ប្រទេសយេម៉ែន​ កាន់ទុក្ខ​នាយករដ្ឋមន្ត្រីហ៊ូធី ខណៈ​ក្រុមនេះបន្ត​​វាយប្រហារ​សមុទ្រ​ក្រហម

អ្នកកាន់ទុក្ខរាប់រយនាក់នៅក្នុងទីក្រុង Sanaaប្រទេសយេម៉ែន បានប្រមូលផ្តុំគ្នាកាលពីថ្ងៃចន្ទដើម្បីប្រារព្ធពិធីបុណ្យសពរបស់នាយករដ្ឋមន្ត្រីហ៊ូធីលោក Ahmed al-Rahawi និងរដ្ឋមន្ត្រីជាន់ខ្ពស់ជាច្រើននាក់ដែលត្រូវបានសម្លាប់នៅក្នុងការវាយប្រហាររបស់អ៊ីស្រាអែលកាលពីសប្តាហ៍មុន។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី០២ខែកញ្ញា។

ពិធីបុណ្យបានធ្វើឡើងនៅវិហារអ៊ីស្លាម Shaab និងចាក់ផ្សាយតាមទូរទស្សន៍ Al-Masirah ដែលគ្រប់គ្រងដោយ ក្រុមហ៊ូធី ដោយឃើញមានអ្នកគាំទ្រស្រែកប្រឆាំងអ៊ីស្រាអែល និងសហរដ្ឋអាមេរិក។

គួរបញ្ជាក់ថាលោក Al-Rahawi គឺជាមន្ត្រីជាន់ខ្ពស់ហ៊ូធីទីមួយ ដែលត្រូវបានសម្លាប់ ចាប់តាំងពីការវាយប្រហាររបស់អ៊ីស្រាអែល និងសហរដ្ឋអាមេរិកបានកើនឡើងកាលពីដើមឆ្នាំនេះ។ ក្នុងអំឡុងពេលពិធីបុណ្យសព នាយករដ្ឋមន្ត្រីស្តីទី Mohamed Muftah បានប្តេជ្ញាថាក្រុមនឹងបន្តការប្រយុទ្ធរបស់ខ្លួន ដោយទទូចថាកំពង់ផែយេម៉ែននៅតែដំណើរការ ទោះបីជាមានការវាយប្រហាររបស់អ៊ីស្រាអែលក៏ដោយ។

ស្របពេលប្រារព្ធពិធី ក្រុម ហ៊ូធី បានធ្វើការវាយប្រហារថ្មី បាញ់មីស៊ីលទៅកាន់នាវាដឹកប្រេងដែលមានទង់ជាតិរបស់ប្រទេសលីបេរីយ៉ាឈ្មោះ Scarlet Ray នៅក្នុងសមុទ្រក្រហម ដែលពួកគេបានអះអាងថា មានទំនាក់ទំនងជាមួយអ៊ីស្រាអែលថែមទៀត។ បើទោះបីនាវាមិនមានការខូចខាត ឧបទ្ទវហេតុនេះបានគូសបញ្ជាក់ពីការបន្តគំរាមកំហែងពីពួកឧទ្ទាមចំពោះផ្លូវដឹកជញ្ជូនពាណិជ្ជកម្ម ដ៏សំខាន់។

ក្នុងពេលជាមួយគ្នានោះ ក៏មានភាពតានតឹងកាន់តែខ្លាំងឡើង បន្ទាប់ពីក្រុម ហ៊ូធី បានវាយឆ្មក់ចូលការិយាល័យ UN និងកម្មវិធីអាហារពិភពលោក ឃាត់ខ្លួនបុគ្គលិកយ៉ាងតិច ១១នាក់ និងរឹបអូសទ្រព្យសម្បត្តិ។ មន្ត្រីអង្គការសហប្រជាជាតិបានហៅចាប់ខ្លួននេះថា «មិនអាចទទួលយកបាន» ដែលធ្វើឲ្យទំនាក់ទំនងកាន់តែតានតឹងរវាងក្រុមឧទ្ទាម និងទីភ្នាក់ងារអន្តរជាតិ៕

អត្ថបទ៖ ប៊ុន សុភាព