ព័ត៌មានអន្ដរជាតិ

អ៊ីរ៉ង់ព្រមានថានឹងចាកចេញពីសន្ធិសញ្ញានុយក្លេអ៊ែរ បើ E3 ដាក់ទណ្ឌកម្មឡើងវិញ

បានផុស

៩ ខែ មុន

នៅ

ថ្ងៃសុក្រ ១ សីហា ២០២៥

ដោយ

Chheang

អ៊ីរ៉ង់បានព្រមានថា ខ្លួនអាចនឹងដកខ្លួនចេញពីសន្ធិសញ្ញាមិនរីកសាយភាយនុយក្លេអ៊ែរ (NPT) ប្រសិនបើចក្រភពអង់គ្លេស បារាំង និងអាល្លឺម៉ង់ ដែលហៅថា E3 ដាក់ទណ្ឌកម្មរបស់អង្គការសហប្រជាជាតិឡើងវិញ ចំពោះសកម្មភាពនុយក្លេអ៊ែររបស់ទីក្រុងតេហេរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយកាលពីថ្ងៃទី៣១កក្កដារបស់ Iran International ការព្រមាននេះត្រូវបានលើកឡើង អំឡុងកិច្ចប្រជុំបិទទ្វារដែលធ្វើឡើងនៅទីក្រុងអ៊ីស្តង់ប៊ុលកាលពីសប្ដាហ៍មុន ដែលជាកន្លែងដែលតំណាងអ៊ីរ៉ង់ និងអឺរ៉ុបបានជួបប្រជុំគ្នាដើម្បីពិភាក្សាអំពីអនាគតនៃកិច្ចព្រមព្រៀងនុយក្លេអ៊ែរឆ្នាំ២០១៥ (JCPOA)។ ទីក្រុងតេហេរ៉ង់ បានចោទប្រកាន់មហាអំណាចអឺរ៉ុបពីការខកខាន ក្នុងការរក្សាការប្តេជ្ញាចិត្តរបស់ពួកគេនៅក្រោមកិច្ចព្រមព្រៀងនេះ ហើយបានពណ៌នាការប៉ុនប៉ងណាមួយដើម្បីបង្កើតយន្តការ«ដាក់ទណ្ឌកម្មឡើងវិញ» របស់អង្គការសហប្រជាជាតិថាជារឿង«ខុសច្បាប់ និងបង្កហេតុ»។

អនុរដ្ឋមន្ត្រីការបរទេស Kazem Gharibabadi បាននិយាយទៅកាន់ប្រព័ន្ធផ្សព្វផ្សាយរដ្ឋថា «បើ E3 ដំណើរការទៅមុខជាមួយនឹងការស្តារទណ្ឌកម្មឡើងវិញនោះ សាធារណរដ្ឋអ៊ីស្លាមនឹងគ្មានជម្រើសអ្វីក្រៅពីការពិចារណាឡើងវិញនូវកាតព្វកិច្ចរបស់ខ្លួនក្រោម NPT និងក្របខ័ណ្ឌអន្តរជាតិផ្សេងទៀត»។

ទោះបីជាសហរដ្ឋអាមេរិកបានដកខ្លួនចេញពីកិច្ចព្រមព្រៀង JCPOA ក្នុងឆ្នាំ២០១៨ក៏ដោយ ក៏ E3 បានបន្តអនុវត្តដដែល។ យ៉ាងណាមិញ ភាពតានតឹងបានកើនឡើង ពាក់ព័ន្ធនឹងការបង្កើនការចម្រាញ់សារធាតុអ៊ុយរ៉ាញ៉ូមរបស់អ៊ីរ៉ង់ ដែលជំរុញឲ្យអឺរ៉ុបដាក់កំណត់ត្រឹមចុងខែសីហានេះក្នុងការដាក់ទណ្ឌកម្មឡើងវិញ បើអ៊ីរ៉ង់បរាជ័យមិនសហការតាមកិច្ចព្រមព្រៀង។

អ៊ីរ៉ង់អះអាងថា ខ្លួនមានសិទ្ធិក្នុងការអភិវឌ្ឍនុយក្លេអ៊ែរដោយសន្តិវិធី ហើយនិយាយថា រដ្ឋាភិបាលអឺរ៉ុបបានបរាជ័យក្នុងការការពារប្រទេសរបស់ខ្លួនពីការដាក់ទណ្ឌកម្មរបស់សហរដ្ឋអាមេរិក បន្ទាប់ពីការដកខ្លួនរបស់ទីក្រុងវ៉ាស៊ីនតោន។ ទីក្រុងតេហេរ៉ង់ក៏បានអះអាងដែរថា ការអភិវឌ្ឍនុយក្លេអ៊ែររបស់ខ្លួនគឺអាចពិចារណាគ្នាបាន បើទណ្ឌកម្មត្រូវបានដកចេញ ហើយទំនុកចិត្តខាងការទូតត្រូវបានស្ដារឡើងវិញ៕

ដោយ៖ ឈាង