ព័ត៌មានអន្ដរជាតិ

មេបញ្ជាការកំពូលរបស់ក្រុម ហ៊ូធី ត្រូវបានសម្លាប់ក្នុងការវាយប្រហាររបស់អ៊ីស្រាអែល

បានផុស

៦ ខែ មុន

នៅ

ថ្ងៃសុក្រ ១៧ តុលា ២០២៥

ដោយ

ក្រុមឧទ្ទាម ហ៊ូធី ក្នុងប្រទេសយេម៉ែនបាននិយាយថា មេដឹកនាំយោធាកំពូល ឧត្តមសេនីយទោ Mohammed al-Ghamari ត្រូវបានសម្លាប់រួមជាមួយកូនប្រុសអាយុ ១៣ ឆ្នាំរបស់លោកដោយសារតែវាយប្រហាររបស់អ៊ីស្រាអែល។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី១០ខែតុលា។

ឧត្តមសេនីយទោ Mohammed al-Ghamari (រូបភាព៖ Reuters)

លោក al-Ghamari បានស្លាប់ដោយសាររបួសក្នុងអំឡុងពេលការវាយប្រហារតាមអាកាសរបស់អ៊ីស្រាអែលលើទីក្រុង Sanaa នៅចុងខែសីហា។ ការវាយប្រហារនោះក៏បានសម្លាប់មន្ត្រីជាន់ខ្ពស់ហ៊ូធីមួយចំនួនទៀត ផងដែរ។

នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា លោក al-Ghamari គឺជា «ប្រធានក្រុមភេរវករម្នាក់ទៀតដែលត្រូវអ៊ីស្រាអែលកំចាត់» ខណៈដែលរដ្ឋមន្ត្រីការពារជាតិអ៊ីស្រាអែលលោក Katz បាននិយាយថា អ៊ីស្រាអែលនឹងបន្តកំណត់គោលដៅលើអ្នកដែលព្យាយាមធ្វើបាបប្រទេសលោក។

ក្រុមហ៊ូធីដែលគ្រប់គ្រងភាគច្រើននៃភាគខាងជើងប្រទេសយេម៉ែន បានបើកការវាយប្រហារដោយយន្តហោះគ្មានមនុស្សបើក និងមីស៊ីលលើអ៊ីស្រាអែល និងកប៉ាល់នៅសមុទ្រក្រហម និងឈូងសមុទ្រ Aden ចាប់តាំងពីសង្រ្គាម ហ្គាហ្សាចាប់ផ្តើមក្នុងខែតុលា ឆ្នាំ ២០២៣។ ពួកគេនិយាយថា ការវាយប្រហារទាំងនេះគឺសំដៅគាំទ្រដល់ប្រជាជនប៉ាឡេស្ទីន។ សហរដ្ឋអាមេរិក និងចក្រភពអង់គ្លេសក៏បានធ្វើការវាយប្រហារតាមអាកាសលើទីតាំងយោធា ហ៊ូធី ក្នុងប្រទេសយេម៉ែន ដើម្បីជាការឆ្លើយតបនឹងការវាយប្រហារទាំងនេះផងដែរ។

នៅក្នុងសេចក្តីថ្លែងការណ៍មួយ ក្រុមហ៊ូធី បាននិយាយថា យុទ្ធជន និងជនស៊ីវិលជាច្រើននាក់ត្រូវបានសម្លាប់នៅក្នុង ការឈ្លានពានរបស់អាមេរិក ក្នុងរយៈពេលពីរឆ្នាំកន្លងមក ប៉ុន្តែបានហៅការស្លាប់របស់ al-Ghamari ជាអំពើដ៏ធ្ងន់ធ្ងរដែលត្រូវតែប្តេជ្ញាសងសឹក។

លើសពីនេះមេដឹកនាំលោក Abdul Malik al-Houthi បាននិយាយថា ក្រុមនេះនឹងត្រៀមខ្លួនជាស្រេចដើម្បីធ្វើសកម្មភាពប្រឆាំងនឹងអ៊ីស្រាអែល ប្រសិនបើខ្លួនបំបែកបទឈប់បាញ់នៅតំបន់ហ្គាហ្សាថ្មីៗជាមួយក្រុមហាម៉ាស។ ទោះយ៉ាងណាចាប់តាំងពីកិច្ចព្រមព្រៀងបទឈប់បាញ់កាលពីសប្តាហ៍មុន ពុំមានការវាយប្រហារណាមួយរបស់ហ៊ូធីត្រូវបានគេរាយការណ៍ឡើយ៕