ការ​គំរាម​កំហែងគ្រាប់​បែកបន្តបន្ទាប់​នៅ​ភូកេត​បង្កើន​ការ​ព្រួយ​បារម្ភ​ពីសុវត្ថិភាពអ្នកទេសចរ

ភូកេត ដែលជាគោលដៅទេសចរណ៍កំពូលរបស់ប្រទេសថៃ ថ្មីៗនេះត្រូវបានរញ្ជួយដោយសារការគម្រាមកំហែងពីគ្រាប់បែកជាបន្តបន្ទាប់ ដែលបង្កឱ្យមានការឆ្លើយតបផ្នែកសន្តិសុខនិងបង្កើនការព្រួយបារម្ភអំពីសុវត្ថិភាពរបស់អ្នកទេសចរ។

យោងតាមការចេញផ្សាយរបស់សារព័ត៌មាន​ Khaosod ចន្លោះពីថ្ងៃទី ២១ ដល់ថ្ងៃទី ២៦ ខែមិថុនា ប៉ូលិសថៃបានរកឃើញគ្រាប់បែកជាច្រើន ដែលបង្កប់នៅតំបន់ដែលមានកេរ្តិ៍ឈ្មោះ រួមមាន អាកាសយានដ្ឋានអន្តរជាតិភូកេត តំបន់ឆ្នេរ Patong និងកន្លែងសម្ដែងទស្សនីយភាពដ៏ពេញនិយម Laem Phromthep ។

អាជ្ញាធរ​ថៃបាន​ចាប់​ខ្លួន​បុរស​ពីរ​នាក់​មក​ពី​ខេត្ត​ Pattani ​​ដែល​ទំនងជាជាប់​ពាក់ព័ន្ធ​នឹង​ឧបទ្ទវហេតុ​នេះ ។ ខណៈពេលដែលឧបករណ៍បំផ្ទុះទាំងនេះមិនត្រូវបានរចនាឡើងដើម្បីបង្កឲ្យមានអ្នកស្លាប់ និងរបួសច្រើននោះ ក្រុមមន្ត្រីបានបញ្ជាក់ថា ពួកគេមានបំណងបង្កើតការភ័យខ្លាច និងរំខានដល់ទំនុកចិត្តសាធារណៈ។ ជាការឆ្លើយតប រដ្ឋាភិបាលថៃបានបង្កើនសន្តិសុខនៅទូទាំងខេត្តភាគខាងត្បូងសំខាន់ៗ រួមមានខេត្ត Phuket, Krabi និង Phang Ng។ ជាមួយគ្នានេះវត្តមានយោធា និងប៉ូលិសក៏ត្រូវបង្កើននៅក្នុងតំបន់ទេសចរណ៍ ហើយអាជ្ញាធរអាកាសយានដ្ឋានបានជំរុញអ្នកធ្វើដំណើរឱ្យមកទាន់ពេល ដោយសារពិធីការត្រួតពិនិត្យតឹងរ៉ឹងជាងមុន។

ដោយសារបញ្ហានេះ វិស័យទេសចរណ៍នៅភូកេតក៏បានរងផលប៉ះពាល់តិចតួចផងដែរ។ ដោយអ្នកជំនាញណែនាំថា ការឆ្លើយតបរហ័សរបស់រដ្ឋាភិបាល និងការប្រាស្រ័យទាក់ទងជាសាធារណៈនឹងអាចជួយបន្ថយកម្រិតការភ័យស្លន់ស្លោ និងរក្សាទំនុកចិត្តរបស់ភ្ញៀវទេសចរ។

ទោះជាយ៉ាងណាក៏ដោយ អ្នកវិភាគមួយចំនួនព្រមានអំពីហានិភ័យកេរ្តិ៍ឈ្មោះរយៈពេលវែង។ អ្នកវិភាគការធ្វើដំណើរក្នុងតំបន់ បានកត់សម្គាល់ថា សូម្បីតែការគំរាមកំហែងដែលមិនបណ្តាលឱ្យស្លាប់ក៏អាចជះឥទ្ធិពលដល់ការយល់ឃើញអំពីសុវត្ថិភាព ជាពិសេសក្នុងចំណោមអ្នកធ្វើដំណើរជាលើកដំបូង ខណៈឧប្បត្តិហេតុសន្តិសុខបែបនេះអាចប៉ះពាល់ដល់ទេសចរណ៍ក្នុងស្រុកភ្លាមៗ ដោយសារអ្នកធ្វើដំណើរថៃមានទំនោរនឹងកែសម្រួលផែនការយ៉ាងឆាប់រហ័សដោយផ្អែកលើហានិភ័យដែលយល់ឃើញ៕

អត្ថបទ៖