ឥណ្ឌូណេស៊ី ចុះកិច្ចព្រមព្រៀងទិញយន្តហោះចម្បាំង KAAN ចំនួន ៤៨គ្រឿងពី​តួកគី

ដើម្បីធ្វើទំនើបកម្មកងទ័ពអាកាសរបស់ខ្លួន ឥណ្ឌូណេស៊ីបានចុះហត្ថលេខាលើកិច្ចសន្យាជាមួយ​តួកគី ទិញយន្តហោះចម្បាំង​ពហុមុខងារ​ជំនាន់ទីប្រាំ KAAN ចំនួន ៤៨​គ្រឿង ដែលធ្វើ​ឲ្យ​​ឥណ្ឌូណេស៊ី​ក្លាយជាអ្នកទិញអន្តរជាតិដំបូងគេនៃយន្តហោះបំបាំងកាយដែលផលិតដោយតួកគី។

កិច្ចព្រមព្រៀងដែលបានចុះហត្ថលេខាក្នុងអំឡុងពេលពិព័រណ៍ការពារជាតិ IDEF 2025 កាល​ពី​ថ្ងៃ​ទី​២៩​ខែ​កក្កដា​នៅទីក្រុងអ៊ីស្តង់ប៊ុល ត្រូវបានគេប៉ាន់ប្រមាណថាមានតម្លៃជាង ១០​ពាន់លានដុល្លារ។ វារួមបញ្ចូលមិនត្រឹមតែការដឹកជញ្ជូនយន្តហោះប៉ុណ្ណោះទេ ថែមទាំងការផ្ទេរបច្ចេកវិទ្យា ការផលិតរួមគ្នា និងការប្តេជ្ញាចិត្តក្នុងការកសាងសមត្ថភាពការពារជាតិក្នុងតំបន់​របស់​ឥណ្ឌូណេស៊ី។

ក្រសួងការពារជាតិតួកគី បាន​ឲ្យ​ដឹង​​ថា យន្តហោះ​ចម្បាំង​ KAAN ជំនាន់​ថ្មី​នេះ នឹងត្រូវបានបំពាក់ដោយម៉ាស៊ីន «General Electric F-110» ចំនួនពីរ ដូចទៅ​នឹង​យន្តហោះចម្បាំង Lockheed Martin F-16 ជំនាន់ទី៤ របស់សហរដ្ឋ​អាមេរិកអ៊ីចឹង​ដែរ។

ចំណុចសំខាន់នៃកិច្ចព្រមព្រៀង មាន​ដូចជា៖

• យន្តហោះចម្បាំង KAAN ចំនួន៤៨គ្រឿង នឹងត្រូវចែកចាយក្នុងរយៈពេល ១០ឆ្នាំខាងមុខ
• ការជួបប្រជុំគ្នាក្នុងស្រុក និងការផលិតសមាសភាគ ដែល​មាន​ការ​ចូលរួម​ពី​ក្រុមហ៊ុន PT Dirgantara Indonesia និង PT RAD
• ការចែករំលែកបច្ចេកវិទ្យា ដើម្បីជួយប្រទេសឥណ្ឌូណេស៊ីអភិវឌ្ឍសមត្ថភាពអវកាសនាពេលអនាគត
• កិច្ចខិតខំប្រឹងប្រែងរួមគ្នា ក្នុងការបណ្តុះបណ្តាលវិស្វកម្ម និងការថែទាំ

ការដឹកជញ្ជូន​យន្តហោះ​ចម្បាំង KAAN ត្រូវបានគេរំពឹងថានឹងចាប់ផ្តើមនៅ​ឆ្នាំ​២០២៨ និងបញ្ចប់នៅ​ឆ្នាំ​២០៣៥៕

ដោយ៖ ឈាង