នាវាដឹកប្រេងបុកគ្នានៅ​ច្រកសមុទ្រ Hormuz ចំពេល​អ៊ីស្រាអែលនិងអ៊ីរ៉ង់​ប្រយុទ្ធ​គ្នា​

នាវាដឹកជញ្ជូនប្រេងឆៅដ៏ធំចំនួនពីរបានបុកគ្នានៅក្នុងដែនទឹកនៃសហភាពអារ៉ាប់រួម នៅជិតច្រកសមុទ្រ Hormuz ​ដែល​​​​នៅ​ក្រោម​​ឥទ្ធិពល​​​អ៊ីរ៉ង់​ និងបានឆេះកាលពីព្រឹកថ្ងៃអង្គារ ដោយធ្វើឱ្យទីផ្សារប្រេង និងដឹកជញ្ជូនទូទាំងពិភពលោកមានការរអាក់រអួល។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី១៨ខែមិថុនានេះ។

នាវាដឹកប្រេងពីរគ្រឿងនេះ មាននាវា Front Eagle និងនាវា Adalynn។ ឧបទ្ទវហេតុនេះមិនមានអ្នករងរបួស ឬការធ្លាយប្រេងត្រូវបានរាយការណ៍​នោះ​ទេ ប៉ុន្តែឆ្មាំឆ្នេរសមុទ្រអារ៉ាប់រួមអេមីរ៉ាត បានជម្លៀសសមាជិកនាវិក ២៤នាក់ចេញពីនាវា Adalynn ខណៈដែលបុគ្គលិកទាំងអស់នៅលើនាវា Front Eagle មានសុវត្ថិភាពធម្មតា។

នៅពេលបុកគ្នានាវា Front Eagle កំពុងដឹកជញ្ជូនប្រេងឆៅរបស់អ៊ីរ៉ាក់ចំនួន ២លានបារ៉ែលទៅកាន់ប្រទេសចិន ខណៈដែលនាវា Adalynn មិនមានដឹកអ្វីទេ ហើយកំពុងធ្វើដំណើរទៅកាន់ប្រទេសអេហ្ស៊ីប។

ឧបទ្ទវហេតុនេះមិនទាក់ទងដោយផ្ទាល់ទៅនឹងការប្រយុទ្ធគ្នារវាងអ៊ីស្រាអែល និងអ៊ីរ៉ង់នោះទេ ប៉ុន្តែវាបានកើតឡើងមួយថ្ងៃ បន្ទាប់ពីប្រតិបត្តិការពាណិជ្ជកម្មដែនសមុទ្ររបស់ចក្រភពអង់គ្លេសបាននិយាយថាបានទទួលរបាយការណ៍ជាច្រើននៃ «ការកើនឡើងការវាយប្រហារតាមអេឡិចត្រូនិក» នៅក្នុងតំបន់ ដែលទំនងជាមានទំនាក់ទំនងជាមួយនឹងជម្លោះបច្ចុប្បន្ន។

ជាមួយគ្នានេះព័ត៌មាននាវាដឹកប្រេងបុកគ្នានេះបានទាក់ទាញចំណាប់អារម្មណ៍របស់អ្នកដឹកជញ្ជូន និងពាណិជ្ជករប្រេងក្នុងការជួញដូរនៅអាស៊ី និងមជ្ឈិមបូព៌ា បារម្មណ៍ថាហេតុការណ៍នេះមានទាក់ទងទៅនឹងការវាយប្រហាររវាងអ៊ីស្រាអែល និងអ៊ីរ៉ង់៕

អត្ថបទ៖​ ប៊ុន សុភាព