​​ថ្នាំញៀន​ជាង​២​តោន​បន្លំជាម្សៅពោត ​តម្លៃ​៩០​លាន​ដុល្លារ​ ត្រូវចាប់​នៅថៃ​

យោងតាមការចេញផ្សាយរបស់ទីភ្នាក់ងារព័ត៌មាន ​AP នៅថ្ងៃទី២៤ខែមិថុនានេះ អាជ្ញាធរថៃបានរឹបអូសថ្នាំញៀនមេតំហ្វេតាមីនគ្រីស្តាល់( ម៉ាទឹកកក) ជិត ២,៤តោន មានតម្លៃជាង ៩០លានដុល្លារ ពីទូកទេសចរណ៍ដែលចូលចតក្បែរផែក្នុងខេត្ត Rayong ភាគខាងកើតប្រទេសថៃ។

គ្រឿងញៀនដ៏ច្រើនសម្បើមនេះ លាក់ក្នុងថង់ប្លាស្ទិកបន្លំធ្វើជាកញ្ចប់ម្សៅពោត ត្រូវស្ទាក់ចាប់បានកាលពីថ្ងៃសៅរ៍ មុនពេលរត់ពន្ធឆ្លងកាត់ព្រំដែនភាគខាងត្បូងប្រទេសថៃ។ បុរស​៨​នាក់​ត្រូវ​ចាប់ខ្លួន​ពាក់ព័ន្ធ​នឹង​ប្រតិបត្តិការ​នេះ​។ លើសពីនេះអាជ្ញាធរក៏បាន​រឹបអូស​រថយន្ត​មួយ​គ្រឿង និង​រថយន្ត​ដឹកទំនិញ​ដែល​គេ​ជឿថា​ជា​ផ្នែក​នៃ​បណ្តាញ​រត់ពន្ធ​។

នាយកដ្ឋានស៊ើបអង្កេតពិសេសថៃបានប៉ាន់ប្រមាណថា គ្រឿងញៀនអាចលក់បានច្រើនជាង ៣ពាន់លានបាត (៩០,៨ លានដុល្លារ) ប្រសិនបើលក់ទៅក្រៅប្រទេស។

យោងតាមអង្គការសហប្រជាជាតិ គ្រឿងញៀនភាគច្រើននៅក្នុងតំបន់មានប្រភពមកពីប្រទេសជិតខាងមីយ៉ាន់ម៉ា ចេញពីតំបន់ «ត្រីកោណមាស» ដែលជាតំបន់ព្រំដែនរវាងមីយ៉ាន់ម៉ា ឡាវ និងថៃ។ តំបន់នេះនៅតែជាចំណុចក្តៅសកលសម្រាប់ការផលិតគ្រឿងញៀន ខណៈមេតំហ្វេតាមីនឥឡូវនេះបានវ៉ាដាច់អាភៀន និងហេរ៉ូអ៊ីនក្លាយជាផលិតផលចម្បងដោយសារ​វាងាយស្រួលផលិតនិងបានទ្រង់ទ្រាយធំ។

របាយការណ៍របស់អង្គការសហប្រជាជាតិនាពេលថ្មីៗនេះ បានគូសបញ្ជាក់ពីកំណត់ត្រានៃការរឹបអូសថ្នាំញៀនចំនួន ២៣៦ តោននៅទូទាំងតំបន់អាស៊ីអាគ្នេយ៍ក្នុងឆ្នាំ ២០២៤ ពោលគឺកើនឡើង ២៤% ពីឆ្នាំមុន ដែលបង្ហាញពីវិបត្តិគ្រឿង​ញៀន​ដែល​កំពុងកើនឡើងនៅក្នុងតំបន់៕

អត្ថបទ៖ ប៊ុន សុភាព