ព័ត៌មានអន្ដរជាតិ

នាយករដ្ឋមន្ត្រីបារាំង Bayrou ត្រូវបានបណ្តេញចេញ ក្រោយចាញ់ឆ្នោតផ្ដល់សេចក្ដីទុកចិត្ត

បានផុស

១០ ខែ មុន

នៅ

ថ្ងៃអង្គារ ៩ កញ្ញា ២០២៥

ដោយ

Chheang

នាយករដ្ឋមន្ត្រីបារាំង លោក Francois Bayrou បានចាញ់ការបោះឆ្នោតផ្ដល់សេចក្ដីទុកចិត្តនៅក្នុងសភាកាលពីថ្ងៃចន្ទទី៨ខែកញ្ញា ប៉ុន្មានម៉ោងបន្ទាប់ពីចេញការព្រមានដល់សមាជិកសភាថា បំណុលដែលកើនឡើងរបស់ប្រទេសនេះគឺ«ស្ថិតនៅក្នុងភាពអាសន្នខ្លាំងមែនទែន»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបរាជ័យរបស់លោក Bayrou ធ្វើឲ្យវិបត្តិនយោបាយសម្រាប់ប្រធានាធិបតី Emmanuel Macron កាន់តែយ៉ាប់យ៉ឺន ដែលឥឡូវនេះគាត់ត្រូវតែតែងតាំងនាយករដ្ឋមន្ត្រីថ្មីជាលើកទី៥របស់ខ្លួនក្នុងរយៈពេលមិនដល់២ឆ្នាំផង។

លោក Bayrou វ័យ៧៤ឆ្នាំ ដែលបានបម្រើការជានាយករដ្ឋមន្ត្រីរយៈពេល៩ខែ នឹងត្រូវប្រគល់ជាផ្លូវការនូវលិខិតលាលែងពីតំណែងនៅថ្ងៃអង្គារនេះ។ សភាបារាំងបានច្រានចោលផែនការថវិការបស់លោក Bayrou ដោយសំឡេង ៣៦៤ ទល់នឹង ១៩៤ ដោយបានផ្តួលរំលំរដ្ឋាភិបាលរបស់គាត់។

ការបោះឆ្នោតផ្តោតលើសំណើរបស់លោក Bayrou ដើម្បីកាត់បន្ថយការចំណាយចំនួន ៤៤ពាន់លានអឺរ៉ូ (៥២ពាន់លានដុល្លារ) ក្នុងគោលបំណងទប់ស្កាត់ឱនភាព និងបំណុលសាធារណៈដែលមានចំនួនឡើងដល់ ១១៤% នៃ GDP បារាំង។ លោក Bayrou បានព្រមានមុនពេលបោះឆ្នោតថា «អ្នកមានអំណាចក្នុងការទម្លាក់រដ្ឋាភិបាល ប៉ុន្តែអ្នកមិនមានអំណាចដើម្បីលុបបំបាត់ការពិតទេ»។

ទាំងគណបក្សស្តាំជ្រុលនិយម និងគណបក្សឆ្វេងជ្រុលនិយម បានរួបរួមគ្នាបោះឆ្នោតប្រឆាំងរដ្ឋាភិបាល។ សម្ព័ន្ធទាំង២បានប្រឆាំងនឹងរដ្ឋបាលរបស់ប្រធានាធិបតី Emmanuel Macron ជាយូរណាស់មកហើយ។

សូមជម្រាបថា បារាំងកំពុងប្រឈមមុខនឹងអស្ថិរភាពនយោបាយជាបន្តបន្ទាប់ ខណៈដែលរដ្ឋាភិបាលថ្មីរបស់លោក Macron ក៏នឹងត្រូវជួបប្រទះបញ្ហាដូចគ្នានៅក្នុងការអនុម័តកញ្ចប់ថវិកាជាតិតាមរយៈសភាដែលសំឡេងបក្សប្រឆាំងមានចំនួនច្រើនជាង៕