ព័ត៌មានអន្ដរជាតិ

អនុរដ្ឋមន្ត្រីក្រសួងការពារជាតិថៃ ចេញមុខធានាសន្តិសុខជាតិ ទោះមានការរង្គោះរង្គើគណៈរដ្ឋមន្ត្រី

បានផុស

១ year មុន

នៅ

ថ្ងៃព្រហស្បតិ៍ ៣ កក្កដា ២០២៥

ដោយ

Chheang

អនុរដ្ឋមន្ត្រីក្រសួងការពារជាតិ លោក Nattaphon Narkphanit បានធានាដល់សាធារណជនថា សន្តិសុខជាតិរបស់ប្រទេសថៃនៅតែរឹងមាំ និងមិនមានការរំខាន ទោះបីជាតំណែងរដ្ឋមន្ត្រីការពារជាតិបច្ចុប្បន្ននៅទំនេរ បន្ទាប់ពីការរុះរើគណៈរដ្ឋមន្ត្រីនាពេលថ្មីៗនេះក៏ដោយ។ នេះបើយោងការចុះផ្សាយរបស់កាសែត Bangkok Post នៅថ្ងៃទី៣ខែកក្កដាឆ្នាំ២០២៥។

លោក Nattaphon Narkphanit (រូបថត៖ វិមានរដ្ឋាភិបាលថៃ)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Nattaphon ដែលត្រូវបានអនុញ្ញាតដោយច្បាប់ឲ្យធ្វើជារដ្ឋមន្ត្រីការពារជាតិស្តីទី បាននិយាយកាលថា ប្រតិបត្តិការសន្តិសុខទាំងអស់កំពុងដំណើរការ«ដូចធម្មតា» ដោយមិនមានការរំខានណាមួយឡើយ។ លោកបានបញ្ជាក់ថា ប្រព័ន្ធការពារសំខាន់ៗ និងការគ្រប់គ្រងព្រំដែនមានដំណើរការពេញលេញ។

តួនាទីជារដ្ឋមន្ត្រីក្រសួងការពារជាតិដែលមិនទាន់បានបំពេញនោះ ត្រូវបានគេរំពឹងយ៉ាងខ្លាំងថានឹងប្រគល់ឲ្យឧត្តមសេនីយ៍ Chalermpol Srisawat ដែលជាអតីតមេទ័ព និងជាសមាជិកព្រឹទ្ធសភា។ ទោះយ៉ាងណាក៏ដោយ លោក Chalermpol មិនអាចចូលកាន់តំណែងជាផ្លូវការបានទេរហូតដល់ក្រោយថ្ងៃទី៣០ខែកញ្ញា ដោយសារបើតាមផ្លូវច្បាប់ យ៉ាងហោចណាស់២ឆ្នាំទើបលោកអាចកាន់តំណែងរដ្ឋាភិបាលថ្មី ក្រោយបញ្ចប់ពីមុខងារជាសមាជិកព្រឹទ្ធសភា។

លោក Nattaphon ក៏បានលើកឡើងថា កិច្ចខិតខំប្រឹងប្រែងកំពុងធ្វើឡើងដើម្បីបន្ធូរបន្ថយភាពតានតឹងតាមបណ្តោយព្រំដែនកម្ពុជា-ថៃ។ មជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ (TCBSAC) ដែលប្រតិបត្តិការក្រោមក្រុមប្រឹក្សាសន្តិសុខជាតិ កំពុងសម្របសម្រួលជាមួយអាជ្ញាធរកម្ពុជា តាមរយៈគណៈកម្មាធិការព្រំដែនទូទៅ ដើម្បីរក្សាសន្តិសុខ និងស្ថិរភាពព្រំដែន៕

ដោយ៖ ឈាង

ចុចអាន៖ ថៃ ខឹង Google Map ពេលឃើញដៅទីតាំង ប្រាសាទតាមាន់ធំ នៅក្នុងដីខ្មែរ

Related Topics:ប្រទេសថៃ