ទន្សាយព្រៃក្នុងរដ្ឋ Colorado សហរដ្ឋអាមេរិក ឆ្លងមេរោគកម្រ ដុះស្នែងពេញមុខ

យោងតាមការចេញផ្សាយរបស់សារព័ត៌មាន CNN នៅថ្ងៃទី១៥ខែសិហា សត្វទន្សាយព្រៃនៅទីក្រុង Fort Collins រដ្ឋ Colorado សហរដ្ឋអាមេរិក បានទាក់ទាញចំណាប់អារម្មណ៍និងការភ្ញាក់ផ្អើលចំពោះការមានដុះស្នែងចម្លែកនៅលើមុខរបស់ពួកវា ហើយត្រូវគេឲ្យឈ្មោះហៅក្រៅដូចជា «Frankenstein bunnies» និង «zombie rabbits» ជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយបែកធ្លាយរូបភាពសត្វទន្សាយដុះស្នែងចម្លែកអ្នកខ្លះបាននិយាយថា សត្វទន្សាយទាំងនេះអាចឆ្លងមេរោគចម្លែក ឬមេរោគគ្រោះថ្នាក់ ប៉ុន្តែយោងទៅតាម Colorado Parks and Wildlife (CPW) ទន្សាយត្រូវបានឆ្លងមេរោគដ៏កម្រមួយដែលមានឈ្មោះថា cottontail rabbit papillomavirus ដែលជាមេរោគដែលកើតឡើងដោយធម្មជាតិបណ្តាលឱ្យមានដុំសាច់ដុះដូចស្នែង ដុះជាធម្មតានៅលើក្បាល និងមុខ។ មេរោគនេះស្រដៀងទៅនឹងដុំសាច់ស្លូត ឬឬស។ ការលូតលាស់ខុសប្រក្រតីទាំងនេះអាចពន្លូត ជួនកាលមើលទៅដូចជាស្នែងពណ៌ខ្មៅ។

មន្ត្រីសត្វព្រៃសង្កត់ធ្ងន់ថា មេរោគនេះប៉ះពាល់តែទន្សាយប៉ុណ្ណោះ ហើយមិនអាចបង្កគ្រោះថ្នាក់ដល់មនុស្ស ឬសត្វផ្សេងទៀតបានឡើយ ទោះបីជាវាអាចឆ្លងទៅទន្សាយក្នុងស្រុកក៏ដោយ។ នៅក្នុងទន្សាយព្រៃមេរោគនេះមិនរំខានដល់ការរស់រានមានជីវិតទេ លុះត្រាតែពួកវារារាំងសមត្ថភាពរបស់សត្វទន្សាយក្នុងការស៊ី ឬផឹកទឹក។ លើសពីនេះក្នុងករណីភាគច្រើន ប្រព័ន្ធភាពស៊ាំរបស់សត្វទន្សាយបានសម្អាតការឆ្លងមេរោគ ដែលនាំឱ្យការលូតលាស់ខុសប្រក្រតីបាត់ទៅវិញ។

គួរបញ្ជាក់ថារដ្ឋ Colorado ជាជម្រករបស់សត្វទន្សាយ៣ប្រភេទ ហើយសត្វទន្សាយទាំងអស់នេះអាចរងផលប៉ះពាល់ដោយមេរោគបែបនេះបាន។ យ៉ាងណា ទន្សាយឆ្លងមេរោគនេះជារឿងធម្មតានៅក្នុងរដូវក្តៅ ព្រោះជារដូវដែលសត្វល្អិតចម្លងមេរោគសកម្មបំផុត៕

អត្ថបទ៖ ប៊ុន សុភាព