ឥណ្ឌា​ចាប់​ខ្លួន​មនុស្ស​៨១​នាក់​ពី​បទ​«អាណិត»​ប៉ាគីស្ថាន

ប៉ូលិសឥណ្ឌា បានចាប់ខ្លួនមនុស្សរាប់សិបនាក់ ដែលត្រូវបានចោទប្រកាន់ថាបានគាំទ្រប្រទេសប៉ាគីស្ថាន មួយខែបន្ទាប់ពីប្រទេសទាំងពីរត្រូវបានជាប់គាំងនៅក្នុងជម្លោះដ៏អាក្រក់បំផុតរបស់ពួកគេក្នុងរយៈពេលជាច្រើនទសវត្សរ៍កន្លង​មក។

យោង​តាម​ការ​ចុះផ្សាយ​ថ្ងៃ​ទី​​២​ខែ​មិថុនា​របស់​ទីភ្នាក់ងារ​ព័ត៌មាន AFP ការ​ចាប់​ខ្លួន​ធ្វើ​ឡើង​នៅ​​ក្នុង​រដ្ឋ Assam ហើយ​លោក​អភិបាល​ក្រុង Himanta Biswa Sarma បាន​និយាយ​ថា ប៉ូលិសបានធ្វើប្រតិបត្តិការទ្រង់ទ្រាយធំ ដោយចាប់ខ្លួន«ជនក្បត់ជាតិចំនួន ៨១នាក់» ក្រោមបទចោទប្រកាន់ «អាណិតអាសូរ» សម្រាប់ប៉ាគីស្ថាន។

លោក Sarma បានបន្ថែមថា អាជ្ញាធរកំពុងត្រួតពិនិត្យជានិច្ចនូវការបង្ហោះ «ប្រឆាំងជាតិ» នៅលើប្រព័ន្ធផ្សព្វផ្សាយសង្គម និងចាត់វិធានការទៅតាមនោះ។ យោងតាមប៉ូលិស​នៅ​រដ្ឋ Assam មនុស្សម្នាក់ត្រូវបានចាប់ខ្លួនបន្ទាប់ពីការបង្ហោះទង់ជាតិប៉ាគីស្ថាននៅលើ Instagram។

ប្រទេសឥណ្ឌា បានរឹតបន្តឹងការគ្រប់គ្រងលើប្រព័ន្ធផ្សព្វផ្សាយសង្គម ចាប់តាំងពីជម្លោះជាមួយប៉ាគីស្ថានបានផ្ទុះឡើង បន្ទាប់ពីមានការវាយប្រហារលើអ្នកទេសចរនៅក្នុងតំបន់ Jamur និង Kashmir កាលពីថ្ងៃទី​២២​ខែមេសា។

កាល​ពី​ព្រឹក​ថ្ងៃ​ទី​៧​ខែ​ឧសភា ឥណ្ឌា​បាន​បើក​ប្រតិបត្តិការ «Sindoor» ដោយ​វាយ​ប្រហារ​ទីតាំង​ចំនួន​៩ ដែល​ខ្លួន​ចាត់​ទុក​ថា​ជា​មូលដ្ឋាន​ភេរវជន​ក្នុង​ទឹកដី​ប៉ាគីស្ថាន និង​តំបន់ Kashmir ដែល​គ្រប់គ្រង​ដោយ​ក្រុង​អ៊ីស្លាម៉ាបាត។ ប៉ាគីស្ថានបានប្រកាសថា ខ្លួនបានបាញ់ទម្លាក់យន្តហោះចម្បាំងឥណ្ឌាចំនួន ៥​គ្រឿង រួមទាំងយន្តហោះចម្បាំង Rafale ទំនើបផលិតដោយបារាំងចំនួន ៣​គ្រឿង និងយន្តហោះគ្មានមនុស្សបើករយៈចម្ងាយមធ្យម Heron ១​គ្រឿង។

ការប្រយុទ្ធគ្នារវាងឥណ្ឌា និងប៉ាគីស្ថានបានបន្តរហូតដល់ថ្ងៃទី​១០​ខែឧសភា នៅពេលដែលភាគីទាំងពីរបានប្រកាសថា ពួកគេបានឈានដល់បទឈប់បាញ់​ក្រោម​ការសម្រុះសម្រួល​ពី​សហរដ្ឋអាមេរិក។

ទីភ្នាក់ងារប្រឆាំងភេរវកម្ម​ឥណ្ឌា ក៏បានចាប់ខ្លួនមន្ត្រីទាហានប៉ារ៉ាមួយរូបកាលពីខែមុនផងដែរ ដោយចោទប្រកាន់ពីបទធ្វើចារកម្ម​ឲ្យ​ប៉ាគីស្ថាន។ កាល​ពី​ខែ​ឧសភា អាជ្ញាធរ​បាន​ចាប់​ខ្លួន​មនុស្ស​យ៉ាង​ហោច​ណាស់ ១០នាក់​ពី​បទ​ចារកម្ម៕

ដោយ៖ ឈាង