បំផ្ទុះគ្រាប់​បែកអត្តឃាតពេលអធិដ្ឋាន សម្លាប់​មនុស្ស​២២នាក់ស្លាប់​​និង​៦៣នាក់របួស​នៅស៊ីរី​

យោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី២៣ខែមិថុនានេះ ការបំផ្ទុះគ្រាប់បែកអត្តឃាតដ៏បំផ្លិចបំផ្លាញ​​មួយ ក្នុងអំឡុងពេលអធិដ្ឋានកាលពីថ្ងៃអាទិត្យនៅឯវិហារគ្រិស្ត Orthodox Mar Elias ក្បែរទីក្រុងដាម៉ាស (Damascus) ប្រទេសស៊ីរី​ បានសម្លាប់មនុស្សយ៉ាងហោចណាស់ ២២ នាក់ និង៦៣នាក់ផ្សេងទៀតរងរបួស។

សាក្សី​បាន​និយាយ​ថា អ្នក​បំផ្ទុះគ្រាប់បែកបានពាក់​អាវ​បិទ​មុខ​​ចូល​ទៅ​ក្នុង​ព្រះវិហារនិង​បើក​ការ​បាញ់​ប្រហារ ហើយ​បន្ទាប់​មក​​បាន​បំផ្ទុះ​អាវ​កាក់​ដែលពោពេញដោយគ្រាប់បែក ទោះបី​អ្នក​នៅក្នុងហេតុការណ៍​ព្យាយាម​រារាំង​ក៏ដោយ។ របាយការណ៍​ខ្លះក៏បានលើកឡើងថា មានខ្មាន់កាំភ្លើងម្នាក់ផ្សេងផងដែរ​ ខណៈក្នុងអំឡុងពេលនោះមានអ្នកចូលរួម៣៥០នាក់។

ការវាយប្រហារនេះជាការវាយប្រហារមួយដែលមានមនុស្សស្លាប់ច្រើនបំផុតក្នុងរយៈពេលប៉ុន្មានឆ្នាំមកនេះប្រឆាំងនឹងគ្រិស្តបរិស័ទក្នុងប្រទេសស៊ីរី។ គ្មាន​ក្រុម​ណា​មួយ​​ចេញ​មុខ​អះអាង​ទទួល​ខុស​ត្រូវ​ជា​ផ្លូវ​ការ​ទេ ប៉ុន្តែ​អាជ្ញាធរ​សង្ស័យ​ថា​ជា​​​ទង្វើរបស់​ក្រុម​រដ្ឋ​ឥស្លាម។ ចំណែកមន្ត្រីក្រសួងមហាផ្ទៃបានស្តីបន្ទោសក្រុមជ្រុលនិយម និងក្រុមគាំទ្រអតីត​ប្រធានាធិបតី​លោក អាសាដ ចំពោះការព្យាយាមធ្វើឱ្យប្រទេសមានអស្ថិរភាព។

សោកនាដកម្មនេះ គូសបញ្ជាក់ពីគំរាមកំហែងនៃអំពើហិង្សាជ្រុលនិយមនៅក្នុងប្រទេសស៊ីរី ទោះបីជាមានការខិតខំប្រឹងប្រែងដើម្បីស្ដារសន្តិសុខនៅក្នុងតំបន់ដែលគ្រប់គ្រងដោយរដ្ឋាភិបាលកណ្តាលក៏ដោយ៕

អត្ថបទ៖ ប៊ុន សុភាព