បំណាក់ដីនៅឥណ្ឌូណេស៊ី សម្លាប់មនុស្ស២នាក់និងរាប់សិបនាក់បាត់ខ្លួន

គ្រោះបំណាក់ដីវាយប្រហារភូមិចំនួនបីនៅក្នុងស្រុក Cilacap កណ្ដាលខេត្តJava ប្រទេសឥណ្ឌូណេស៊ី សម្លាប់មនុស្សពីរនាក់ និងបានធ្វើឱ្យមនុស្សយ៉ាងហោចណាស់ ២១ នាក់ផ្សេងទៀតបាត់ខ្លួន។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី១៤ខែវិច្ឆិកា។

បើតាមភ្នាក់ងារគ្រោះមហន្តរាយជាតិឥណ្ឌូណេស៊ី ក្រុមជួយសង្គ្រោះបានជួយសង្គ្រោះអ្នករស់រានមានជីវិតចំនួន២៣ នាក់រហូតមកដល់ពេលនេះ ប៉ុន្តែដីមិនស្ថិតស្ថេរកំពុងធ្វើឱ្យកិច្ចខិតខំប្រឹងប្រែងស្វែងរក និងការប្រើគ្រឿងចក្រធន់ធ្ងន់ថយចុះ។

បំណាក់ដីនេះកើតឡើងបន្ទាប់ពីការព្រមានអាកាសធាតុធ្ងន់ធ្ងរ ខណៈប្រទេសឥណ្ឌូណេស៊ីចូលដល់រដូវវស្សា ដែលជារឿយៗនាំមកនូវទឹកជំនន់ និងបំណាក់ដីភ្លាមៗ។

អាជ្ញាធរឥណ្ឌូណេស៊ីព្រមានថា ការប្រែប្រួលអាកាសធាតុកំពុងធ្វើឱ្យព្យុះកាន់តែធ្ងន់ធ្ងរ ដោយមានភ្លៀងធ្លាក់ខ្លាំង ខ្យល់បក់ខ្លាំងនិងបង្កគ្រោះមហន្តរាយកាន់តែធ្ងន់ធ្ងរ។ កាលពីដើមខែនេះ ក៏មានគ្រោះមហន្តរាយស្រដៀងគ្នានេះនៅខេត្ត Papua សម្លាប់មនុស្សយ៉ាងហោចណាស់ ១៥ នាក់ និងបានធ្វើឱ្យមនុស្សប្រាំបីនាក់បាត់ខ្លួនផងដែរ៕

អត្ថបទ៖ ប៊ុន សុភាព