សុខភាព​របស់​លោកស្រី អ៊ុងសាន ស៊ូជី កាន់តែ​យ៉ាប់យ៉ឺន​ក្នុង​កន្លែងឃុំឃាំង

កូនប្រុសរបស់អតីតមេដឹកនាំមីយ៉ាន់ម៉ា លោកស្រី អ៊ុងសាន ស៊ូជី (Aung San Suu Kyi) និយាយថា សុខភាពម្តាយរបស់ខ្លួនកាន់តែយ៉ាប់យ៉ឺន ហើយថាលោកស្រីត្រូវការការថែទាំសុខភាពជាបន្ទាន់ និងអំពាវនាវឲ្យមានការដោះលែងបន្ទាប់ពីលោកស្រីជាប់ក្នុងការឃុំឃាំងរបស់យោធាអស់រយៈពេលជាងបីឆ្នាំមកហើយ។

Kim Aris ដែលជាកូនប្រុស លោកស្រី ស៊ូជី បានប្រាប់រ៉យទ័រកាលពីថ្ងៃសុក្រថា អ្នកស្រី ស៊ូជី ដែលមានអាយុ ៨០ឆ្នាំ បានស្នើសុំទៅជួបគ្រូពេទ្យឯកទេសជំងឺបេះដូងកាលពីមួយខែមុន ប៉ុន្តែវាមិនច្បាស់ថាតើសំណើរបស់លោកស្រីត្រូវបានអនុញ្ញាតឬយ៉ាងណានោះទេ។ Aris បាននិយាយថា លោកស្រី ស៊ូជី ក៏មានបញ្ហាឆ្អឹង និងអញ្ចាញធ្មេញផងដែរ ហើយលោកស្រីប្រហែលជាបានរងរបួសក្នុងអំឡុងពេលការរញ្ជួយដីដ៏ធំមួយនៅក្នុងខែមីនា ដែលបានសម្លាប់មនុស្សរាប់ពាន់នាក់។ Aris ​បាន​និយាយ​ថា​៖ «​ខ្ញុំ​មាន​ការ​ព្រួយ​បារម្ភ​ខ្លាំង​ណាស់ យើង​មិន​ដឹង​ច្បាស់​ថា​តើ​គាត់​នៅ​មាន​ជីវិត​ឬ​អត់ទេ​»។

គួររម្លឹកថាលោកស្រី ស៊ូជី ត្រូវបានឃុំខ្លួនតាំងពីរដ្ឋប្រហារយោធាខែកុម្ភៈ ឆ្នាំ ២០២១ នៅពេលដែលរបបយោធារបស់ឧត្តមសេនីយ៍ មីន អ៊ុងឡាំង (Min Aung Hlaing) បានទម្លាក់រដ្ឋាភិបាលជាប់ឆ្នោតរបស់លោកស្រី។ លោកស្រី ត្រូវបានកាត់ទោសលើការចោទប្រកាន់ចំនួន១៩រួមទាំងអំពើពុករលួយឲ្យជាប់គុក ៣៣ ឆ្នាំ ក្រោយមកត្រូវបានកាត់បន្ថយមកត្រឹម ២៧ ឆ្នាំ ។ ទីតាំងពិតប្រាកដដែលឃុំខ្លួនលោកស្រីនៅតែមិនមានអ្នកដឹងច្បាស់លាស់ ទោះបីជាប្រភពកាលពីឆ្នាំមុនថាលោកស្រីត្រូវបានគេឃុំឃាំងតែម្នាក់ឯងនៅក្នុងពន្ធនាគារក្នុងទីក្រុង Naypyidaw ក៏ដោយ។

លោកស្រីបានឈ្នះរង្វាន់ណូបែលសន្តិភាព និងជាកូនស្រីរបស់មេដឹកនាំឯករាជ្យ អ៊ុងសាន នឹងត្រូវបានឃុំខ្លួនក្នុងផ្ទះរយៈពេល ១៥ ឆ្នាំចន្លោះឆ្នាំ ១៩៨៩និង ២០១០។ បន្ទាប់ពីការដោះលែងលោកស្រីបានជួយដឹកនាំប្រទេសមីយ៉ាន់ម៉ាក្នុងរយៈពេលខ្លីនៃការគ្រប់គ្រងបែបលទ្ធិប្រជាធិបតេយ្យ។ ក្រុមសិទ្ធិមនុស្សអន្តរជាតិបានអំពាវនាវម្តងហើយម្តងទៀតឱ្យមានការដោះលែងលោកស្រីដោយព្រមានថាការឃុំខ្លួនយូរ និងការខ្វះខាតការថែទាំសុខភាពគំរាមកំហែងដល់អាយុជីវិតរបស់លោកស្រី៕

អត្ថប​ទ៖ ប៊ុន សុភាព