ថៃព្រមានថា អ្នកឆ្លងកូវីដអាចហក់ឡើងខ្ពស់ដល់រាប់ពាន់ករណីក្នុងមួយថ្ងៃ អំឡុងពិធីបុណ្យចូលឆ្នាំ

ក្នុងសន្និសីទកាសែតមួយនៅឯក្រសួងសុខាភិបាលសាធារណៈ លោក Yong Poovorawan ប្រធានមជ្ឈមណ្ឌលឧត្តមភាពផ្នែកជីវសាស្រ្ត នៅសកលវិទ្យាល័យ Chulalongkorn បានព្រមានប្រឆាំងនឹងការធ្វើដំណើរដែលមិនចាំបាច់ក្នុងអំឡុងពេលនៃរដូវបុណ្យចូលឆ្នាំ ដោយលោកបានប៉ាន់ស្មានថា ចំនួននៃការឆ្លងថ្មីអាចហក់ឡើងខ្ពស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកនិយាយថា “ប្រសិនបើអាចធ្វើទៅបាន យើងមិនគួរមានការធ្វើដំណើរឬចលនាណាមួយទេនាពេលឥឡូវនេះ។ បើសិនជាមិនអាច ត្រូវតែមានវិធានការរឹតត្បិតដើម្បីគ្រប់គ្រងជំងឺនេះ”។

ក្រុមអ្នកជំនាញផ្នែកមេរោគបាននិយាយកាលពីថ្ងៃពុធម្សិលមិញថា វីរុសកូវីដបំប្លែងខ្លួនចក្រភពអង់គ្លេសដែលរីករាលដាលយ៉ាងឆាប់រហ័ស គឺជាភ្នាក់ងារបង្កការឆ្លងជាចង្កោមដែលត្រូវបានគេរកឃើញនៅតាមកន្លែងកម្សាន្តនានាទូទាំងទីក្រុងបាងកក។

លោកវេជ្ជបណ្ឌិតនិយាយថា “ប្រសិនបើគ្មានអន្តរាគមន៍គ្រប់គ្រាន់ដើម្បីទប់ស្កាត់សកម្មភាពដែលមានហានិភ័យខ្ពស់ទាំងនេះអំឡុងពិធីបុណ្យសង្ក្រានឆ្នាំថ្មីទេនោះ ចំនួនអ្នកឆ្លងថ្មីអាចឈានដល់រាប់ពាន់នាក់ក្នុងមួយថ្ងៃ”។

ការប៉ាន់ស្មាននៃអត្រាឆ្លងក្នុងមួយថ្ងៃ ត្រូវបានគេគណនាដោយពិចារណាទាំងអត្រាឆ្លងខ្ពស់នៃវីរុសបំប្លែងខ្លួនអង់គ្លេស និងវិធានការទប់ស្កាត់ជំងឺកូវីដ-១៩ ដែលបច្ចុប្បន្នកំពុងបន្ធូរបន្ថយ។

លោកបាននិយាយថា “ការទៅសួរសុខទុក្ខបងប្អូនវ័យចំណាស់ក្នុងឱកាសបុណ្យចូលឆ្នាំគឺល្អ ប៉ុន្តែវាមិនល្អទេប្រសិនបើការទៅលេងបែបនេះបង្កការរាលដាលវីរុសដល់ពួកគេនោះ”។

លោកបាននិយាយថា មនុស្សវ័យចំណាស់ដែលឆ្លងវីរុសបំប្លែងខ្លួនអង់គ្លេសគឺមានហានិភ័យខ្ពស់ក្នុងការវិវត្តទៅជារោគសញ្ញាធ្ងន់ធ្ងរ។ ប្រសិនបើអាចធ្វើទៅបាន ទំនៀមទម្លាប់របស់ថៃក្នុងការទៅសួរសុខទុក្ខសាច់ញាតិចាស់ៗក្នុងឱកាសនៃពិធីបុណ្យចូលឆ្នាំ គួរត្រូវបានធ្វើឡើងតាមអនឡាញជំនួសវិញ។

បច្ចុប្បន្ន ភាគច្រើននៃករណីឆ្លងថ្មីពាក់ព័ន្ធនឹងមនុស្សវ័យក្មេងគឺមិនបញ្ចេញរោគសញ្ញាទេឬបញ្ចេញរោគសញ្ញាតិចតួច ដែលជាហេតុធ្វើឲ្យពិបាកបែងចែករវាងអ្នកឆ្លងនិងអ្នកមិនឆ្លង។

ទន្ទឹមនោះ អ្នកឯកទេសរូបនេះក៏បានជំរុញឲ្យរដ្ឋាភិបាលពន្លឿនការចាក់វ៉ាក់សាំងដល់ប្រជាជន ប្រឆាំងនឹងជំងឺកូវីដ-១៩ផងដែរ៕

ប្រែសម្រួលដោយ៖ Vann Vann

ប្រភព៖ Bangkok Post

ចុចអាន៖ វីរុសកូវីដបំប្លែងខ្លួនចក្រភពអង់គ្លេស កំពុងវាយលុក បាងកក