ក្រោយចាកចេញពីសន្ធិសញ្ញានុយក្លេអ៊ែរ, រុស្ស៊ី ប្រ​កាសថា ខ្លួនមានសិទ្ធិដាក់ពង្រាយមីស៊ីលរយៈចម្ងាយមធ្យម ពេលណាចាំបាច់

ក្រោយរុស្ស៊ី ប្រកាស​ដកខ្លួនជាផ្លូវការចេញពីសន្ធិសញ្ញាអាវុធនុយក្លេអ៊ែរ ពេលនេះអ្នកនាំពាក្យវិមានក្រឹមឡាំង Dmitry Peskov បញ្ជាក់យ៉ាងច្បាស់ថា រុស្ស៊ីមានសិទ្ធិដាក់ពង្រាយមីស៊ីលរយៈចម្ងាយមធ្យមពេលណាចាំបាច់ ដោយលែងប្រកាន់គោលនយោបាយចាស់ ដែលកំណត់ថា ខ្លួននឹងធ្វើបែបនេះដរាបណាសហរដ្ឋអាមេរិកនិងសម្ព័ន្ធមិត្តពួកគេធ្វើមុនទៀតហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងប្រាប់អ្នកកាសែតកាលពីថ្ងៃអង្គារទី៥ខែសីហាឆ្នាំ២០២៥ លោក Peskov និយាយថា រុស្ស៊ីលែងមានការរឹតត្បិតណាមួយក្នុងរឿងនេះទៀតហើយនិងលែងចាត់ទុកខ្លួនឯងថាមានកាតព្វកិច្ចដោយអ្វីទាំងអស់។ ទីក្រុងមូស្គូសូមរក្សាសិទ្ធិ ពង្រាយមីស៊ីលទាំងនោះនៅពេលណាដែលយល់ឃើញថាចាំបាច់។

កាលពីថ្ងៃចន្ទ រុស្ស៊ីប្រកាសថា ខ្លួននឹងលែងគោរពតាមសន្ធិសញ្ញាកងកម្លាំងនុយក្លេអ៊ែរកម្រិតមធ្យម (INF) ទៀតហើយ ដែលនេះបង្ហាញថា ជាដំណាក់កាលថ្មីដ៏គ្រោះថ្នាក់ក្នុងការគ្រប់គ្រងអាវុធពិភពលោក និងបង្កើនការភ័យខ្លាចនៃការប្រកួតប្រជែងមីស៊ីល​​រវាងមហាអំណាចនុយក្លេអ៊ែរ។

ជុំវិញការដកខ្លួននេះ អនុប្រធានក្រុមប្រឹក្សាសន្តិសុខ និង​ជា​អតីត​ប្រធានាធិ​បតី​រុស្ស៊ី​ លោក Dmitry Medvedev បានបន្ទោសទៅគោលនយោបាយប្រឆាំងរុស្ស៊ីរបស់អង្គការណាតូ។

លោក Medvedev និយាយលើ​បណ្ដាញ​សង្គម X ថា «សេចក្តីថ្លែងការណ៍របស់ក្រសួងការបរទេសរុស្ស៊ីស្តីពីការដក​ខ្លួន​ចេញ​ពី​សន្ធិសញ្ញា​ដាក់ពង្រាយមីស៊ីលរយៈចម្ងាយមធ្យម និងខ្លី គឺជាលទ្ធផលនៃគោលនយោបាយប្រឆាំងរុស្ស៊ីរបស់ណាតូ។ នេះគឺជាការពិតថ្មីមួយដែលគូប្រជែងរបស់យើងទាំងអស់នឹងត្រូវគិតគូរ»។

តាម​ពិត​ទៅ សន្ធិសញ្ញា​ឆ្នាំ​១៩៨៧​ ដែលបានលុបបំបាត់ប្រភេទ​មីស៊ីលដែលមានសមត្ថភាពនុយក្លេអ៊ែរ​និង​មានចម្ងាយពី ៥០០ ទៅ ៥ ៥០០​គីឡូម៉ែត្រ លែង​មាន​ប្រសិទ្ធភាព​ចាប់តាំងពីសហរដ្ឋអាមេរិក​ដកខ្លួននៅឆ្នាំ​២០១៩​មក​ម៉្លេះ ក្រោមការដឹកនាំរបស់ប្រធានាធិបតី ដូណាល់ ត្រាំ។

កាលណោះ ទីក្រុងវ៉ាស៊ីនតោន បានចោទប្រកាន់ទីក្រុងមូស្គូថាបានរំលោភលើកិច្ចព្រមព្រៀងនេះអស់រយៈពេលជាច្រើនឆ្នាំ ដោយ​បង្កើតមីស៊ីល 9M729 ដែលត្រូវបានហាមឃាត់ ប៉ុន្តែការអះអាង​នេះ​ត្រូវ​រុស្ស៊ី​បដិសេធ។

សន្ធិសញ្ញា​ INF គឺជាកិច្ចព្រមព្រៀងគ្រប់គ្រងអាវុធជាប្រវត្តិសាស្ត្រដែលបានចុះហត្ថលេខានៅ​ឆ្នាំ​១៩៨៧ ដោយអតីត​ប្រធានាធិបតីសហរដ្ឋអាមេរិក Ronald Reagan និងអតីត​មេដឹកនាំសូវៀត Mikhail Gorbachev។ វាហាមប្រាមរាល់មីស៊ីល​បាលិស្ទិក និងមីស៊ីល​គ្រូស​ ដែល​បាញ់​ចេញ​ពី​ផ្ទៃ​ដី និង​មានរយៈចម្ងាយពី ៥០០ ទៅ ៥ ៥០០​គីឡូម៉ែត្រ។

សន្ធិសញ្ញានេះបាននាំ​ឲ្យ​មានការបំផ្លាញ​មីស៊ីលជាង ២ ៦០០​គ្រាប់ និងជាលើកទីមួយ ដែលប្រទេសទាំងពីរបានព្រមព្រៀងគ្នាក្នុងការលុបបំបាត់អាវុធនុយក្លេអ៊ែរមួយប្រភេទ​នេះ៕

អត្ថបទ៖ សុខ សុវណ្ណ

ចុចអាន៖ លោក Medvedev ស្ដី​បន្ទោសថាមកពី​ណាតូ ទើបរុស្ស៊ី​ដក​ខ្លួន​ពី​សន្ធិសញ្ញានុយក្លេអ៊ែរ INF