ក្រឡាប់ឡានក្នុងទីក្រុង Lisbon ប្រទេសព័រទុយហ្គាល់សម្លាប់មនុស្ស១៥នាក់

យោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី០៤ខែកញ្ញា ឧបទ្ទវហេតុដ៏សោកនាដកម្មមួយបានកើតឡើងក្នុងទីក្រុង Lisbon ប្រទេសព័រទុយហ្គាល់ ដោយរថយន្តតាមដងផ្លូវ(ស្រដៀងរត់ភ្លើងរត់លើផ្លូវដែក) ដ៏ល្បីល្បាញ Elevador da Glória បានក្រឡាប់ និងធ្លាក់ចូលទៅក្នុងអគារមួយ សម្លាប់មនុស្ស ១៥ នាក់ និងរបួស ១៨ នាក់ មានទាំងកុមារ និងជនបរទេស។

បើតាមសាក្សី​បាន​និយាយ​ថា រថយន្ត​បង្ក​បាន​បើក​ហួស​ល្បឿន​កំណត់​ចុះ​ពីលើ​ភ្នំ​ចោត ក្រោយមកបាន​ក្រឡាប់​ទៅ​លើ​បុរស​ម្នាក់​នៅ​ចិញ្ចើមផ្លូវ ។ ក្រោយហេតុការណ៍ដ៏រន្ធត់នេះក្រុមសង្គ្រោះបន្ទាន់បានជួយសង្គ្រោះជនរងគ្រោះទាំងអស់ក្នុងរយៈពេលពីរម៉ោង។

អាជ្ញាធរបានហៅវាថាជាឧបទ្ទវហេតុដ៏អាក្រក់បំផុតរបស់ទីក្រុង Lisbon ក្នុងប្រវត្តិសាស្ត្រថ្មីៗនេះ ដែលជំរុញឱ្យទីក្រុងផ្អាកសេវាកម្មរថយន្តតាមដងផ្លូវទាំងអស់សម្រាប់ការត្រួតពិនិត្យសុវត្ថិភាព។ ប្រធានាធិបតី ព័រទុយហ្គាល់លោក​ Marcelo Rebelo de Sousa និងអភិបាលក្រុងលោក Carlos Moedas បានចូលរួមរំលែកទុក្ខយ៉ាងជ្រាលជ្រៅ ដោយប្រទេសព័រទុយហ្គាល់បានប្រកាសថ្ងៃកាន់ទុក្ខជាតិផងដែរ។

គួរបញ្ជាក់ថារថយន្តតាមដងផ្លូវគឺជាប្រភេទការដឹកជញ្ជូនសាធារណៈដែលរត់លើផ្លូវដែកដែលបានសាងសង់នៅតាមផ្លូវ។ វាត្រូវបានបំពាក់ដោយអគ្គិសនី និងផ្លាស់ទីតាមបណ្តោយផ្លូវថេរ រត់ក្នុងផ្លូវចន្លោះរថយន្ត និងយានជំនិះផ្សេងទៀត។

សេវាកម្មរថយន្តតាមដងផ្លូវនេះបានដំណើរការតាំងពីឆ្នាំ១៨៨៥ មកម្លេះហើយបានទាក់ទាញទេសចរណ៍ និងការដឹកជញ្ជូនក្នុងស្រុក។ ក្រុមហ៊ុន Carris ដែលជាប្រតិបត្តិករបាននិយាយថា រថយន្តនេះទើបតែបានឆ្លងកាត់ការថែទាំ ហើយបានសន្យាថានឹងសហការពេញលេញក្នុងការស៊ើបអង្កេត៕