ព័ត៌មានអន្ដរជាតិ

៨១%នៃរដ្ឋសមាជិក UN ទទួលស្គាល់រដ្ឋប៉ាឡេស្ទីន ប៉ុន្តែគ្មានដំណោះស្រាយបញ្ចប់ការឈឺចាប់ទេ

បានផុស

៩ ខែ មុន

នៅ

ថ្ងៃសុក្រ ២៦ កញ្ញា ២០២៥

ដោយ

មហាសន្និបាតអង្គការសហប្រជាជាតិ (UNGA) លើកទី៨០ ដែលរៀបចំឡើងក្រោមប្រធានបទ «រួបរួមគ្នាកាន់តែប្រសើរ (Better Together)៖ ៨០ឆ្នាំនិងបន្តទៅមុខទៀតដើម្បីសន្តិភាព ការអភិវឌ្ឍន៍ និងសិទ្ធិមនុស្ស» ដោយប្រទេសសមាជិកអង្គការសហប្រជាជាតិដែលត្រូវបានទទួលស្គាល់ទាំង១៩៣ ត្រូវបានអញ្ជើញចូលរួម ហើយនៅក្នុងនោះមានតំណាងប្រទេសរហូតដល់ជាង១៥០ បានរៀបចំឡើងថ្លែងការណ៍តំណាងប្រទេសរៀងៗខ្លួន។

មហាសនិ្នបាតអង្គការសហប្រជាជាតិលើកទី៨០។ REUTERS

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្វីត្បិតតែប្រធានបទរួមបានផ្តោតសំខាន់ការរួបរួមគ្នា ប៉ុន្តែផ្អែកតាមសុន្ទរកថា របស់មេដឹកនាំដ៏មានឥទ្ធិពលនិមួយៗ បានប្រើប្រាស់ជាវេទិកាដើម្បីវាយប្រហារគ្នា ទៅតាមរបៀបនៃគោលនយោបាយរបស់ប្រទេសរៀងៗខ្លួនទៅវិញ។

សម្រាប់ឆ្នាំនេះ សង្គ្រាមនៅតំបន់ហ្គាហ្សារបស់ប៉ាឡេស្ទីនគឺជាបញ្ហាឈានមុខដែលមេដឹកនាំនៃបណ្តាញប្រទេសនានា ជាពិសេសប្រទេសមហាអំណាចបានលើកឡើងជាបន្តបន្ទាប់។ តាមប្រធានបទដែលបានព្រាងទុក ការចូលរួមរបស់ប៉ាឡេស្ទីនក្នុងឆ្នាំនេះគឺជាការផ្តោតសំខាន់ ខណៈបញ្ហាដទៃទៀត រួមមានការប្រែប្រួលអាកាសធាតុ បញ្ញាសិប្បនិម្មិត វិបត្តិស្បៀងអាហារសកល និងជម្លោះជុំវិញពិភពលោក បានស្ថិតនៅក្នុងចំណោមបញ្ហាសំខាន់ៗដែលទាមទារឲ្យមានការសម្រេចចិត្ត។

មួយថ្ងៃមុនកិច្ចប្រជុំដោយការថ្លែងរបស់មេដឹកនាំតាមប្រទេសនានា នៅថ្ងៃចន្ទ ប្រទេសបារាំង អាន់ដូរ៉ា បែលហ្សិក លុចសំបួ ម៉ាល់តា និងម៉ូណាកូ បានប្រកាសពីការទទួលស្គាល់ភាពជារដ្ឋប៉ាឡេស្ទីននៅក្នុងកិច្ចប្រជុំកំពូលក្នុងទីក្រុងញូវយ៉ក ដែលរួមប្រជុំដោយបារាំង និងអារ៉ាប៊ីសាអូឌីត។ អូស្ត្រាលី កាណាដា ព័រទុយហ្គាល់ និងចក្រភពអង់គ្លេស ដែលទទួលស្គាល់ប៉ាឡេស្ទីនជាផ្លូវការមួយថ្ងៃមុននោះ ក៏បាននិយាយនៅក្នុងកិច្ចប្រជុំនេះដែរ។

រដ្ឋប៉ាឡេស្ទីនឥឡូវនេះត្រូវបានទទួលស្គាល់ថាជាប្រទេសអធិបតេយ្យភាពដោយ ១៥៧ នៃរដ្ឋសមាជិក ១៩៣របស់អង្គការសហប្រជាជាតិ ដែលតំណាងឱ្យ ៨១ ភាគរយនៃសហគមន៍អន្តរជាតិ។

ចំណាត់ការទាំងនេះឆ្លុះបញ្ចាំងពីនិន្នាការអន្តរជាតិដែលកំពុងកើនឡើងឆ្ពោះទៅរកការទទួលស្គាល់ភាពជារដ្ឋរបស់ប៉ាឡេស្ទីន ទោះបីជាកិច្ចខិតខំប្រឹងប្រែងដើម្បីផ្តល់ឱ្យប៉ាឡេស្ទីននូវសមាជិកភាពពេញលេញរបស់អង្គការសហប្រជាជាតិ នៅតែត្រូវបានរារាំង ជាពិសេសដោយសហរដ្ឋអាមេរិកដែលមានប្រវត្តិសាស្ត្រយូរមកហើយក្នុងការបដិសេធដំណោះស្រាយដែលរិះគន់អ៊ីស្រាអែល។ នេះបើយោងតាម Al Jaazeera។

ប្រធានាធិបតីសហរដ្ឋអាមេរិក លោក ដូណាល់ ត្រាំ ដែលជាសម្ព័ន្ធមិត្តដ៏ជិតស្និទ្ធបំផុតរបស់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់ញ៉ាហ៊ូ បាននិយាយថា ការទទួលស្គាល់រដ្ឋប៉ាឡេស្ទីន គឺជាការផ្តល់រង្វាន់ដល់ក្រុមហាម៉ាស ដែលសហរដ្ឋអាមេរិក និងលោកខាងលិចចាត់ទុកជា «ក្រុមភេរវករ» គាំទ្រដោយអ៊ីរ៉ង់។

រដ្ឋាភិបាលអ៊ីស្រាអែល តែងតែប្រើប្រាស់មូលហេតុដែលក្រុមហាម៉ាស វាយប្រហារចូលទឹកដីខ្លួនកាលថ្ងៃទី៧ខែតុលាឆ្នាំ២០២៣ ដោយសម្លាប់មនុស្សជាង១២០០នាក់ភ្លាមៗ ហើយបានចាប់ចំណាប់ខ្មាំង២៤០នាក់ គឺជាការបង្កសង្គ្រាម ដែលអ៊ីស្រាអែលត្រូវតែតាមកម្ទេចក្រុមហាម៉ាសនេះ ទោះបីពួកគេនៅទីណា ក្នុងប្រទេសណាក៏ដោយ។

ការវាយប្រហាររបស់អ៊ីស្រាអែលក្នុងរយៈពេលជិត២ឆ្នាំនេះ មិនត្រឹមតែផ្តោតលើក្រុមប្រដាប់អាវុធហាម៉ាសនៅក្នុងតំបន់ហ្គាហ្សានោះទេ ប៉ុន្តែការវាយប្រហារបានពង្រីកដល់ប្រទេសនៅក្នុងតំបន់មជ្ឈិមបូព៌ាមួយចំនួន ដូចជា លីបង់ ស៊ីរី អ៊ីរ៉ាក់ យេម៉ែន អ៊ីរ៉ង់ និង ចុងក្រោយគឺប្រទេសកាតា ដែលទាក់ទាញការថ្កោលទោសកាន់តែខ្លាំងឡើងពីសំណាក់ប្រទេសនានានៅតំបន់អឺរ៉ុប។

ក្នុងពេលកន្លងមក អគ្គលេខាធិការអង្គការសហប្រជាជាតិ លោក Antonio Guterres បានថ្កោលទោសការវាយប្រហាររបស់អ៊ីស្រាអែលមិនរើសមុខ និងការបង្អត់អាហារប្រជាជននៅហ្គាហ្សាដោយសារតែការបិទការនាំចូលគ្រឿងបរិភោគ ដែលធ្វើឲ្យប្រជាជននៅតំបន់ហ្គាហ្សាជាង២លាននាក់ខ្វះខាតអាហារបរិភោគយ៉ាងខ្លាំង។

លោក Guterres បានអះអាងថា ប្រជាជនប៉ាឡេស្ទីននៅហ្គាហ្សាមិនត្រូវទទួលរងនូវការដាក់ទោសរួមបែបនេះឡើយ។

ថ្លែងនៅក្នុងសន្និបាតអង្គការសហប្រជាជាតិ ប្រធានក្រុមប្រឹក្សាអឺរ៉ុប លោក ANTONIO COSTA និយាយថា៖«នៅហ្គាហ្សា ជាកន្លែងដែលយើងឃើញការរងទុក្ខដែលមិនអាចនឹកស្មានដល់ កុមារស្រេកឃ្លាន គ្រួសារត្រូវខ្ទេចខ្ទាំ និងគ្រោះមហន្តរាយមនុស្សធម៌ដែលធ្វើឱ្យមនសិការរបស់ពិភពលោកភ្ញាក់ផ្អើល។ ការប្រើប្រាស់ភាពអត់ឃ្លានជាអាវុធនៃសង្រ្គាម គឺជាអំពើអសីលធម៌ និងមួយដែលផ្គើននឹងពាក្យសម្ដី។»

ក្រសួងសុខាភិបាលប្រចាំតំបន់ហ្គាហ្សា បានកត់ត្រាអ្នកស្លាប់ដោយសារការវាយប្រហាររបស់អ៊ីស្រាអែល កើនឡើងលើស ៦៥៤០០នាក់ គិតត្រឹមថ្ងៃពុធ ខណៈដែលអ្នកបានរងរបួសកើនឡើងដល់ចំនួនជាង ១៦៧០០០នាក់៕

រ៉ាន់ រើយ