ព័ត៌មានអន្ដរជាតិ

យន្តហោះ Air India មួយទៀតត្រូវបង្ខំចុះចតភ្លាមៗសង្ស័យបញ្ហាបច្ចេកទេស

បានផុស

១១ ខែ មុន

នៅ

ថ្ងៃចន្ទ ១៦ មិថុនា ២០២៥

ដោយ

នៅព្រឹកថ្ងៃចន្ទនេះ យន្តហោះប្រភេទ Boeing 787-8 Dreamliner ជើងហោះហើរ AI-315 ពីហុងកុងទៅទីក្រុងដេលី របស់ក្រុមហ៊ុនអាកាសចរណ៍ Air India ត្រូវបានបង្ខំឱ្យត្រឡប់ទៅហុងកុងវិញភ្លាមៗ បន្ទាប់ពីហោះឡើង ដោយសារតែមានការសង្ស័យពីបញ្ហាបច្ចេកទេស។ នេះបើយោងតាមការចេញផ្សាយរបស់កាសែត The Times of India នៅថ្ងៃទី១៦ខែមិថុនានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមអាកាសយាននិកបានរកឃើញបញ្ហានេះនៅពាក់កណ្តាលអាកាស ហើយបានជ្រើសរើសការត្រឡប់មកវិញជាការប្រុងប្រយ័ត្ន។ អ្នកដំណើរទាំងអស់បានចុះចតដោយសុវត្ថិភាព ទោះបីជាក្រុមហ៊ុន Air India មិនទាន់ចេញសេចក្តីថ្លែងការណ៍ផ្លូវការក៏ដោយ។

ជាមួយគ្នានេះ កាលពីថ្ងៃអាទិត្យ ក៏មាន ជើងហោះហើរ Air India (AI-819) មួយទៀតដែលធ្វើដំណើរពីទីក្រុង ដេលី ទៅកាន់ទីក្រុង Vadodara ត្រូវត្រឡប់ទៅអាកាសយានដ្ឋានអន្តរជាតិ Indira Gandhi វិញភ្លាមៗ បន្ទាប់ពីហោះឡើង ដោយសារតែសង្ស័យថាមានបញ្ហាឧបករណ៍ចុះចត។ យ៉ាងណាយន្តហោះនេះបានចុះចតដោយសុវត្ថិភាពដោយគ្មានអ្នករបួស។

ឧបទ្ទវហេតុនេះទាំងនេះបានកើតឡើងតែប៉ុន្មានថ្ងៃបន្ទាប់ពីសោកនាដកម្ម កាលពីថ្ងៃទី ១២ ខែមិថុនា ដែលយន្តហោះ Air India Boeing 787-8 Dreamliner របស់ទីក្រុងឡុងដ៍បានធ្លាក់បន្ទាប់ពីហោះចេញពីទីក្រុង Ahmedabad ។ ក្នុងហេតុការណ៍នោះយន្តហោះដែលផ្ទុកមនុស្ស ២៤២នាក់ បានធ្លាក់ចូលទៅក្នុងបរិវេណមហាវិទ្យាល័យវេជ្ជសាស្ត្រក្បែរនោះ។ មានតែអ្នកដំណើរម្នាក់ប៉ុណ្ណោះដែលនៅរស់រានមានជីវិត ខណៈពេលដែលអ្នកដំណើរ ២៤១ នាក់ និងមនុស្ស ២៩ នាក់នៅលើដី ដែលរួមទាំងនិស្សិតពេទ្យ ៥ នាក់ផងដែរបានបាត់បង់ជីវិត។

នៅពេលនេះក្រុមហ៊ុនអាកាសចរណ៍ Air India ស្ថិតនៅក្រោមការត្រួតពិនិត្យកាន់តែខ្លាំងឡើង បន្ទាប់ពីឧប្បត្តិហេតុយន្តហោះថ្មីៗជាច្រើននាំឲ្យមានការលើកឡើងពីការព្រួយបារម្ភអំពីសុវត្ថិភាពប្រតិបត្តិការ។ ព្រឹត្តិការណ៍ត្រឡប់មកវិញទាំងនេះរឹតតែជំរុញឱ្យមានការព្រួយបារម្ភអំពីពិធីការសុវត្ថិភាពរបស់ក្រុមហ៊ុនអាកាសចរណ៍កាន់តែខ្លាំងថែមទៀត ខណៈការស៊ើបអង្កេតលើករណីទាំងនេះកំពុងបន្ត៕