ព័ត៌មានអន្ដរជាតិ

ទោះបីទំនាក់ទំនងលោក គីម-ត្រាំ មិនអាក្រក់ក៏កូរ៉េខាងជើងថាខ្លួនមិនបោះបង់អាវុធនុយក្លេអ៊ែរឡើយ

បានផុស

៩ ខែ មុន

នៅ

ថ្ងៃអង្គារ ២៩ កក្កដា ២០២៥

ដោយ

ប្រទេសកូរ៉េខាងជើងបានច្រានចោលការអំពាវនាវជាថ្មីរបស់សហរដ្ឋអាមេរិកសម្រាប់កិច្ចពិភាក្សាស្តីពីការរំសាយអាវុធនុយក្លេអ៊ែរ ដោយទទូចថាខ្លួននឹងមិនបោះបង់អាវុធនុយក្លេអ៊ែររបស់ខ្លួនឡើយ បើទោះបីជាកូរ៉េខាងជើងហៅទំនាក់ទំនងរវាងលោក គីម ជុងអ៊ុន និងអតីតប្រធានាធិបតីអាមេរិក ដូណាល់ ត្រាំ ថា «មិនអាក្រក់» ក៏ដោយ។

ប្រធានាធិបតីសហរដ្ឋអាមេរិក ដូណាល់ ត្រាំ ជួបជាមួយមេដឹកនាំកូរ៉េខាងជើង គីម ជុងអ៊ុន នៅតំបន់គ្មានយោធាបំបែកកូរ៉េទាំងពីរ នៅ Panmunjom ប្រទេសកូរ៉េខាងត្បូងកាលពីឆ្នាំ២០១៩។ (រូបភាព៖ Reuters)

លោកស្រី គីម យ៉ូជុង (Kim Yo Jong) ដែលជាប្អូនស្រីដ៏មានឥទ្ធិពលរបស់ គីម ជុងអ៊ុន និងជាមន្ត្រីកិច្ចការបរទេសសំខាន់របស់លោក បាននិយាយថា កូរ៉េខាងជើងនឹងពិចារណាលើការចរចារ ប្រសិនបើទីក្រុងវ៉ាស៊ីនតោនទទួលស្គាល់ខ្លួនជាមហាអំណាចនុយក្លេអ៊ែរ និងផ្តល់ការយោគយល់ ដូចជាការបន្ធូរបន្ថយទណ្ឌកម្ម និងការបញ្ចប់សមយុទ្ធយោធារវាងសហរដ្ឋអាមេរិក និងកូរ៉េខាងត្បូង។ លោកស្រីបានហៅក្តីសង្ឃឹមរបស់សហរដ្ឋអាមេរិកសម្រាប់ការចរចារំសាយនុយក្លេអ៊ែរថាជាការចំអក ប្រសិនបើពួកគេមិនអើពើថាតើកម្លាំងយោធា និងអាវុធនុយក្លេអ៊ែររបស់កូរ៉េខាងជើងកាន់តែខ្លាំងប៉ុនណា។

ថ្មីៗនេះ លោក ត្រាំ បានបង្ហាញចំណាប់អារម្មណ៍ក្នុងការចាប់ផ្តើមឡើងវិញនូវទំនាក់ទំនងការទូតជាមួយលោក គីម ដោយបញ្ជាក់ពីទំនាក់ទំនងអតីតកាលរបស់ពួកគេទោះបីកិច្ចចរចារវាងប្រទេសទាំងពីរលើការរំសាយកម្មវីធីនុយក្លេអ៊ែររបស់កូរ៉េខាងជើងកាលឆ្នាំ២០១៩ដួលរលំក៏ដោយ។

ប្រធានាធិបតីអាមេរិក លោក ដូណាល់ ត្រាំ និយាយជាមួយមេដឹកនាំកូរ៉េខាងជើង លោក គីម ជុងអ៊ុន បន្ទាប់ពីចាប់ដៃគ្នាមុនពេលជជែកគ្នាម្តងមួយៗ អំឡុងពេលកិច្ចប្រជុំកំពូលអាមេរិក-កូរ៉េខាងជើងលើកទី២ នៅទីក្រុងហាណូយឆ្នាំ ២០១៩។ (រូបភាព៖ Reuters)

អ្នកជំនាញជឿជាក់ថា ទីក្រុងព្យុងយ៉ាងចង់ឱ្យមានការចរចាជាជំហានៗ ខណៈពេលដែលសហរដ្ឋអាមេរិកនៅតែបន្តស្វែងរកការលុបបំបាត់អាវុធនុយក្លេអ៊ែរពេញលេញ។ ក្រុមអ្នកវិភាគនិយាយថា បច្ចុប្បន្ននេះ ប្រទេសកូរ៉េខាងជើង មើលឃើញថា គ្មានភាពបន្ទាន់ក្នុងការចាប់ផ្តើមកិច្ចចរចាឡើងវិញទេ ដោយផ្តោតលើការបង្កើនទំនាក់ទំនងរបស់ខ្លួនជាមួយរុស្ស៊ី ចំពេលមានសង្គ្រាមកំពុងបន្តនៅអ៊ុយក្រែន។

លើសពីនេះលោកស្រី គីម យ៉ូជុង ក៏បានច្រានចោលការផ្សព្វផ្សាយការទូតនាពេលថ្មីៗនេះរបស់កូរ៉េខាងត្បូង ហើយបានហៅសំណើដើម្បីដាក់បញ្ចូលលោកស្រីនៅក្នុងកិច្ចប្រជុំកំពូល APEC នាពេលខាងមុខនៅកូរ៉េខាងត្បូងថាជា «សុបិនទាំងថ្ងៃ»៕