ទះសម្បែង៕

អត្ថបទ៖ សុខ សុវណ្ណ

ចុចអាន៖ Netanyahu ចោទ ៣ប្រទេស ថា កាន់ជើងក្រុមហាម៉ាស