តើឧស្ម័នបង្ហូរទឹកភ្នែក មានផលប៉ះពាល់ខ្លាំងកម្រិតណា?

កាលពីរសៀលថ្ងៃពុធទី១៧ខែកញ្ញាឆ្នាំ២០២៥ កងទ័ពថៃបានប្រើអំពើហិង្សានិងប្រព្រឹត្តទង្វើដ៏សាហាវព្រៃផ្សៃមកលើព​លរដ្ឋកម្ពុជានៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទាហានថៃបានបាញ់គ្រាប់កាំភ្លើងជ័រនិងប្រើឧស្ម័នបង្ហូរទឹកភ្នែកមកលើពលរដ្ឋកម្ពុជា ជាពិសេសព្រះសង្ឃនិងស្រ្តី បណ្តាលឲ្យរបួស២៩អង្គ-នាក់។

ពលរដ្ឋកម្ពុជាច្រើននាក់ត្រូវរងគ្រោះដោយសារឧស្ម័នបង្ហូរទឹកភ្នែកនេះ។ វាគឺជាសារធាតុគីមីដែលបណ្តាលឲ្យរលាកភ្នែក ច្រមុះ បំពង់ក និងផ្លូវដង្ហើម។ ដ្បិតឈ្មោះជា «ឧស្ម័ន» តែវាមានលក្ខណៈជាម្សៅល្អិតៗ ដែលបែកខ្ញែកទៅក្នុងខ្យល់នៅពេលបាញ់ចេញពីបំពង់ឬគ្រាប់បែក។

🚨ផលប៉ះពាល់ភ្លាមៗ

នៅពេលប៉ះពាល់ ឧស្ម័នបង្ហូរទឹកភ្នែកបង្កឲ្យមានប្រតិកម្មយ៉ាងឆាប់រហ័សលើរាងកាយ៖

• ភ្នែក៖ ឈឺចាប់ខ្លាំង, ហូរទឹកភ្នែកមិនឈប់, ព្រិលភ្នែក, ស្រវាំងភ្នែក និងមើលមិនឃើញជាបណ្ដោះអាសន្ន
• ប្រព័ន្ធដកដង្ហើម៖ ពិបាកដកដង្ហើម, តឹងទ្រូង, ក្អកខ្លាំង និងមានអារម្មណ៍ថាស្លាក់
• ច្រមុះ និងបំពង់ក៖ មានអារម្មណ៍ក្រហាយ, ហូរទឹករំអិល និងពិបាកលេបទឹកមាត់
• ស្បែក៖ រមាស់ ក្រហាយ និងមានកន្ទួលក្រហម។
• ទូទៅឧស្ម័ននេះធ្វើឲ្យអ្នកមានអារម្មណ៍ភិតភ័យ វង្វេងវង្វាន់ និងបាត់បង់ការគ្រប់គ្រងខ្លួនឯង

យ៉ាងណា ជាធម្មតាផលប៉ះពាល់ទាំងនេះ នឹងបាត់ទៅវិញក្នុងរយៈពេលប្រហែល ២០ ទៅ ៣០ នាទី នៅពេលដែលអ្នកចាកចេញពីតំបន់ដែលមានឧស្ម័ន។

🚨ផលប៉ះពាល់រយៈពេលវែង

ទោះបីជាផលប៉ះពាល់ភាគច្រើនជាបណ្ដោះអាសន្នក៏ដោយ ប៉ុន្តែក៏ការប៉ះពាល់ខ្លាំងឬយូរ អាចបង្កជាបញ្ហាធ្ងន់ធ្ងរបានដែរ៖

• ភ្នែក៖ អាចបណ្តាលខូចកញ្ចក់ភ្នែកជាអចិន្ត្រៃយ៍ និងខ្វាក់
• ប្រព័ន្ធដកដង្ហើម៖ អ្នកដែលមានបញ្ហាសុខភាពពីមុនដូចជាជំងឺហឺត អាចប្រឈមនឹងការរលាកសួត ឬបញ្ហាផ្លូវដង្ហើមធ្ងន់ធ្ងរ។
• ស្បែក៖ អាចបង្កឲ្យមានការរលាកស្បែកប្រភេទទីពីរ ប្រសិនបើប៉ះផ្ទាល់ជាមួយសារធាតុឧស្ម័ននៅកម្រិតប្រមូលផ្តុំខ្ពស់៕

អត្ថបទ៖ សុខ សុវណ្ណ

ចុចអាន៖ វិធីទប់ទល់និងកាត់បន្ថយផលប៉ះពាល់ពីឧស្ម័នបង្ហូរទឹកភ្នែក