ក្រុមហ៊ូធីបញ្ឈប់ការវាយប្រហារនៅសមុទ្រក្រហម ក្រោយមានបទឈប់បាញ់នៅហ្គាហ្សា

យោងតាមការចេញផ្សាយរបស់សារព័ត៌មាន Al Jazeera នៅថ្ងៃទី១២ខែវិច្ឆិកា ក្រុមឧទ្ទាមហ៊ូធីរបស់ប្រទេសយេម៉ែនហាក់ដូចជាបានបញ្ឈប់ការវាយប្រហាររបស់ពួកគេទៅលើអ៊ីស្រាអែល និងផ្លូវដឹកជញ្ជូនសមុទ្រក្រហម ខណៈដែលបទឈប់បាញ់ដែលសម្របសម្រួលដោយសហរដ្ឋអាមេរិកនៅហ្គាហ្សានៅតែបន្តអនុវត្ត។

ចាប់តាំងពីចុងឆ្នាំ ២០២៣ មក ក្រុមហ៊ូធីបានកំណត់គោលដៅលើនាវាដែលពួកគេអះអាងថាមានទំនាក់ទំនងជាមួយអ៊ីស្រាអែល ឬសម្ព័ន្ធមិត្តរបស់អ៊ីស្រាអែល ដោយរំខានដល់ពាណិជ្ជកម្មសកលតាមរយៈសមុទ្រក្រហម និងព្រែកជីកSuezរបស់អេហ្ស៊ីប។ ការវាយប្រហារទាំងនេះបានសម្លាប់នាវិកយ៉ាងហោចណាស់ប្រាំបួននាក់ និងលិចនាវាចំនួនបួនគ្រឿង ដែលកាត់បន្ថយប្រាក់ចំណូលព្រែកជីករបស់អេហ្ស៊ីបរាប់ពាន់លានដុល្លារ។

នៅក្នុងលិខិតមួយផ្ញើទៅកាន់កងពលតូច Qassam របស់ក្រុមហាម៉ាស មេបញ្ជាការយោធាហ៊ូធី លោក Yusuf Hassan al-Madani បាននិយាយថា ក្រុមនេះបានផ្អាកប្រតិបត្តិការរបស់ខ្លួន ប៉ុន្តែបានព្រមានថាពួកគេនឹងបន្តឡើងវិញ ប្រសិនបើអ៊ីស្រាអែលបន្តការវាយប្រហារលើហ្គាហ្សា។

បទឈប់បាញ់បានចាប់ផ្តើមនៅថ្ងៃទី ១០ ខែតុលា ទោះបីជាអ៊ីស្រាអែលបានបន្តការវាយប្រហារសម្លាប់ជនជាតិប៉ាឡេស្ទីនរាប់រយនាក់ក៏ដោយ។ សង្គ្រាមហ្គាហ្សារហូតមកដល់ពេលនេះបានឆក់យកជីវិតជនជាតិប៉ាឡេស្ទីនជាង ៦៩,០០០នាក់។

ទន្ទឹមនឹងនេះ ភាពតានតឹងជាមួយអង្គការសហប្រជាជាតិកំពុងកើនឡើង បន្ទាប់ពីក្រុមហ៊ូធីបានឃុំខ្លួនបុគ្គលិកអង្គការសហប្រជាជាតិយ៉ាងហោចណាស់ ៥៩ នាក់ ដោយចោទប្រកាន់ពួកគេដោយគ្មានភស្តុតាងថាបានធ្វើចារកម្មឱ្យអ៊ីស្រាអែល។ អង្គការសហប្រជាជាតិបានបដិសេធការចោទប្រកាន់ទាំងនេះ ដោយព្រមានថា វិបត្តិកាន់តែធ្ងន់ធ្ងរឡើងរបស់ប្រទេសយេម៉ែននៅតែបន្តធ្វើឱ្យមនុស្សរាប់លាននាក់ដែលពឹងផ្អែកលើជំនួយមនុស្សធម៌កាន់តែជួបការលំបាក៕

អត្ថបទ៖ ប៊ុន សុភាព