អង្គការសិទ្ធិមនុស្សនិងបញ្ញវន្តថៃ ចេញមុខថ្កោលទោស ករណីចាប់ខ្លួនក្មេងប្រុសក្នុងសាលានៅខេត្ត សុរិន្ទ

អង្គការសិទ្ធិមនុស្សនិងបណ្តាបញ្ញវន្តថៃ បានចេញមុខថ្កោលទោសប៉ូលិស-អាជ្ញាធរ ដែលចាប់ខ្លួនក្មេងប្រុស ដោយចោទថា ចូលដីថៃដោយខុសច្បាប់ ទោះរូបគេកើតនិងធំធាត់ឡើងនៅក្នុងប្រទេសថៃក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រឿងរ៉ាវដ៏ភ្ញាក់ផ្អើលបានកើតឡើងកាលពីថ្ងៃព្រហស្បតិ៍ទី២៨ខែសីហាឆ្នាំ២០២៥ នៅពេលក្មេងប្រុសអាយុ១៣ឆ្នាំដែលមានម្តាយជាជនជាតិខ្មែរនិងឪពុកចុងជាជនជាតិថៃ ត្រូវប៉ូលិសចុះទៅចាប់ដល់ក្នុងសាលារៀនក្នុងស្រុក Bua Chet នៃខេត្តសុរិន្ទ ដោយចោទថា រស់នៅក្នុងប្រទេសថៃ ដោយខុសច្បាប់ និងត្រៀមបញ្ជូនមកកម្ពុជាវិញ ខណៈសកម្មភាពនេះត្រូវបានគេមើលឃើញយ៉ាងច្បាស់ថា ជាទង្វើដ៏ថោកទាបនិងការរើសអើងជាតិសាស៍ ដែលជំរុញដោយជម្លោះព្រំដែនជាមួយកម្ពុជា។

ជុំវិញទង្វើដ៏ស្មោកគ្រោកនេះ ត្រូវបានមជ្ឈដ្ឋានក្នុងប្រទេសថៃគ្នាឯងនោះ រិះគន់មិនសំចៃមាត់ ដោយបើតាមការផ្សាយរបស់ Thai PBS កាលពីថ្ងៃព្រហស្បតិ៍ទី២៨ខែសីហាឆ្នាំ២០២៥, លោកស្រី Angkhana Neelapaijit ដែលជាសមាជិកព្រឹទ្ធសភានិងជាអតីតស្នងការសិទ្ធិមនុស្សបានថ្លែងថា ការចាប់ខ្លួនសិស្សសាលារូបនេះ គឺជាកំហុសដ៏ធ្ងន់ធ្ងរ និងជាទង្វើដែលគួរឲ្យអាម៉ាស់របស់នគរបាលជាតិថៃ។ ការចាប់ខ្លួននេះគឺជាទង្វើនៃការរើសអើងជាតិសាសន៍ ហើយបានទាមទារឲ្យដោះលែងក្មេងប្រុសនោះជាបន្ទាន់។

ទន្ទឹមនឹងនេះ លោក Jessada Denduangboripant មកពីសាកលវិទ្យាល័យ Chulalongkorn បានអំពាវនាវឲ្យក្រសួងអភិវឌ្ឍន៍សង្គមនិងសន្តិសុខមនុស្ស ត្រូវអន្តរាគមន៍ដើម្បីជួយក្មេងប្រុសជាបន្ទាន់ផងដែរ។

ចំណែក លោក Prinya Thaewanarumitkul សាស្ត្រាចារ្យផ្នែកច្បាប់នៅសាកលវិទ្យាល័យ Thammasat បានថ្លែងថា ការចាប់ខ្លួនក្មេងប្រុសនៅឯសាលារៀនរបស់គេ ដោយគ្មានដីកា ឬព័ស្តុតាងច្បាស់លាស់ គឺជាការរំលោភបំពានយ៉ាងធ្ងន់ធ្ងរទៅលើក្រមនីតិវិធីព្រហ្មទណ្ឌ ច្បាប់ស្តីពីការការពារកុមារ និង អនុសញ្ញាទីក្រុងហ្សឺណែវស្តីពីសិទ្ធិកុមារ ហើយការបណ្តេញក្មេងប្រុសទៅកាន់ប្រទេសកម្ពុជាវិញ ក៏នឹងធ្វើឲ្យខូចឈ្មោះរបស់ប្រទេសថៃ លើឆាកអន្តរជាតិផងដែរ៕

អត្ថបទ៖ សុខ សុវណ្ណ

ចុចអាន៖ ដោយសារខ្វះកម្លាំងពលកម្ម ថៃផ្តល់សិទ្ធិការងារដល់ជនភៀសខ្លួនមីយ៉ាន់ម៉ានៅក្នុងជំរុំតាមព្រំដែន