ព័ត៌មានអន្ដរជាតិ

ចិននឹងរៀបចំជំនួបកំពូលធំបំផុតមិនធ្លាប់មាន នៃ SCO ដែលគេយល់ថា ជាណាតូអាស៊ី

បានផុស

១០ នាទីutes មុន

នៅ

ថ្ងៃពុធ ១៦ កក្កដា ២០២៥

ដោយ

ប្រទេសចិននឹងរៀបចំកិច្ចប្រជុំកំពូលមេដឹកនាំនៃអង្គការសហប្រតិបត្តិការសៀងហៃ (SCO) ដែលជាស្ថាប័នអន្តររដ្ឋាភិបាល នឹងត្រូវបានមជ្ឈដ្ឋានបស្ចឹមប្រទេស ចាត់ទុកជា «ណាតូប្រចាំតំបន់អាស៊ី» នឹងរៀបចំកិច្ចប្រជុំកំពូលដ៏ធំមិនធ្លាប់មានក្នុងប្រវតិ្តសាស្រ្តរបស់ខ្លួនក្នុងរយៈពេល២៥ឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីការបរទេសនៃប្រទេសសមាជិក SCO បានជួបប្រជុំនៅទីក្រុង Tianjin ដើម្បីត្រៀមរបៀបវារៈសម្រាប់កិច្ចប្រជុំកំពូលនៅថ្ងៃទី៣១ខែសីហាក្រោយនេះ។ អង្គការសហប្រតិបត្តិការសៀងហៃ (SCO) ត្រូវបានបង្កើតឡើងនៅថ្ងៃទី១៥ខែមិថុនា២០០១ នៅទីក្រុងសៀងហៃ ហើយសមាជិកភាគច្រើននៃអង្គការនេះ គឺជាប្រទេសនៅក្នុងតំបន់អាស៊ីកណ្តាល និងអាស៊ីអឺរ៉ុប។

ក្រសួងការបរទេសចិន បានផ្សព្វផ្សាយថា រដ្ឋមន្ត្រីការបរទេសចិន លោក វ៉ាង យី (Wang Yi) បាននិយាយថា៖«កិច្ចប្រជុំកំពូលនៅ Tianjin នឹងក្លាយជាកិច្ចប្រជុំធំបំផុតមួយនៅក្នុងប្រវត្តិសាស្រ្តនៃការអភិវឌ្ឍន៍របស់ SCO»។

រដ្ឋមន្ត្រីការបរទេសចិន បានបង្ហាញជំនឿចិត្តថា៖«ជាមួយនឹងការខិតខំប្រឹងប្រែងរួមគ្នារបស់គ្រប់ភាគី កិច្ចប្រជុំកំពូល នៅTianjin ប្រាកដជានឹងក្លាយទៅជាព្រឹត្តិការណ៍ដ៏ធំដែលបង្ហាញពីសាមគ្គីភាព មិត្តភាព និងលទ្ធផលជាផ្លែផ្កា ហើយ SCO នឹងឈានចូលដំណាក់កាលថ្មីនៃការអភិវឌ្ឍប្រកបដោយគុណភាពខ្ពស់ ដែលកំណត់ដោយសាមគ្គីភាព ការសម្របសម្រួល ភាពរឹងមាំ និងផលិតភាព»។

ក្នុងកិច្ចប្រជុំកំពូលនៅខែខាងមុខនោះ មេដឹកនាំមកពីប្រទេសជាង២០ និងប្រធានអង្គការអន្តរជាតិចំនួន១០ គ្រោងនឹងចូលរួមកិច្ចប្រជុំកំពូល និងព្រឹត្តិការណ៍ពាក់ព័ន្ធ។

ខណៈពេលដែលមានការលើកឡើងខ្លះ យល់ថា SCO ជាអ្នកប្រឆាំងទៅនឹងអង្គការណាតូ ឬថា ជាអង្គការណាតូប្រចាំតំបន់អាស៊ី ជាពិសេសដោយសារតែសមាជិកភាពកាន់តែច្រើនឡើងនៃបណ្តាប្រទេសដូចជាចិន និងរុស្ស៊ី ដែលកំពុងតែជាប់ដៃនៅក្នុងសង្គ្រាមនៅអ៊ុយក្រែន។ រុស្ស៊ីដែលជារឿយៗ អះអាងថា សង្គ្រាមនៅអ៊ុយក្រែនគឺដើម្បីប្រឆាំងនឹងការពង្រីកឥទ្ធិពលរបស់លោកខាងលិចសំដៅទៅកាន់ប្រទេសរុស្ស៊ី។

មានភាពខុសប្លែកគ្នាជាមូលដ្ឋាននៅក្នុងអង្គការ NATO និង SCO គឺនៅត្រង់ថា NATO គឺជាសម្ព័ន្ធមិត្តយោធាដែលផ្តោតលើការការពារសមាជិកជារូម ឬហៅថា «សមូហភាព» ខណៈដែលអង្គការ SCO គឺជាអង្គការផ្តោតលើ នយោបាយ និងសេដ្ឋកិច្ចជាចម្បង ដោយផ្តោតលើសន្តិសុខ និងកិច្ចសហប្រតិបត្តិការក្នុងតំបន់៕